पुण्याचा १९ वर्षीय सार्थक चव्हाण ठरला नॅशनल चॅम्पियन! मद्रास इंटरनॅशनल सर्किटवर ऐतिहासिक विजेतेपद!

स्पेनमधील सर्किटो डी जेरेझ-अँजेल निएटो येथे झालेल्या एफआयएम मोटोज्युनिअर जागतिक अजिंक्यपद स्पर्धेच्या चौथ्या शर्यतीत सार्थकने सहावा क्रमांक मिळविला.

• मद्रास सर्किटवर सार्थक चव्हाणची धडाकेबाज बाजी
• एमआरएफ इंडियन नॅशनल रेसिंग चॅलेंजमध्ये सुपर स्पोर्ट ३०१-४०० सीसी गटाचे विजेतेपद
• सार्थकने शेवटच्या फेरीत धाडसी चाली करत मिळवला विजय 

पुणे : मद्रास इंटरनॅशनल सर्किटवर झालेल्या ‘एमआरएफ इंडियन नॅशनल रेसिंग चॅलेंज’ स्पर्धेत पुण्याच्या १९ वर्षीय सार्थक चव्हाणने धडाकेबाज कामगिरी करत ‘सुपर स्पोर्ट ३०१-४०० सीसी’ गटाचे विजेतेपद पटकावले. पेट्रोनास टीव्हीएस रेसिंग संघाकडून सहभागी झालेल्या सार्थकने शेवटच्या फेरीत धाडसी चाली करत नाट्यमय विजय मिळविला. १६ ऑगस्टला झालेल्या सहा फेऱ्यांच्या शर्यतीत सार्थक बहुतांश वेळ तिसऱ्या स्थानावर होता. त्याच्यासमोर बंगळुरूचा सहकारी चिरंत विश्वनाथ आणि हैदराबादचा राहिल पिल्लारीसेट्टी होते. अखेरच्या फेरीत सार्थकने दोघांनाही मागे टाकत आघाडी घेतली. टर्न-११ येथे सार्थकचा (Sports) चिरंतशी संपर्क झाला. मात्र, त्याने प्रसंगावधान राखत स्वतःला सावरले आणि अव्वल स्थान कायम ठेवले. चिरंतला दुसऱ्या, तर गतवर्षीचा प्रो-स्टॉक राष्ट्रीय विजेता राहिलला तिसऱ्या स्थानावर समाधान मानावे लागले.

टर्न-२ येथे रक्षित दवे आणि सॅव्हियन साबू यांच्यात अपघात झाला. सुदैवाने या अपघातात कोणालाही दुखापत झाली नाही. या विजयामुळे सार्थकने पेट्रोनास टीव्हीएस रेसिंग संघाला स्पर्धेत अव्वल स्थान मिळवून देण्यात महत्त्वाची भूमिका बजावली.सार्थकने यापूर्वीही आंतरराष्ट्रीय स्तरावर उल्लेखनीय कामगिरी केली आहे. एशिया रोड रेसिंग चॅम्पियनशिपच्या टीव्हीएस रेसिंग इंटरनॅशनल चॅम्पियनशिप श्रेणीतील मलेशिया येथे झालेल्या पहिल्या फेरीत त्याने पोडियम मिळविले होते. त्यानंतर मे महिन्यात थायलंडमधील बुरिराम येथील चांग इंटरनॅशनल सर्किटवरील दुसऱ्या फेरीत तो विजेतेपदाचा प्रमुख दावेदार ठरला होता.

इंडोनेशियात तिरंगा फडकावण्यासाठी पुण्याचा सार्थक चव्हाण सज्ज! Asia Road Racing मध्ये पुन्हा रचणार इतिहास?

स्पेनमधील सर्किटो डी जेरेझ-अँजेल निएटो येथे झालेल्या एफआयएम मोटोज्युनिअर जागतिक अजिंक्यपद स्पर्धेच्या चौथ्या शर्यतीत सार्थकने सहावा क्रमांक मिळविला. जीपीस्टॉक युरोपियन चॅम्पियनशिपच्या अंतिम गुणतालिकेत पहिल्या सहामध्ये स्थान मिळविणारा तो पहिला भारतीय रेसिंगपटू ठरला. त्याच्या या कामगिरीमुळे भारतीय मोटरस्पोर्ट्स क्षेत्रात नवा विक्रम नोंदविला गेला.

MotoJunior World Championship स्पर्धेत पुण्याचा सार्थक चव्हाण होणार सहभागी; ‘टॉप फाईव्ह‌’मध्ये येण्याचे लक्ष्य

निकाल
सुपर स्पोर्ट ३०१-४०० सीसी, शर्यत एक :

१. सार्थक चव्हाण, पुणे, पेट्रोनास टीव्हीएस रेसिंग – ११ मिनिटे ०१.९७१ सेकंद
२. चिरंत विश्वनाथ, बेंगळुरू, पेट्रोनास टीव्हीएस रेसिंग – ११ मिनिटे ०२.२६४ सेकंद
३. राहिल पिल्लारीसेट्टी, हैदराबाद, आरएसीआर कॅस्ट्रॉल पॉवर१ – ११ मिनिटे ०२.६०९ सेकंद