मंगळवार, 20 ऑक्टोबर 2026
सोने-खरेदीसाठी तूफान गर्दी (फोटो- सोशल मिडिया )
गेल्या आठ-दहा दिवसांत सोन्याचे दर नियंत्रणात आल्याने खरेदीदारांचा उत्साह द्विगुणित झाला आहे. भविष्यात दर पुन्हा वाढण्याची शक्यता गृहीत धरून अनेकांनी पितृपंधरवड्यापासूनच दागिन्यांचे आगाऊ बुकिंग सुरू केले होते. दसऱ्याच्या दिवशी ऐनवेळी होणारी गर्दी टाळण्यासाठी ग्राहकांनी आधीच पसंती नोंदवून ठेवली असून, मुहूर्तावर प्रत्यक्ष डिलिव्हरी घेण्याकडे कल आहे.
सध्या बाजारात २४ कॅरेट सोन्याचा दर १ लाख ४७ हजार रुपये, तर २२ कॅरेट सोन्याचा दर १ लाख ३५ हजार ५०० ते १ लाख ३६ हजार रुपयांच्या घरात आहे. चांदीचा दर प्रति किलो २ लाख ११ हजार रुपये असून प्रमाणित हिऱ्यांचे दर कॅरेटनुसार ५५ हजार ते १ लाख रुपयांपर्यंत उपलब्ध आहेत.
यंदाच्या सणासुदीत ग्राहकांकडून पारंपरिक धाटणीच्या दागिन्यांना सर्वाधिक मागणी नोंदवली जात आहे:
सोन्याचे दागिने: मोठ्या व लहान आकारातील डिझायनर मंगळसूत्रे, अँटिक नेकलेस, टेम्पल ज्वेलरी, पारंपरिक बांगड्या, पाटल्या, सरदार कडे आणि गंठण यांना पसंती मिळत आहे.
कमी वजनातील दागिने: दैनंदिन वापरासाठी व बजेटनुसार तयार केलेल्या ‘लाइटवेट’ दागिन्यांचे विविध प्रकार उपलब्ध आहेत.
चांदी आणि भेटवस्तू: चांदीच्या मूर्ती, नाणी, आकर्षक भांडी तसेच पैंजण, जोडवी आणि चांदीची घड्याळे मोठ्या प्रमाणावर खरेदी केली जात आहेत.
हिरे आणि नाणी: गुंतवणुकीसाठी सोन्या-चांदीची नाणी आणि प्रमाणित हिऱ्यांच्या दागिन्यांचीही लक्षणीय विक्री होत आहे.
सराफा व्यावसायिकांकडून आकर्षक ऑफर्स आणि योजना
ग्राहकांना आकर्षित करण्यासाठी शहरातील सराफ व्यावसायिकांनी विविध सवलतींची घोषणा केली आहे:
दागिन्यांच्या घडणावळीवर (मेकिंग चार्जेस) विशेष सवलत.
आगाऊ बुकिंगवर निश्चित बक्षिसे आणि लकी ड्रॉ योजना.
जुन्या सोन्याच्या बदल्यात नवीन दागिने घेण्याची विशेष सुविधा.
सोन्याची नाणी आणि निवडक भेटवस्तूंवर थेट सूट.
हॉलमार्क आणि पावती तपासूनच खरेदी करा
सणासुदीच्या काळात खरेदी करताना ग्राहकांनी सजग राहण्याचे आवाहन सराफा असोसिएशनने केले आहे. दागिने खरेदी करताना केवळ दरांवर अवलंबून न राहता दागिन्यांवर असलेला हॉलमार्क आणि ६ अंकी अल्फान्युमेरिक ‘एचयूआयडी’ क्रमांक आवर्जून तपासावा. याशिवाय जीएसटीसह अधिकृत बिल, सोन्याचा अचूक प्रति ग्रॅम दर आणि मजुरीचा तपशील समजून घेऊनच अंतिम व्यवहार करावा.
Dasara 2026: दसऱ्याच्या शुभ मुहूर्तावर घरी आणा ‘या’ वस्तू; सुख-समृद्धीसाठी मानल्या जातात शुभ
“गेल्या आठ-दहा दिवसांत सोन्याच्या दरात घसरण झाल्यामुळे बाजारात उत्साहाचे वातावरण आहे. दरवाढ थांबल्याने आणि दर कमी झाल्याने ग्राहकांकडून प्रत्यक्ष खरेदी आणि बुकिंगला जोरदार प्रतिसाद मिळतो आहे. यंदा ग्राहकांचा कल विशेषतः टेम्पल आणि अँटिक दागिन्यांकडे अधिक दिसून येत आहे.”
— गणेश कटारीया, संचालक, सुनीता ज्वेलर्स
