शनिवार, 24 ऑक्टोबर 2026
संग्रहित फोटो
२२ ऑक्टोबर रोजी रात्री ८ च्या सुमारास तपास पथकातील पोलीस शिपाई अक्षय सिताफ यांना गोपनीय बातमीदारामार्फत माहिती मिळाली की, आदित्य शेलार हा लाल रंगाच्या स्विफ्ट कारमधून टी. सी. कॉलेज परिसरात बेकायदेशीर अग्निशस्त्र बाळगून फिरत आहे. या माहितीच्या आधारे प्रभारी परिविक्षाधीन पोलीस उपअधीक्षक मनीषा ओमासे यांच्या नेतृत्वाखालील पथकाने तातडीने सापळा रचला. रात्री साडेआठ वाजण्याच्या सुमारास ८ नंबर ग्राउंडजवळील मोरया पॅलेस इमारतीसमोरील रस्त्यावर संशयित कार अडवून पंचांसमक्ष तपासणी करण्यात आली.
सर्व मुद्देमाल केला जप्त
तपासणीदरम्यान चालकाच्या सीटजवळ एक गावठी पिस्तूल आणि त्याच्या मॅगझीनमध्ये १ जिवंत काडतूस मिळून आले. तसेच शेलारची अंगझडती घेतली असता त्याच्या जॅकेटच्या खिशात आणखी २ जिवंत काडतुसे सापडली. शस्त्र बाळगण्याचा कोणताही वैध परवाना त्याच्याकडे नसल्याचे स्पष्ट झाल्यानंतर पोलिसांनी २५ हजार रुपयांचे पिस्तूल, १ हजार २०० रुपयांची तीन काडतुसे आणि २ लाख रुपयांची कार असा एकूण २ लाख २६ हजार २०० रुपयांचा ऐवज जप्त केला. याप्रकरणी बारामती शहर पोलीस ठाण्यात भारतीय हत्यार कायद्यान्वये गुन्हा दाखल करण्यात आला आहे.
शस्त्राचा मूळ स्रोत शोधण्याचे आव्हान
प्राथमिक चौकशीदरम्यान हे पिस्तूल मयूर मोरे (रा. मेडद, ता. बारामती) याच्याकडून आणल्याची कबुली संशयित आरोपीने दिली आहे. हे शस्त्र कोणत्या कारणासाठी आणले होते आणि यामागे मोठे रॅकेट कार्यरत आहे का, याचा सखोल तपास पोलीस करत आहेत. सदर कारवाई पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम यांच्या मार्गदर्शनाखाली व पोलीस निरीक्षक श्रीशैल चिवडशेट्टी यांच्या समन्वयाने करण्यात आली. पथकातील पोलीस हवालदार क्षीरसागर, अभिजीत कांबळे, पोलीस शिपाई कवितके आणि अक्षय सिताफ यांनी यात सहभाग घेतला. पुढील तपास पोलीस हवालदार ज्ञानदेव क्षीरसागर करत आहेत.
Ans: आदित्य शेलार याच्याकडून गावठी पिस्तूल, तीन जिवंत काडतुसे आणि मारुती स्विफ्ट कार असा एकूण २ लाख २६ हजार २०० रुपयांचा मुद्देमाल जप्त केला.
Ans: २२ ऑक्टोबर रोजी रात्री साडेआठच्या सुमारास बारामतीतील ८ नंबर ग्राउंडजवळील मोरया पॅलेस इमारतीसमोरील रस्त्यावर पोलिसांनी सापळा रचून ही कारवाई केली.
Ans: प्राथमिक चौकशीत आदित्य शेलार याने हे पिस्तूल मेडद, ता. बारामती येथील मयूर मोरे याच्याकडून आणल्याचे सांगितले. पिस्तूल कशासाठी आणले होते आणि त्यामागे आणखी कोणाचा सहभाग आहे का, याचा पोलीस तपास करत आहेत.
