तासगावमध्ये बनावट नोटांचा सुळसुळाट; सर्वसामान्यांची डोकेदुखी वाढली, कारवाईकडे सबंधित यंत्रणेचे दुर्लक्ष

तासगाव/ मिलिंद पोळ:  तासगांव  शहर तालुक्यात बनावट नोटांचा सुळसुळाट झाला आहे. कोणाकडून तरी आलेली बनावट नोट सर्वसामान्य नागरिकांची डोकेदुखी ठरत आहे. त्यांनाच राष्ट्रीयीकृत  व खाजगी बँकेच्या अधिकाऱ्यांकडून अपमान आर्थिक तोटाही सहन करावा लागत आहे. बनावट नोटांची चौकशी होऊन संबंधितांवर कारवाई आवश्यक असताना संबंधित  यंत्रणेचेच याकडे दुर्लक्ष आहे. तासगांव तालुक्यात  गेल्या अनेक महिन्यांपासून बनावट नोटा आढळण्याचे प्रमाण वाढले आहे.

बनावट नोटा वापरणारी टोळी तासगाव तालुक्यात कार्यरत आहे का.? अशी शंका सर्वसामान्यांकडून व्यक्त केली जात आहे. सुटे पैसे मागण्याचा बनाव करून खोटी नोट देऊन व्यापाऱ्यांना फसवले जाते. शासकीय कर्मचाऱ्याप्रमाणे अपटूडेट पोशाख असलेले हे लोक बाजारात बनावट नोटा चालवत आहेत.

बनावट नोट सामान्य माणसाला लगेच ओळखू येत नाही. बँकेमध्ये पैसे भरण्यासाठी गेल्यानंतर अनेकांना तुमची ही नोट बनावट आहे असे अधिकारी सांगतात. त्या नोटेवर लाल रंगाच्या पेनने फुली मारून संबंधिताचे नाव पत्ता घेऊन बनावट नोट जमा करण्याचे काम बँकेचे अधिकारी करतात. राष्ट्रीयकृत बँकेतील अधिकारी तर अशी नोट फाडूनच टाकतात. ग्राहकाने नोट परत मागितली, तरी दिली जात नाही. त्याचा आर्थिक तोटा होत असतानाच अधिकारी अरेरावीच्या भाषेत ‘पंचनामा करून फिर्याद देऊ का’, असा दम देतात. त्यामुळे सामान्य माणूस निमूटपणे हा प्रकार सहन करतो.

सामान्यपणे रोजच्या व्यवहाराच्या निमित्ताने एखादी तरी नोट बनावट येतेच. बँकेचे अधिकारी नोट जमा करून घेतात हा सर्वसामान्य माणसावरील अन्याय तर आहेच, पण आर्थिक तोट्यावरून बँक अधिकाऱ्यांनी सर्वांसमोर केलेला अपमान जिव्हारी लागणारा असतो.   पोलिसांनी व्यापाऱ्यांना सर्वसामान्य नागरिकांना होणारा त्रास वाचवण्यासाठी बनावट नोटा बाजारात आणणाऱ्या टोळीचा तपास करावा, अशी मागणी नागरिकांनी केली आहे. बनावट नोटांना आळा घातला नाही, तर गुन्हेगारांचे चांगले फावून निरपराध लोक अडचणीत येण्याची शक्यता आहे.

बनावट नोटांमध्ये पाचशे व शंभर रुपयांच्या  नोटांचा समावेश आहे. तासगाव तालुक्यातील विविध गावांमधील भरणाऱ्या आठवडा  बाजारामध्ये या बनावट नोटा  आणणारी टोळी फिरते, असा संशय व्यक्त होत आहे. पोलिस यंत्रणेकडे या गुन्हेगारांवर कारवाई करावी, अशी मागणी होत आहे.

हेही वाचा: पुणे शहरात बनावट नोटा आढळल्याने खळबळ; गुजरातमधील एकाला अटक

पुणे शहरात बनावट नोटा आढळल्याने खळबळ

पुणे शहराच्या मध्यवर्ती भाग असलेल्या रस्ता पेठेत बनावट नोटा बाळगणाऱ्या एकाला समर्थ पोलिसांनी अटक केली आहे. अटक करण्यात आलेला आरोपी हा गुजरातमधील जामनगरचा आहे. त्याच्याकडून ५०० रुपये दराच्या १४२ आणि शंभर रुपयांच्या ६१ अशा ७७ हजार रुपयांच्या बनावट आणि हुबेहूब दिसणाऱ्या नोटा जप्त करण्यात आल्या आहेत. यामुळे एकच खळबळ उडाली आहे. गौरव रामप्रताप सविता ( वय २४, रा.जामनगर, गुजरात) असे अटक केलेल्या आरोपीचे नाव आहे. याबाबत पोलीस शिपाई लखन गंगाधर शेटे यांनी फिर्याद दिली आहे.