Crime News: २० रुपये मागितले… आईने नकार दिला; शाळेच्या वाटेवर निघालेल्या नैतिकचा धक्कादायक अंत

सकाळी शाळेत जाण्यासाठी घरातून निघताना नैतिकने आईकडे फक्त २० रुपये मागितले होते... आईने पैसे देण्यास नकार दिल्यानंतर तो काहीही न बोलता घराबाहेर पडला. मात्र, काही वेळाने तो शेतात गंभीर अवस्थेत आढळला आणि रुग्णालयात डॉक्टरांनी त्याला मृत घोषित केले.

• २० रुपये न मिळाल्याने नाराज झालेला आठवीतील नैतिक शेतात आढळला
• रुग्णालयात नेले असता डॉक्टरांनी मृत घोषित केले
• मृत्यूचे नेमके कारण अस्पष्ट; देवलापार पोलिसांचा तपास सुरू

नागपूर : नागपूर जिल्ह्यातील पथरई येथे आठवीत शिकणाऱ्या विद्यार्थ्याचा शेतात मृत्यू झाल्याची हृदयद्रावक घटना समोर आली आहे. नैतिक हा नवजीवन विद्यालयात इयत्ता आठवीत शिकत होता. मंगळवारी सकाळी शाळेत जाण्यासाठी घरातून बाहेर पडल्यानंतर काही वेळाने तो शेतात आढळून आला. कुटुंबीयांनी त्याला तातडीने रुग्णालयात दाखल केले; मात्र डॉक्टरांनी तपासून त्याला मृत घोषित केले. मिळालेल्या माहितीनुसार, नैतिकचे आई-वडील रोजंदारीवर मजुरी करून कुटुंबाचा उदरनिर्वाह करतात. मंगळवारी सकाळी नेहमीप्रमाणे नैतिक शाळेत जाण्यासाठी तयार झाला. घराबाहेर पडताना त्याने आईकडे २० रुपये मागितले. मात्र हे पैसे कशासाठी हवेत, अशी विचारणा आईने केली असता त्याने कारण सांगितले नाही. त्यामुळे आईने पैसे देण्यास नकार दिला. यानंतर नैतिक नाराज होऊन काहीही न बोलता घरातून शाळेच्या दिशेने निघून गेला. मात्र काही वेळाने तो शेतात गंभीर अवस्थेत आढळून आला. कुटुंबीयांनी तातडीने त्याला रुग्णालयात नेले. उपचारापूर्वीच डॉक्टरांनी त्याला मृत घोषित केले.

हेही वाचा : लग्नाला अवघे चार महिने अन् नवविवाहितेने संपवले जीवन; पतीने फसवल्याचा माहेरच्यांचा आरोप

नेमके कारण काय?

२० रुपये न मिळाल्याने नैतिक नाराज झाला होता. त्याच कारणातून त्याने हे टोकाचे पाऊल उचलले असावे, असा प्राथमिक अंदाज व्यक्त केला जात आहे. मात्र, त्याच्या मृत्यूमागील नेमके कारण अद्याप स्पष्ट झालेले नाही. या घटनेची माहिती मिळताच देवलापार पोलिसांनी तपास सुरू केला आहे. नैतिकच्या मृत्यूमागे नेमके कारण काय होते, याचा पोलिसांकडून शोध घेतला जात आहे. या घटनेमुळे कुटुंबीयांवर दुःखाचा डोंगर कोसळला असून परिसरात हळहळ व्यक्त होत आहे.