Praniti Shinde
सोलापूर : देशभरात विविध मुद्द्यांवरून राजकीय वर्तुळात वातावरण तापल्याचं चित्र दिसत आहे. एकीकडे काँग्रेसकडून सत्ताधाऱ्यांविरोधात तसेच निवडणूक आयोगाच्या कारभाराविरोधात आक्रमक भूमिका घेण्यात आली आहे. तर दुसरीकडे भाजपकडूनही काँग्रेससह विरोधकांवर अराजकता पसरवण्याचा आरोप करण्यात येत आहे. अश्यातच खासदार प्रणिती शिंदे यांनी सोलापुरातील विविध प्रश्नांवरून भाजप आणि सत्ताधाऱ्यांना चांगलंच धारेवर धरलं आहे.
प्रणिती शिंदे यांनी आज (मंगळवार, 3 नोव्हेंबर) पत्रकार परिषद घेत भाजपवर चांगलाच हल्लाबोल केला. यावेळी त्यांनी पंतप्रधान नरेंद्र मोदी, केंद्रीय गृहमंत्री अमित शहा यांच्यासह भाजपला थेट आव्हान देत ‘हिंमत असेल तर राजीनामा घेऊन बॅलेट पेपरवर निवडणुका घ्या,’ असं वक्तव्य केलं आहे.
यासह, सोलापुरात होणाऱ्या AI डेटा सेंटर प्रकल्पाला त्यांनी तीव्र विरोध दर्शवला. तसंच, सोलापूरमधील आरोग्य सुविधांवरदेखील भाष्य करत रुग्णांच्या आरोग्याचा प्रश्न उपस्थित केला. (Praniti Shinde on BJP)
सोलापुरात प्रस्तावित AI डेटा सेंटर प्रकल्पावर बोलताना प्रणिती शिंदे यांनी पाण्याच्या उपलब्धतेचा मुद्दा उपस्थित केला. या प्रकल्पासाठी मोठ्या प्रमाणात पाणी लागणार असल्याचा दावा करताना, आधीच सोलापूरकरांना सहा दिवसाआड पाणी मिळतंय, मग या प्रकल्पानंतर परिस्थिती काय असेल, असा सवाल त्यांनी केला.
उजनी परिसरातील जैवविविधतेवरही या प्रकल्पाचा परिणाम होण्याची भीती त्यांनी व्यक्त केली. प्रकल्पातून स्थानिक तरुणांना रोजगार मिळेलच याची खात्री नाही, असंही त्या म्हणाल्या. या प्रकल्पाच्या स्वरूपाबाबत आणि त्याच्या आर्थिक व्यवहारांबाबतही त्यांनी प्रश्न उपस्थित केले.
सोलापूरमधील आरोग्य सुविधांवर बोलताना १ नोव्हेंबरपासून महालॅब आणि डायलिसिस सेंटर बंद झाल्याचा आरोप प्रणिती शिंदे यांनी केला. सरकारकडे एक हजार कोटी रुपयांपेक्षा अधिक देणी असल्याचं सांगत त्यांनी रुग्णांच्या आरोग्याचा प्रश्न उपस्थित केला.
‘संविधान वाचवा, अराजकतेविरोधात या’ या घोषणेखाली सत्ताधारी मोर्चा काढत असल्यावरूनही त्यांनी टोला लगावला. तरुण विद्यार्थ्यांवर लाठीचार्ज करणारेच आता लोकशाही वाचवण्याच्या गोष्टी करत असल्याची टीका त्यांनी केली. मोर्चासाठी लोकांना आणण्याचं टार्गेट दिलं जात असल्याचा आरोपही त्यांनी केला.
SIR प्रक्रियेवर प्रश्न उपस्थित करत प्रणिती शिंदे यांनी ज्ञानेशकुमार यांच्या राजीनाम्याची मागणी केली. हिंमत असेल तर राजीनामा घेऊन बॅलेट पेपरवर निवडणुका घ्या, असं आव्हान त्यांनी दिलं. पंतप्रधान नरेंद्र मोदी यांनी राहुल गांधी यांच्यासोबत खुली चर्चा करावी, अशी मागणीही त्यांनी केली.
दरम्यान, AI डेटा सेंटरच्या मुद्द्यावर महाविकास आघाडी एकत्रितपणे भूमिका मांडणार असल्याचं प्रणिती शिंदे यांनी स्पष्ट केलं. त्यामुळे सोलापुरातील या प्रकल्पावरून आगामी काळात राजकीय संघर्ष आणखी पेटण्याची शक्यता आहे.
Ans: SIR प्रक्रियेवर आक्षेप घेत त्यांनी मुख्य निवडणूक आयुक्त ज्ञानेशकुमार यांच्या राजीनाम्याची मागणी केली. तसेच बॅलेट पेपरवर निवडणुका घेण्याचं आव्हान दिलं.
Ans: महालॅब आणि डायलिसिस सेंटर १ नोव्हेंबरपासून बंद झाल्याचा आरोप त्यांनी केला. सरकारी आरोग्य सुविधांसाठी निधी आणि थकीत देण्यांचा प्रश्नही त्यांनी उपस्थित केला.
Ans: या प्रकल्पासाठी मोठ्या प्रमाणात पाणी लागण्याची शक्यता असून सोलापूरच्या आधीच गंभीर असलेल्या पाणीप्रश्नावर त्याचा परिणाम होऊ शकतो, अशी भीती प्रणिती शिंदे यांनी व्यक्त केली. उजनी परिसरातील जैवविविधतेवरही परिणाम होण्याचा दावा त्यांनी केला.
.png "Videos"){kind=small}
