सोमवार, 21 सप्टेंबर 2026
मोठी बातमी! IIT बॉम्बेच्या आंदोलक विद्यार्थ्यांच्या 18 मागण्या मान्य; 3 तासांच्या बैठकीनंतर आरोपी प्राध्यापक निलंबित
पुणे पदवीधर आणि शिक्षक मतदारसंघातील राजकीय हालचालींना वेग आला असतानाच गोरेंच्या या वक्तव्यामुळे चर्चेला उधाण आले आहे. महायुतीच्या माध्यमातून निवडणूक लढविण्याचा प्रयत्न असला तरी परिस्थिती निर्माण झाल्यास भाजप स्वतंत्रपणे दोन्ही जागांवर मैदानात उतरण्याची तयारी ठेवत असल्याचे त्यांच्या वक्तव्यावरून स्पष्ट झाले. मी पक्षाचा कार्यकर्ता आहे. भाजपकडून महायुतीच्या माध्यमातून निवडणूक लढविली जाईलच; परंतु वेळ आली तर पक्ष स्वतंत्रपणेही लढेल. मी जिल्ह्याचा पालकमंत्री असून पक्षाचा एक कार्यकर्ता आहे, अशी भूमिका गोरे यांनी यावेळी मांडली.
दरम्यान, सोलापूर जिल्ह्याच्या राजकारणात पुन्हा सक्रिय झालेल्या रणजितसिंह मोहिते पाटील यांच्या गाठीभेटींबाबत विचारले असता जयकुमार गोरे यांनी मिश्कील टिप्पणी केली. ‘पावसाळा आला की छत्र्या येतात आणि उगवतात,’ असे म्हणत त्यांनी मोहिते पाटील यांच्या राजकीय सक्रियतेवर टोला लगावला.
मोहिते पाटील यांच्या जुन्या सहकाऱ्यांच्या भेटीगाठी आणि जिल्ह्यातील वाढलेल्या राजकीय हालचालींच्या पार्श्वभूमीवर गोरेंच्या या वक्तव्याची जिल्ह्याच्या राजकीय वर्तुळात चर्चा सुरू झाली आहे. आगामी सोलापूर जिल्हा मध्यवर्ती सहकारी बँकेच्या निवडणुकीच्या पार्श्वभूमीवरही विविध राजकीय गटांकडून मोर्चेबांधणी सुरू असल्याचे चित्र आहे.
सोलापूर जिल्हा मध्यवर्ती सहकारी बँकेच्या निवडणुकीबाबतही गोरे यांनी भाजपची भूमिका स्पष्ट केली. जिल्ह्यातील मातब्बर नेते एकत्र बसून बँकेच्या निवडणुकीबाबत योग्य निर्णय घेतील. आवश्यकता भासल्यास समविचारी नेत्यांना आणि घटकांनाही सोबत घेतले जाईल; मात्र जिल्हा बँकेवर भाजपचा झेंडा फडकविण्याचा निर्धार असल्याचे त्यांनी सांगितले.
डीसीसी बँकेच्या निवडणुकीच्या पार्श्वभूमीवर भाजप आणि मित्रपक्षांमधील प्रमुख नेत्यांच्या बैठकांना सुरुवात झाली आहे. त्यामुळे आगामी निवडणुकीत कोणकोणते राजकीय गट एकत्र येतात आणि कोणती नवी समीकरणे आकार घेतात, याकडे जिल्ह्याचे लक्ष लागले आहे.
एकीकडे पुणे शिक्षक-पदवीधर मतदारसंघात वेळ पडल्यास स्वतंत्र लढण्याचे संकेत, तर दुसरीकडे सोलापूर जिल्हा बँकेवर भाजपचा झेंडा फडकविण्याचा निर्धार आणि मोहिते पाटलांच्या सक्रियतेवर केलेली टिप्पणी, यामुळे जयकुमार गोरेंच्या वक्तव्याने सोलापूरच्या राजकारणात चर्चेला चांगलीच रंगत आली आहे.
