फोटो सौजन्य - Social Media
हा अभ्यासक्रम एकूण ८ महिन्यांचा असून, औद्योगिक सांडपाणी शून्यावर कसे आणता येईल, पाण्याचा पुनर्वापर, सांडपाणी शुद्धीकरणाच्या आधुनिक पद्धती, पर्यावरणीय नियम व त्यांची अंमलबजावणी यासारख्या महत्त्वाच्या बाबींवर सखोल प्रशिक्षण दिले जाणार आहे. वाढत्या औद्योगिकीकरणामुळे पाण्याचे प्रदूषण ही मोठी समस्या बनत असताना, ZLD टेक्नॉलॉजीचा वापर करून पाण्याचा एक थेंबही वाया न जाऊ देता पुनर्वापर कसा करता येईल, याचे तांत्रिक व व्यावहारिक ज्ञान या अभ्यासक्रमातून मिळणार आहे.
या अभ्यासक्रमासाठी सिव्हिल, इलेक्ट्रिकल, मेकॅनिकल, केमिकल, पर्यावरण अभियांत्रिकी, बायोटेक्नॉलॉजी या शाखांतील बॅचलर पदवीधारक विद्यार्थी अर्ज करू शकतात. तसेच रसायनशास्त्र किंवा पर्यावरण विज्ञान विषयातील दोन वर्षांची एमएससी पदवी असलेले उमेदवारही या कोर्ससाठी पात्र आहेत. त्यामुळे अभियांत्रिकी तसेच विज्ञान शाखेतील विद्यार्थ्यांसाठी हा अभ्यासक्रम खुला आहे.
प्रवेश प्रक्रिया ही पूर्णपणे गुणवत्ताधारित असून उमेदवारांच्या शैक्षणिक पात्रतेतील गुणांच्या आधारे गुणवत्ता यादी तयार केली जाणार आहे. कोणतीही स्वतंत्र प्रवेश परीक्षा नसून, विद्यार्थ्यांच्या शैक्षणिक कामगिरीला प्राधान्य देण्यात येणार आहे. त्यामुळे पात्र उमेदवारांनी आवश्यक कागदपत्रांसह वेळेत अर्ज करणे अत्यंत महत्त्वाचे आहे.
अर्ज प्रक्रिया ही ऑनलाइन पद्धतीने करण्यात येणार असून, इच्छुक विद्यार्थ्यांनी जाधवपूर विद्यापीठाच्या अधिकृत वेबसाइटवरून अर्ज सादर करावा. या अभ्यासक्रमासाठी अर्ज करण्याची अंतिम तारीख ३० डिसेंबर २०२५ आहे. पर्यावरण अभियांत्रिकी, सस्टेनेबिलिटी, इंडस्ट्रियल वॉटर मॅनेजमेंट आणि ग्रीन टेक्नॉलॉजी क्षेत्रात करिअर घडवू इच्छिणाऱ्या विद्यार्थ्यांसाठी हा कोर्स अत्यंत उपयुक्त ठरणार आहे.
अभ्यासक्रमाची सविस्तर माहिती, प्रवेश अटी व अन्य तपशीलांसाठी विद्यार्थ्यांनी दिलेल्या अधिकृत संकेतस्थळाला भेट द्यावी. बदलत्या काळात पर्यावरणपूरक तंत्रज्ञानाचे महत्त्व वाढत असताना, झिरो लिक्वीड डिस्चार्ज टेक्नॉलॉजीतील हे विशेष प्रशिक्षण भविष्यातील करिअरसाठी मजबूत पाया घालणारे ठरेल, असे तज्ज्ञांचे मत आहे.
