फोटो सौजन्य - Social Media
एका NRI महिलेने दोन वर्षांपूर्वी भारतातील १६ लाख रुपये वार्षिक पगाराची नोकरी सोडून कनाडात जाण्याचा निर्णय घेतला. तिला वाटलं होतं की परदेशात आयुष्य अधिक सुखाचं आणि सुरक्षित असेल. मात्र, वास्तव वेगळंच निघालं. आता ती आपला निर्णय चुकीचा ठरल्याचं मानते आणि त्याबद्दल सोशल मीडियावर मोकळेपणाने बोलत आहे. माध्यमांत प्रसिद्ध झालेल्या वृत्तानुसार, २८ वर्षीय ही महिला सध्या कनाडात राहते आणि एका रिमोट जॉबद्वारे वार्षिक ८२,००० कॅनडियन डॉलर्स म्हणजेच सुमारे ५० लाख रुपये कमवते. ऐकायला ही रक्कम खूप मोठी वाटते, विशेषतः भारतातील तरुणांसाठी. पण या महिलेनुसार तिच्या अनुभव आणि कौशल्याच्या तुलनेत ही सॅलरी खूपच कमी आहे. शिवाय, तिच्या क्षेत्रात संधीही फारच मर्यादित आहेत.
महिलेनं आपल्या पोस्टमध्ये सांगितलं की, गेल्या दोन वर्षांत तिला आपल्या प्रोफेशनल फील्डमध्ये फारच कमी संधी मिळाल्या आणि त्या देखील यशस्वी ठरल्या नाहीत. त्यामुळे तिला आता तिच्या निर्णयाचा पश्चात्ताप होत आहे. जर ती सोशल मीडियावर आपली कथा शेअर केली नसती, तर तिच्या भावना कुणालाच समजल्या नसत्या.
तिच्या पोस्टवर अनेकांनी प्रतिक्रिया दिल्या आहेत. काहींनी तिला भारतात परत येण्याचा सल्ला दिला आहे, तर काहींनी सांगितलं की कनाडात राहून नवीन कौशल्ये आत्मसात करावीत आणि चांगली संधी मिळवावी. एक युजर म्हणाला, “कनाडाची आर्थिक परिस्थिती सध्या फारशी चांगली नाही. पुढची २-४ वर्षंही अशीच असतील. त्यामुळे भारतात परत येणं हा एक पर्याय असू शकतो.”
तर दुसऱ्या युजरने म्हटलं, “भारतात परत येणं म्हणजे सर्व प्रश्न सुटतीलच असं नाही. कनाडात राहूनच नवीन स्किल्स शिकावीत, क्षेत्र बदलावं आणि नव्या संधी मिळवाव्यात.” या घटनेवरून एक गोष्ट स्पष्ट होते. परदेशातील आयुष्य नेहमीच स्वप्नवत नसतं. निर्णय घेताना फक्त पगाराची आकडेवारी नव्हे, तर वैयक्तिक समाधान, करिअर ग्रोथ आणि जीवनशैली यांचाही विचार करणं तितकंच महत्त्वाचं आहे.
