माजी कर्णधार मोहम्मद अझरुद्दीन घेणार तेलंगण राज्याच्या मंत्रीपदाची शपथ(फोटो-सोशल मीडिया)
Telangana Cabinet Minister Azharuddin Congress: माजी क्रिकेटपटू आणि एमएलसी मोहम्मद अझरुद्दीन यांची तेलंगण सरकारमध्ये मंत्री म्हणून शपथ घेणार आहे. त्यांचा शपथविधी शुक्रवारी, ३१ ऑक्टोबर रोजी राजभवन येथे पार पडणार आहे. या निर्णयाचे मुख्य कारण म्हणजे ११ नोव्हेंबर रोजी होणारी ज्युबिली हिल्स विधानसभा जागेची पोटनिवडणूक हे ठरले आहे. या मतदारसंघात अंदाजे ३०% मुस्लिम मतदार असल्याने झरुद्दीनच्या प्रवेशामुळे पक्षाला मोठा फायदा होणार असल्याची काँग्रेसला आशा आहे.
सध्या, तेलंगणा काँग्रेस सरकारमध्ये एक देखील मुस्लिम मंत्री नाही. यामुळे मुस्लिम समुदायाचे प्रतिनिधित्व सरकारकडे नसल्याचा आरोप वारंवार केला जात आहे. अझरुद्दीनच्या समावेशामुळे ही पोकळी भरून निघणार असल्याचे बोलले जात आहे. अझरुद्दीनच्या समावेशामुळे, रेवंत रेड्डी मंत्रिमंडळात आता एकूण १६ मंत्री होणार आहेत. जे राज्यातील कमाल १८ आहेत.
ज्युबिली हिल्स विधानसभा मतदारसंघात अंदाजे ३.९० लाख मतदार संख्या आहे. त्यापैकी १.२० ते १.४० लाख संख्या ही मुस्लिम समुदायची आहे. याचा अर्थ प्रत्येक तिसरा मतदार मुस्लिम समुदायाचा आहे. म्हणूनच मुस्लिम मतांचा निकालावर महत्त्वपूर्ण प्रभाव पाडणारा आहे. अझरुद्दीनला मंत्री म्हणून नियुक्त करून काँग्रेसकडून मुस्लिम समुदायावरील आपला विश्वास मजबूत करण्याचा प्रयत्न करण्यात आला आहे.
अझरुद्दीन यांनी २०२३ च्या विधानसभा निवडणुकीत ज्युबिली हिल्समधून काँग्रेस उमेदवार म्हणून निवडणूक लढवली होती. परंतु बीआरएस उमेदवार मगंती गोपीनाथ यांच्याकडून त्यांना १६,३३७ मतांनी पराभव पत्करावा लागला. बीआरएसला ८०,५४९ मते मिळाली, तर काँग्रेस (अझरुद्दीन) ला ६४,२१२ मते मिळाली होती.
अझरुद्दीन यांनी २००९ मध्ये मुरादाबाद येथून काँग्रेस खासदार म्हणून आपल्या राजकीय कारकिर्दीची सुरुवात केली होती. २०१४ मध्ये त्यांनी राजस्थानमधील टोंक-सवाई माधोपूर मतदारसंघातून निवडणूक लढवली होती, परंतु त्यांना पराभव पत्करावा लागला होता. नंतर २०१८ मध्ये त्यांना तेलंगणा काँग्रेसचे कार्यवाहक अध्यक्ष म्हणून नियुक्त केले गेले होते.
