प्रसाद लाडांचं शरद पवारांना पत्र, रोहित पवारांच्या आरोपांवर भूमिका स्पष्ट करण्याची मागणी (Photo - X)
Prasad Lad on Rohit Pawar : महाराष्ट्राचे दिवंगत उपमुख्यमंत्री अजित पवार यांच्या विमान अपघाताचं प्रकरण आता चांगलंच तापताना दिसत आहे. या अपघाताच्या चौकशीवरून आमदार रोहित पवार यांनी उपस्थित केलेल्या प्रश्नांमुळे राजकीय वातावरण ढवळून निघालं आहे. रोहित पवारांनी पत्रकार परिषद घेत बहुचर्चित ‘मफलरमॅन’ कोण? याचा खुलासा करत मुख्यमंत्री देवेंद्र फडणवीस यांचे नाव घेतले. यामुळे मोठी खळबळ उडाली असून मोठा वाद निर्माण झाला आहे. पवारांच्या आरोपांवर आता राजकीय प्रतिक्रिया यायला सुरुवात झाली असून भाजप नेत्यांनी रोहित पवारांवर टीकेचा भडीमार केला आहे.
त्यातच आता भाजप आमदार प्रसाद लाड यांनीदेखील आक्रमक भूमिका घेतल्याचं दिसत आहे. प्रसाद लाड यांनी थेट राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांना पत्र लिहिलं आहे. रोहित पवारांनी केलेले आरोप ही पक्षाची अधिकृत भूमिका आहे का, असा थेट सवाल त्यांनी उपस्थित केला आहे.
रोहित पवार यांनी 16 नोव्हेंबर रोजी घेतलेल्या पत्रकार परिषदेत अजित पवारांच्या विमान अपघातासंदर्भात काही गंभीर प्रश्न उपस्थित केले होते. यावेळी त्यांनी दाखवलेल्या छायाचित्राच्या आधारे मुख्यमंत्री देवेंद्र फडणवीस यांच्याबाबतही संशय व्यक्त केला होता.
चित्रा वाघ यांचा रोहित पवारांवर संताप; मुख्यमंत्री फडणवीसांवरील आरोपांवर दिलं सडेतोड उत्तर
यावर प्रसाद लाड यांनी आक्षेप घेतला आहे. रोहित पवारांचे आरोप वैयक्तिक आहेत की त्यांच्या पक्षाची अधिकृत भूमिका आहे, हे शरद पवार आणि सुप्रिया सुळे यांनी स्पष्ट करावं, अशी मागणी त्यांनी पत्रातून केली आहे.
प्रति
ज्येष्ठ नेते मा. शरदचंद्र पवार साहेब,
आपण आणि खासदार सौ. सुप्रियाताई सुळे यांनी पत्रकार परिषद, अधिकृत निवेदन, पत्र किंवा सोशल मीडियाच्या माध्यमातून रोहित पवारांच्या कालच्या पत्रकार परिषदेबाबत पक्षाची अधिकृत भूमिका स्पष्ट करावी.
महाराष्ट्र राज्याचे लोकप्रिय मुख्यमंत्री मा. देवेंद्रजी फडणवीस यांच्याबाबत रोहित पवारांनी केलेले आरोप आपल्या पक्षाला मान्य नसतील, तर त्याचे स्पष्ट खंडन करावे. अन्यथा रोहित पवार यांनी मांडलेल्या भूमिकेला पक्षाचा पाठिंबा असल्याचे स्पष्टपणे सांगावे. @PawarSpeaks @supriya_sule
#Mumbai #Maharashtra #PrasadLad — Prasad Lad (@PrasadLadInd) November 17, 2026
प्रसाद लाड यांनी माध्यमांशी बोलताना रोहित पवारांवर जोरदार टीका केली. देवेंद्र फडणवीस यांच्यावर अशा प्रकारे आरोप करणं चुकीचं असल्याचं ते म्हणाले. फडणवीस यांनी अजित पवारांना नेहमीच मोठ्या भावाप्रमाणे साथ दिली. रोहित पवारांनी आपले आरोप सिद्ध करावेत किंवा जाहीर माफी मागावी, अशी मागणी करत लाड यांनी कायदेशीर नोटीस देण्याचाही इशारा दिला.
यावेळी प्रसाद लाड यांनी आक्रमक भूमिका घेत ‘प्रसिद्धीच्या हव्यासापोटी रोहित पवार जे करतायेत ते त्यांनी बंद करावं नाहीतर रस्त्यावर जिथे दिसतील तिथे त्यांचा कार्यक्रम करण्याचं काम आम्ही करू,’ असा इशारा त्यांनी दिला.
प्रसाद लाड यांनी पत्रातून शरद पवारांसमोर काही थेट प्रश्न ठेवले आहेत. रोहित पवारांची भूमिका पक्षाला मान्य नसेल तर तिचं स्पष्ट खंडन करावं आणि समर्थन असेल तर तेही जाहीर करावं, असं त्यांनी म्हटलं आहे.
त्यामुळे आता शरद पवार या पत्राला काय उत्तर देतात आणि पक्षाकडून अधिकृत भूमिका कधी मांडली जाते, याकडे राजकीय वर्तुळाचं लक्ष लागलं आहे. अजित पवारांच्या विमान अपघाताचं सत्य समोर येण्याची मागणी एका बाजूला सुरू असतानाच, दुसरीकडे या प्रकरणावरून राजकीय आरोप-प्रत्यारोपांचाही जोर वाढताना दिसत आहे.
Ans: रोहित पवार यांनी अजित पवारांच्या विमान अपघाताबाबत घेतलेल्या पत्रकार परिषदेत मुख्यमंत्री देवेंद्र फडणवीस यांच्याबाबत केलेल्या आरोपांवर राष्ट्रवादी काँग्रेस शरदचंद्र पवार पक्षाची अधिकृत भूमिका स्पष्ट व्हावी, यासाठी प्रसाद लाड यांनी पत्र लिहिलं आहे.
Ans: रोहित पवारांनी देवेंद्र फडणवीस यांच्याबाबत केलेल्या आरोपांचं समर्थन करण्याऐवजी ते सिद्ध करावेत किंवा जाहीर माफी मागावी, अशी मागणी प्रसाद लाड यांनी केली आहे. कायदेशीर नोटीस देण्याचाही इशारा त्यांनी दिला आहे.
Ans: रोहित पवारांनी पत्रकार परिषदेत मुख्यमंत्री देवेंद्र फडणवीस यांना मफलरमॅन म्हणत त्यांचे VSR कंपनीच्या मालकांसोबतचे छायाचित्र दाखवले.






