अविनाश साबळे(फोटो-सोशल मीडिया)
World Athletics Championships : भारताला जागतिक ॲथलेटिक्स चॅम्पियनशिप(World Athletics Championships) स्पर्धेपूर्वी मोठा झटका बसला आहे. आशियाई खेळांचे सुवर्णपदक विजेते ३००० मीटर स्टीपलचेस धावपटू अविनाश साबळे या स्पर्धेतून बाहेर पडला आहे. साबळेची एसीएल (अँटेरियर क्रूसिएट लिगामेंट) शस्त्रक्रिया झाली आहे. या महिन्याच्या सुरुवातीला मोनाको डायमंड लीग दरम्यान त्यांना ही दुखापत झाली होती. हा भारतीय खेळाडू आता सप्टेंबरमध्ये होणाऱ्या जागतिक ॲथलेटिक्स चॅम्पियनशिपमधून बाहेर पडला आहे. सध्याचा आशियाई चॅम्पियन आणि २०२३ हांग्झो आशियाई खेळांचे सुवर्णपदक विजेता ३० वर्षीय साबळे यांची मुंबईतील एका रुग्णालयात शस्त्रक्रिया झाली. ही शस्त्रक्रिया प्रसिद्ध सर्जन डॉ. दिनशॉ पार्डीवाला यांच्या देखरेखीखाली करण्यात आली.
हेही वाचा : IND vs ENG : ओव्हल कसोटीत ‘हा’ स्टार प्लेइंग इलेव्हनमध्ये ठेवा.., माजी भारतीय फलंदाज पार्थिव पटेलचे मत
ACL शस्त्रक्रिया बरी होण्यासाठी सहसा किमान सहा महिने लागतात. याचा अर्थ असा की साबळे टोकियो जागतिक अजिंक्यपद स्पर्धेतून (१३-२१ सप्टेंबर) बाहेर राहील आणि पुढच्या वर्षीच मैदानावर परतू शकतील. मंगळवारी सोशल मीडिया पोस्टमध्ये साबळे यानी लिहिले की, मोनाको डायमंड लीग दरम्यान, माझ्या उजव्या गुडघ्याला एसीएल आणि मेनिस्कस दुखापत झाली. कोकिलाबेन रुग्णालयात डॉ. दिनों पार्डीवाला आणि त्यांच्या टीमच्या तज्ज्ञ देखरेखीखाली मी माझी शस्त्रक्रिया पूर्ण केली, ज्यांचे आभार मानण्यासाठी माझ्याकडे शब्द नाहीत. रुग्णालयाच्या बेडवरून एक फोटो शेअर करताना त्यांनी लिहिले की, हे माझ्यासाठी एक मोठा धक्का आहे, परंतु मी कठोर परिश्रम करण्याचा आणि अधिक मजबूत परत येण्याचा दृढनिश्चय केला आहे. तुमच्या पाठिंब्याबद्दल धन्यवाद. मी अधिक मजबूत आणि लवकर परत येईन.
११ जुलै रोजी मोनाको डायमंड दरम्यान पडल्यानंतर राष्ट्रीय विक्रमधारक साबळे यांना दुखापत झाली. त्याच्या पुढे धावणारा एक खेळाडू पाण्यात उडी मारताना तोल गमावला आणि पडला. यामुळे साबळेही अडखळला. त्यानंतर तो लंगडा होताना दिसला. २०२३ मध्ये झालेल्या हांग्झू आशियाई क्रीडा स्पर्धेपासून साबळे यांना वासराच्या दुखापतीमुळे त्रास होत आहे. या दुखापतीतून बरे झाल्यानंतर, तो जागतिक अजिंक्यपद स्पर्धेत चांगली कामगिरी करेल अशी अपेक्षा होती.
हेही वाचा : WCL 2025 : भारत-पाकिस्तान सामना रद्द झाल्यास काय असेल पर्याय? जाणून घ्या कोणाला बसेल फटका?
साबळेचा राष्ट्रीय विक्रम आठ मिनिटे ०९.९१ सेकंद आहे. या वर्षी १६ एप्रिल रोजी झियामेन डायमंड लीगमध्ये तो १३ व्या स्थानावर राहिला.
मोनाकोमध्ये डीएनएफ (शर्यत पूर्ण न करणे) आधी चीनमधील केकियाओ येथे आठव्या स्थानावर होता. जागतिक अजिंक्यपद स्पर्धेच्या तयारीसाठी क्रीडा मंत्रालयाने साबळेच्या अमेरिकेत प्रशिक्षणाला मान्यता दिली होती. परंतु शस्त्रक्रियेमुळे तो टोकियो येथे होणाऱ्या या स्पर्धेत सहभागी होऊ शकणार नाही. आशियाई विजेती आणि राष्ट्रीय विक्रमधारक १०० मीटर अडथळा शर्यत धावपटू ज्योती याराजीलाही दुखापत झाल्यानंतर एसीएल शस्त्रक्रिया करावी लागली.
