Trump Jinping meeting : ट्रम्प करत आहेत गुप्तपणे जिनपिंग यांना भेटण्याची तयारी; दक्षिण कोरियामध्ये एकत्र येण्याची योजना ( फोटो सौजन्य : सोशल मीडिया)
Xi Jinping Trump meeting : आंतरराष्ट्रीय राजकारणात पुन्हा एकदा मोठा भूचाल घडवणारी घटना घडण्याची चिन्हे दिसत आहेत. अमेरिकेचे माजी राष्ट्राध्यक्ष डोनाल्ड ट्रम्प ऑक्टोबरच्या अखेरीस दक्षिण कोरियाला भेट देऊ शकतात आणि तेथे चीनचे अध्यक्ष शी जिनपिंग तसेच उत्तर कोरियाचे सर्वोच्च नेते किम जोंग उन यांच्यासोबत एका ऐतिहासिक बैठकीसाठी ते सज्ज होत आहेत. आशिया-पॅसिफिक आर्थिक सहकार्य (APEC) शिखर परिषद ही या भेटीचे केंद्रबिंदू ठरणार आहे.
ही बैठक फक्त राजकीय दृष्टीनेच नव्हे तर जागतिक व्यापार, संरक्षण आणि आण्विक सुरक्षेच्या घडामोडींना नवे वळण देणारी ठरू शकते. गेल्या काही महिन्यांपासून ट्रम्प आणि चीन यांच्यातील तणाव वाढत चालला आहे, विशेषतः व्यापार शुल्क आणि भू-राजकीय समीकरणांमुळे. तरीही, ट्रम्प जिनपिंग यांना गुप्तपणे भेटण्याची तयारी करत असल्याचे संकेत मिळत आहेत.
काही आठवड्यांपूर्वी ट्रम्प आणि शी जिनपिंग यांच्यात फोनवर संवाद झाला होता. त्यावेळी जिनपिंग यांनी ट्रम्प आणि त्यांच्या पत्नीला चीनला येण्यासाठी आमंत्रित केले होते. ट्रम्प यांनी त्याला सकारात्मक प्रतिसाद दिला, मात्र दोन्ही नेत्यांच्या भेटीची तारीख निश्चित झालेली नव्हती. आता APEC शिखर परिषद हीच त्यांच्या भेटीसाठी मंच ठरणार आहे असे वाटते.
जागतिक घडामोडी संबंधित बातम्या वाचण्यासाठी येथे क्लिक करा : Robinson R66 Crash : अमेरिकेत हेलिकॉप्टर कोसळले; मिनियापोलिस विमानतळाजवळ भीषण दुर्घटना, सर्व प्रवाशांचा मृत्यू
ट्रम्प यांनी त्यांच्या पहिल्या कार्यकाळात किम जोंग उन यांच्यासोबत तीन वेळा भेट घेतली होती. त्या भेटींनी जगभरातील माध्यमांचे लक्ष वेधून घेतले होते. आता पुन्हा एकदा किम यांच्याशी चौथी भेट होण्याची शक्यता निर्माण झाली आहे. मात्र किम APEC परिषदेला सहभागी होणार की नाही याबाबत अजून स्पष्टता नाही. तरीही, दक्षिण कोरियाचे अध्यक्ष ली जे म्युंग यांनी ट्रम्प आणि किम यांच्या भेटीचा प्रस्ताव पुढे केला आहे.
गेल्या काही काळापासून अमेरिका आणि चीन यांच्यातील संबंधांमध्ये तीव्र तणाव दिसून येत आहे. व्यापार धोरण, शुल्क, तैवानचा प्रश्न आणि रशिया-भारताशी चीनची वाढती जवळीक यामुळे परिस्थिती अधिक गुंतागुंतीची बनली आहे. अलीकडेच ट्रम्प यांनी सोशल मीडियावर भारत, रशिया आणि चीनच्या एकत्रित फोटोवर भाष्य करताना, “असे दिसते की आपण भारत आणि रशिया गमावले आहेत,” अशी टीका केली होती. तरी पुढच्याच दिवशी त्यांनी भारत-अमेरिका मैत्री ‘विशेष आणि अनोखी’ असल्याचे सांगत सौम्य भूमिका घेतली.
ट्रम्प यांच्या दक्षिण कोरिया दौऱ्याचा एक मोठा उद्देश अमेरिकेत आर्थिक गुंतवणूक आकर्षित करणे असा असल्याचे व्हाईट हाऊसच्या अधिकाऱ्यांनी स्पष्ट केले आहे. APEC शिखर परिषदेच्या निमित्ताने ट्रम्प विविध आशियाई देशांशी व्यापार, संरक्षण सहकार्य आणि आण्विक धोरणांवर चर्चेत सहभागी होऊ शकतात. या सर्व घडामोडी अमेरिकेच्या अर्थकारणासाठी तसेच जागतिक सुरक्षिततेसाठी निर्णायक ठरू शकतात.
जागतिक घडामोडी संबंधित बातम्या वाचण्यासाठी येथे क्लिक करा : जागतिक राजकारणाचे वारे नक्की कोणत्या दिशेला? ट्रम्प म्हणाले ‘कायमचे मित्र’, मोदीजींनीही दिले ‘असे’ धडाकेबाज उत्तर
आर्थिक दृष्टिकोनातून – अमेरिका-चीन व्यापार युद्धामुळे जागतिक बाजारपेठा हादरल्या आहेत. अशा वेळी दोन्ही नेत्यांची भेट सकारात्मक सिग्नल देऊ शकते.
संरक्षण आणि आण्विक सहकार्य – उत्तर कोरियाच्या अणु कार्यक्रमावर चर्चा होण्याची शक्यता आहे.
जागतिक भू-राजकारण – भारत, रशिया आणि चीन यांची समीकरणे बदलत असताना अमेरिका कुठे उभी राहते हे या बैठकीवर अवलंबून राहील.
ट्रम्प, शी जिनपिंग आणि किम जोंग उन यांची संभाव्य बैठक ही केवळ एक राजनैतिक घटना न राहता, जागतिक पातळीवर नवे समीकरण घडवू शकणारी ठरू शकते. दक्षिण कोरियातील ऑक्टोबर अखेरची ही शिखर परिषद जागतिक राजकारणातील एक नवे पर्व लिहिणारी ठरेल का, हे पाहणे उत्सुकतेचे ठरेल.
