शुक्रवार, 11 सप्टेंबर 2026
धक्कादायक ! तिसरी, चौथीतील तब्बल 14 विद्यार्थिनींसोबत शिक्षकाचे गैरवर्तन; अश्लील व्हिडिओ दाखवायचा अन्... (संग्रहित फोटो)
वाशिम : तालुक्यातील काटा येथील जिल्हा परिषद प्राथमिक शाळेत तिसरी व चौथीतील विद्यार्थिनींसोबत गैरवर्तन केल्याच्या गंभीर आरोपावरून शिक्षकाला वाशिम ग्रामीण पोलिसांनी अटक केली. या प्रकरणात तब्बल १४ विद्यार्थिनींनी संबंधित शिक्षकाकडून गैरवर्तन झाल्याची माहिती दिल्याचे समोर आले असून, याप्रकरणी विनयभंगाचा गुन्हा दाखल करण्यात आला.
दिलीप बोरकर असे आरोपी शिक्षकाचे नाव आहे. गेल्या सहा महिन्यांपासून विद्यार्थिनींसोबत अश्लील वर्तन केल्याचा आरोप त्याच्यावर करण्यात आला आहे. या प्रकाराची माहिती शाळेतील एका शिक्षिकेला मिळाल्यानंतर प्रकरण उघडकीस आले. मिळालेल्या माहितीनुसार, काही विद्यार्थिनी घाबरलेल्या अवस्थेत संबंधित शिक्षिकेकडे गेल्या. त्या रडत असल्याने शिक्षिकेने त्यांना विश्वासात घेऊन विचारपूस केली. त्यावेळी विद्यार्थिनींनी शिक्षकाकडून झालेल्या गैरवर्तनाची माहिती दिली. शिक्षिकेने तत्काळ पालक तसेच शिक्षण विभागातील वरिष्ठ अधिकाऱ्यांना या प्रकाराची माहिती दिली. घटना समोर आल्यानंतर संतप्त ग्रामस्थांनी आरोपी शिक्षकाला पकडून पोलिसांच्या ताब्यात दिले.
Bihar : ६ महिन्यांची गरोदर असतानाही हत्या करून जाळले, पोलिसांकडून जळत्या चितेतून ६ अवशेष जप्त
यावेळी ग्रामस्थांनी त्याला मारहाण केल्याचेही सांगण्यात आले. पोलिसांच्या प्राथमिक तपासात आणखी काही विद्यार्थिनींसोबतही अशाच प्रकारचे गैरवर्तन झाले असण्याची शक्यता व्यक्त करण्यात येत आहे. संबंधित विद्यार्थिनींची ओळख गोपनीय ठेवण्यात आली. वाशिम ग्रामीण पोलिसांनी आरोपी शिक्षकाविरुद्ध पोक्सो कायद्यासह विनयभंगाच्या कलमांतर्गत गुन्हा दाखल करून त्याला अटक केली.
अश्लील चित्रफित दाखवल्याचा आरोप
काटा येथील जिल्हा परिषद शाळेतील शिक्षक दिलीप बोरकर याच्यावर तिसरी व चौथीतील विद्यार्थिनींसोबत गैरवर्तन केल्याचा गंभीर आरोप आहे. गेल्या सात ते आठ महिन्यांपासून तो विद्यार्थिनींना मोबाइलवर अश्लील चित्रफित दाखवत असल्याचे समोर आले आहे. अयोग्य स्पर्श करून गैरवर्तन तसेच कोणाला सांगितल्यास शाळेत येऊ न देण्याची धमकी दिल्याचा आरोपही आहे. शिक्षिकेच्या सतर्कतेमुळे हा प्रकार उघडकीस आला.
