भाजप मंत्र्याच्या भावाचा होणार शिंदे गटात पक्षप्रवेश
महाराष्ट्राच्या राजकारणात पक्षांतरांचे सत्र सुरू असतानाच सातारा जिल्ह्यातून महायुतीतील अंतर्गत राजकारणाला नवा ट्विस्ट मिळण्याची शक्यता आहे. सातारा जिल्हा बँकेचे संचालक आणि ग्रामविकास मंत्री जयकुमार गोरे यांचे बंधू शेखर गोरे हे शिवसेना शिंदे गटात प्रवेश करणार असल्याची माहिती समोर आली आहे.
मिळालेल्या माहितीनुसार, 1 सप्टेंबर रोजी मुंबईत शेखर गोरे यांचा शिवसेना शिंदे गटात पक्षप्रवेश होणार आहे. या प्रवेशामुळे माण तालुक्यातील राजकीय समीकरणांवर परिणाम होण्याची शक्यता व्यक्त केली जात आहे.
शेखर गोरे यांच्या पक्षप्रवेशामागे गेल्या काही दिवसांपासूनची नाराजी कारणीभूत असल्याची चर्चा आहे. विधान परिषद निवडणुकीच्या पार्श्वभूमीवर मुख्यमंत्री देवेंद्र फडणवीस यांनी शेखर गोरे यांना कथितपणे काही आश्वासन दिले होते. मात्र, ते पूर्ण झाले नसल्यामुळे ते नाराज असल्याचे सांगितले जात आहे.
अखेर या नाराजीतून त्यांनी शिवसेना शिंदे गटात जाण्याचा निर्णय घेतल्याची माहिती आहे. त्यांच्या प्रवेशामुळे माण तालुक्यात शिंदेसेनेची संघटनात्मक ताकद वाढण्याची शक्यता आहे.
विशेष म्हणजे, यापूर्वी स्थानिक स्वराज्य संस्थांच्या निवडणुकांच्या पार्श्वभूमीवर अनेक नेत्यांनी शिवसेना शिंदे गटातून भाजपमध्ये प्रवेश केला होता. आता शेखर गोरे यांच्या माध्यमातून शिंदे गटाने भाजपला धक्का दिल्याची चर्चा सुरू झाली आहे.
शेखर गोरे हे मंत्री जयकुमार गोरे यांचे बंधू असल्याने या पक्षप्रवेशाला विशेष राजकीय महत्त्व प्राप्त झाले आहे. त्यामुळे हा केवळ स्थानिक पातळीवरील पक्षप्रवेश नसून महायुतीतील अंतर्गत राजकीय समीकरणांचा संदेश म्हणूनही त्याकडे पाहिले जात आहे.
‘राहुल गांधींचे महाराष्ट्रातील रिलाँचिंग करण्याचा प्रयत्न थांबवा,’ बावनकुळेंचा काँग्रेसला टोला
दरम्यान, शेखर गोरे यांच्या शिंदे गटातील प्रवेशानंतर माण तालुक्यातील राजकारणात कोणते बदल होतात आणि भाजपकडून यावर काय प्रतिक्रिया दिली जाते, याकडे आता लक्ष लागले आहे.
.png "Videos"){kind=small}
