मंगळवार, 3 नोव्हेंबर 2026
IND vs NZ : न्यूझीलंडमध्ये टीम इंडियाची डाळ शिजत नाही! सचिनचा विक्रम, कुंबळेची गोलंदाजीत कमाल, सौजन्य : आयएएनएस
भारत आणि न्यूझीलंड (IND vs NZ) यांच्यातील पाच वनडे सामन्यांच्या मालिकेला बुधवारपासून सुरुवात होत आहे. मालिकेतील पहिला सामना ऑकलंड येथे खेळवला जाणार आहे. टी-20 मालिकेतील भारतीय संघाची कामगिरी पाहता वनडे मालिकेतही चुरशीची लढत अपेक्षित आहे. मात्र, न्यूझीलंडच्या भूमीवर वनडे क्रिकेटमध्ये भारतीय संघाचा इतिहास फारसा समाधानकारक नाही. सचिन तेंडुलकर, वीरेंद्र सेहवाग आणि अनिल कुंबळे यांच्या नावावर या मैदानांवर काही खास विक्रमांची नोंद आहे.
भारत आणि न्यूझीलंड यांच्यात आतापर्यंत 123 वनडे सामने झाले आहेत. त्यापैकी भारताने 63, तर न्यूझीलंडने 52 सामने जिंकले आहेत. सात सामन्यांचा निकाल लागला नाही, तर एक सामना बरोबरीत सुटला आहे.
मात्र, न्यूझीलंडमध्ये भारतीय संघाची कामगिरी वेगळीच राहिली आहे. दोन्ही संघांमध्ये न्यूझीलंडच्या मैदानांवर झालेल्या 45 वनडे सामन्यांपैकी भारताला केवळ 14 सामन्यांत विजय मिळवता आला आहे. 26 सामन्यांत पराभव झाला असून, एक सामना बरोबरीत सुटला आणि चार सामन्यांचा निकाल लागला नाही.
न्यूझीलंडमध्ये भारताचा वनडेतील सर्वोच्च धावसंख्या 8 मार्च 2009 रोजी क्राइस्टचर्च येथे नोंदवली गेली. या सामन्यात भारतीय संघाने चार विकेट्सच्या मोबदल्यात 392 धावा केल्या होत्या. याउलट, 31 जानेवारी 2019 रोजी भारतीय संघाचा डाव अवघ्या 92 धावांत आटोपला होता. न्यूझीलंडने भारताविरुद्ध मायदेशात 5 फेब्रुवारी 2020 रोजी सहा विकेट्स गमावत 348 धावा केल्या होत्या.
आधी गोलंदाजांची झोप उडवली अन् आता सर्व क्रिकेटविश्वाची! Glenn Maxwell ची निवृत्तीची घोषणा
न्यूझीलंडच्या भूमीवर भारताकडून सर्वाधिक वनडे धावा करण्याचा विक्रम मास्टर ब्लास्टर सचिन तेंडुलकरच्या नावावर आहे. सचिनने 8 मार्च 2009 रोजी क्राइस्टचर्च येथे 133 चेंडूंत 16 चौकार आणि पाच षटकारांच्या मदतीने नाबाद 163 धावांची खेळी केली होती.
या यादीत वीरेंद्र सेहवाग दुसऱ्या क्रमांकावर आहे. त्याने 11 मार्च 2009 रोजी हॅमिल्टन येथे 74 चेंडूंत नाबाद 125 धावा केल्या होत्या.
न्यूझीलंडच्या भूमीवर यजमानांविरुद्ध भारताकडून सर्वोत्तम गोलंदाजीचा विक्रम अनिल कुंबळेच्या नावावर आहे. कुंबळेने 30 मार्च 1994 रोजी वेलिंग्टन येथे 10 षटकांत 33 धावा देत पाच विकेट्स मिळवल्या होत्या.
न्यूझीलंडविरुद्ध भारताकडून सर्वाधिक वनडे धावा करण्याच्या बाबतीत विराट कोहली आघाडीवर आहे. 2010 ते 2026 या कालावधीत खेळलेल्या 36 सामन्यांत त्याने सात शतके आणि दहा अर्धशतकांच्या मदतीने 1,894 धावा केल्या आहेत. त्याची सर्वोत्तम खेळी नाबाद 154 धावांची आहे. आगामी पाच सामन्यांच्या मालिकेत विराटला न्यूझीलंडविरुद्ध दोन हजार वनडे धावांचा टप्पा पूर्ण करण्याची संधी आहे.
न्यूझीलंडविरुद्ध वनडे क्रिकेटमध्ये भारताकडून सर्वाधिक विकेट्स घेण्याचा विक्रम जवागल श्रीनाथच्या नावावर आहे. त्याने 30 सामन्यांत 51 विकेट्स घेतल्या आहेत. अनिल कुंबळे 31 सामन्यांत 39 विकेट्ससह दुसऱ्या, तर मोहम्मद शमी 16 सामन्यांत 38 विकेट्ससह तिसऱ्या क्रमांकावर आहे.
