बिहार निवडणुकीनंतर मुख्यमंत्री कोण होणार? (फोटो सौजन्य-X)
Bihar Election 2025 News in Marathi : बिहारचे मुख्यमंत्री नितीश कुमार यांचे जवळचे विश्वासू आणि जेडीयूचे वरिष्ठ नेते केसी त्यागी यांनी एक महत्त्वपूर्ण विधान केले. त्यांनी दावा केला की, सर्व भाजप नेत्यांनी एकमताने घोषणा केली आहे की निवडणुका नितीश कुमार यांच्या नेतृत्वाखाली होतील. निवडणुकीनंतर ते मुख्यमंत्री होतील, मात्र हे लक्षात घेण्यासारखे आहे की एनडीएमध्ये उपेंद्र कुशवाहा, चिराग पासवान आणि जितन राम मांझी यांच्या पक्षांसह भाजप आणि जेडीयूचा समावेश आहे. हे सर्व पक्ष एकत्र निवडणूक रिंगणात उतरले आहेत.
केसी त्यागी यांचे हे विधान अशा वेळी आले आहे, जेव्हा बिहारमधील विरोधी पक्ष असा दावा करत आहेत की, नितीश कुमार आता मुख्यमंत्री होणार नाहीत. अनेक विरोधी नेत्यांनी म्हटले आहे की भाजप नितीश कुमार यांना मुख्यमंत्री होऊ देणार नाही.
उपेंद्र कुशवाहांबद्दलच्या प्रश्नाबाबत केसी त्यागी म्हणाले, “उपेंद्र कुशवाह स्वतः म्हणत आहेत की आता सर्व काही ठीक आहे. अमित शहांसोबतच्या भेटीनंतर जेव्हा ते बाहेर आले तेव्हा त्यांनी स्वतःच सांगितले की ते रागावलेले नाहीत.” खरं तर, एनडीएमधील जागावाटपाच्या व्यवस्थेवर उपेंद्र कुशवाहा नाराज असल्याच्या बातम्या आल्या होत्या. काही जागा चिराग पासवान यांना गेल्याने ते नाराज असल्याचे वृत्त आहे. तथापि, नंतर सर्व काही ठीक असल्याचे दावे करण्यात आले. भाजपने उपेंद्र कुशवाहा यांना बिहारमध्ये एमएलसीची जागा देण्याचे आश्वासन दिले आहे. सूत्रांच्या मते ते पुन्हा राज्यसभेवर निवडून येतील.
एनडीएच्या जागावाटप व्यवस्थेचा भाग म्हणून, जेडीयू १०१ जागांवर निवडणूक लढवत आहे. भाजपनेही समान जागांवर उमेदवार उभे केले आहेत. जेडीयू आणि भाजप “जुळे भाऊ” सूत्र वापरून निवडणूक लढवत आहेत. म्हणजे, मोठा भाऊ किंवा धाकटा भाऊ नाही; दोघांनाही समान जागा मिळाल्या आहेत. बिहारमधील राजकीय तज्ञ या जागावाटप सूत्रावरून वेगवेगळे अर्थ काढत आहेत.
