रविवार, 1 नोव्हेंबर 2026
Pakistan Won Tri Series
ट्राय सीरीजच्या अंतिम सामन्यात श्रीलंकेने प्रथम फलंदाजी केली. कामिंदू मेंडिसने शानदार फलंदाजी करत १२८ चेंडूंमध्ये १३१ धावा केल्या. पवन रत्नायकेनेही ७७ धावा केल्या तर अविष्का फर्नांडोने ३८ धावा केल्या. यामुळे श्रीलंकेला ५० षटकांत ८ विकेट्स गमावून ३२५ धावांपर्यंत पोहोचण्यास मदत झाली. पाकिस्तानकडून कर्णधार शाहीन आफ्रिदी, नसीम शाह, हरिस रौफ आणि सलमान अली आगा यांनी प्रत्येकी २ विकेट्स घेतले.
पाकिस्तानला विजयासाठी ३२६ धावांची गरज होती. पाकिस्तानची सुरुवात निराशाजनक होती. त्यांनी अवघ्या १४ धावांत दोन विकेट्स गमावले. फखर जमान आणि साद बेग यांनी एक शानदार भागीदारी केली. साद बेगने ७५ चेंडूंमध्ये ७४ धावा केल्या, तर फखर जमानने ९९ चेंडूंमध्ये १२६ धावांची शानदार खेळी केली.
खालच्या फळीत फलंदाजी करणाऱ्या अराफत मिन्हासने ३१ चेंडूंमध्ये धडाकेबाज ६१ धावा केल्या, तर हसन नवाझने ३७ धावा केल्या. यामुळे पाकिस्ताने ४८.३ षटकांत ३२६ धावांचा यशस्वीपणे पाठलाग केला. पाकिस्तानने श्रीलंकेवर ३ विकेट्स राखून दणदणीत विजय मिळवला. या विजयासह, पाकिस्तानने २०२६ च्या ट्राय सीरीजचा अंतिम सामना जिंकून ट्रॉफी जिंकली.
१३ जुलै २००२ रोजी भारताने नॅटवेस्ट मालिकेच्या अंतिम सामन्यात इंग्लंडला पराभूत केले. भारतीय क्रिकेटच्या इतिहासातील हा एक अत्यंत ऐतिहासिक विजय आहे. लॉर्ड्सवर खेळल्या गेलेल्या अंतिम सामन्यात, भारतीय संघाने ३२६ धावांचे लक्ष्य गाठताना इंग्लंडला हरवले. या सामन्यात युवराज सिंग आणि मोहम्मद कैफ यांनी एक अविस्मरणीय भागीदारी केली.
पुरुषांच्या एकदिवसीय अंतिम सामन्यातील हा आतापर्यंतचा सर्वात मोठा धावांचा पाठलाग होता. श्रीलंकेविरुद्ध ३२६ धावांचे लक्ष्य पूर्ण करून पाकिस्तानने भारताच्या विक्रमाची बरोबरी केली. पुरुषांच्या एकदिवसीय अंतिम सामन्यातील सर्वात मोठ्या धावांच्या पाठलागाचा संयुक्त विक्रम आता पाकिस्तान आणि भारताच्या नावावर आहे.
