शनिवार, 14 नोव्हेंबर 2026
कराड दक्षिणचे आमदार डॉक्टर अतुल भोसले यांनी सातारा जिल्हाध्यक्ष पद स्वीकारल्यानंतर प्रेस घेतली (फोटो - टीम नवराष्ट्र)
सातारा : भाजपकडून राज्यातील जिल्हाध्यक्षांची यादी समोर आली. यामध्ये सातारा जिल्ह्यात आमदार अतुल भोसले यांची नियुक्ती करण्यात आली. आगामी काळामध्ये पक्ष संघटना मजबूत करण्याबरोबर कार्यकर्त्यांना विश्वासात घेऊन त्यांना ताकद देण्याचे काम करणार आहोत . जिल्ह्यात मोठी विकास कामे आणण्याच्या दृष्टिकोनातून पक्ष संघटनेची ध्येयधोरणे राबवली जातील असा स्पष्ट विश्वास भारतीय जनता पार्टीचे सातारा जिल्हाध्यक्ष व कराड दक्षिणचे आमदार डॉक्टर अतुल भोसले यांनी व्यक्त केला.
शासकीय विश्रामगृहांमध्ये आमदार भोसले यांनी पत्रकारांशी संवाद साधला. यावेळी सार्वजनिक बांधकाम मंत्री शिवेंद्रसिंहराजे भोसले, आमदार मनोज घोरपडे, अण्णासाहेब पाटील आर्थिक विकास महामंडळाचे अध्यक्ष नरेंद्र पाटील,भाजपचे प्रदेश उपाध्यक्ष विक्रम पावस्कर , आनंदराव पाटील, डॉक्टर दिलीप येळगावकर,सातारा लोकसभा समन्वयक सुनील काटकर, माजी जिल्हाध्यक्ष धैर्यशील कदम,शहराध्यक्ष अविनाश खर्शीकर, माजी शहराध्यक्ष विकास गोसावी,राहुल शिवनामे इत्यादी यावेळी उपस्थित होते .
राजकीय बातम्या वाचण्यासाठी क्लिक करा
यावेळी आमदार अतुल भोसले म्हणाले की, “भाजपच्या सातारा जिल्हाध्यक्षपदी नियुक्त झाल्याबद्दल पक्षाच्या वतीने साताऱ्यात झालेल्या स्वागताने मी भारावलो आहे. भाजप पक्ष जिल्ह्यात मजबूत आहे. पक्षाचे चार आमदार येथे निवडून आले असून त्यापैकी दोन मंत्री आहेत पक्ष संघटना वाढवल्यामुळे लोकसभा व विधानसभा निवडणुकीत पक्षाला चांगले यश मिळाले. केंद्रात व राज्यात आपले सरकार असल्यामुळे यापुढील काळात आम्ही मोठी विकास कामे जिल्ह्यात आणणार आहोत. अध्यक्षपदाच्या माध्यमातून तळागाळातील कार्यकर्त्यांना ताकद देणे जुने पदाधिकारी कार्यकर्ते यांना विश्वासाने सोबत घेऊन वाटचाल करणार आहोत. राज्यात महायुतीची सत्ता असून मुख्यमंत्री देवेंद्र फडणवीस उपमुख्यमंत्री एकनाथ शिंदे व उपमुख्यमंत्री अजित पवार महायुतीचे नेते जो निर्णय घेतील तो मान्य आहे. भाजप कार्यकर्ता कामाने मोठा होतो . आता छत्रपती शिवाजी महाराजांचे वंशज खासदार उदयनराजे भोसले व बांधकाम मंत्री शिवेंद्रसिंहराजे भोसले यांचे आशीर्वाद माझ्या पाठीशी राहतील,” असे मत त्यांनी व्यक्त केले आहे.
महाराष्ट्रसंबंधित बातम्या वाचण्यासाठी क्लिक करा
जिल्हाध्यक्ष पदासाठी इतर नावे पुढे येत होती अचानक तुमचे नाव पुढे कसे आले ? या प्रश्नावर डॉक्टर भोसले म्हणाले “हा संशोधनाचा विषय आहे. मी जिल्हाध्यक्ष पदासाठी इच्छुक नव्हतो उलट व इतर कार्यकर्त्यांची नावे सुचवली होती. पण मुख्यमंत्री देवेंद्र फडणवीस यांच्या मार्गदर्शनाखाली पक्षाने मला जिल्हाध्यक्ष पदाची जबाबदारी दिली. जिल्ह्यात खासदार उदयनराजे, बांधकाम मंत्री शिवेंद्रसिंहराजे भोसले व ग्राम विकास मंत्री जयकुमार गोरे यांच्या नेतृत्वाखाली काम करणार आहे. आगामी स्थानिक स्वराज्य संस्थांच्या निवडणुकीबाबत मुख्यमंत्री देवेंद्र फडणवीस यांनी महायुती म्हणून निवडणूक लढवण्याची जाहीर केले आहे. आगामी पालिका निवडणुकीत विशेषतः साताऱ्यात कमळ चिन्ह की आघाडी हा विषय कसा सोडवणार यावर मी बोलू शकत नाही,” असे विधान अतुल भोसले यांनी केले. त्यांनी शिवेंद्रसिंहराजे यांच्याकडे पाहत हे वाक्य उच्चारल्यावर दोघेही दिलखुलास हसले. त्यावर ही प्रेस जिल्हाध्यक्ष आमदार अतुल भोसले यांची आहे त्यामुळे मी बोलू शकत नाही,” असे विधान बांधकाम मंत्री शिवेंद्रसिंहराजे यांनी केले .सातारा राजधानीत दोन्ही राजांचा निर्णय अंतिम असतो त्यामुळे पालिका निवडणुका संदर्भातील निर्णय दोन्ही राजेच घेतील त्यांचा जो निर्णय असेल तो आम्हाला मान्य असेल असे भोसले यांनी स्पष्ट केले.
