Crime News : फसवणूक करणाऱ्या दोघांना ठोेकल्या बेड्या, सायबर पोलिसांची कारवाई

सायबर गुन्हेगारांनी पिंपरी-चिंचवड मधील एका व्यक्तीला फॉरेक्स ट्रेडिंग मध्ये गुंतवणूक केल्यास जास्त नफा होतो, असे सांगून फसवणूक करणाऱ्या दोघांना पोलिसांनी अटक केली आहे.

सौजन्य - सोशल मिडीया

Follow Us:

Follow Us:

पिंपरी : सायबर गुन्हेगारांनी पिंपरी-चिंचवड मधील एका व्यक्तीला फॉरेक्स ट्रेडिंग मध्ये गुंतवणूक केल्यास जास्त नफा होतो, असे सांगून त्यांची १.१२ कोटींची फसवणूक केली होती. याबाबत पिंपरी-चिंचवड सायबर पोलीस ठाण्यात गुन्हा दाखल केल्यानंतर सायबर पोलिसांनी या प्रकरणातील म्यूल अकाउंट हॅन्डलर आणि त्याच्या साथीदाराला मीरा-भाईंदर मधून अटक केली. मितेश राजूभाई व्होरा (३४, अहमदाबाद), केपिन अजितकुमार मेहता (४१, अहमदाबाद) अशी अटक केलेल्या आरोपींची नावे आहेत. मितेश हा गुजरात मधून म्यूल अकाउंट घेऊन केपिन याला पाठवत होता. केपिन हा फसवणुकीची रक्कम अशा म्यूल अकाउंटवर घेत होता.

जानेवारी २०२५ मध्ये पिंपरी-चिंचवड सायबर पोलीस ठाण्यात एक कोटी १२ लाख ९६ हजार ३८० रुपयांची सायबर फसवणूक झाल्याबाबत गुन्हा दाखल करण्यात आला. फिर्यादी व्यक्तीला सायबर आरोपींनी वेगवेगळ्या कंपन्यांमधून बोलत असल्याचे सांगितले. तसेच फॉरेक्स ट्रेडिंग मध्ये गुंतवणूक केल्यास चांगला नफा मिळेल, असे आमिष दाखवले. आरोपींनी सुरुवातीला फिर्यादीकडून एक कोटी ३० लाख २३ हजार ५१५ रुपये घेतले. फिर्यादीचा विश्वास बसण्यासाठी त्यांना काही रक्कम परत केली. मात्र एक कोटी १२ लाख ९६ हजार ३८० रुपये परत न करता त्यांची फसवणूक केली.

गुन्हा दाखल झाल्यानंतर सायबर पोलिसांनी तपास सुरु केला. तांत्रिक विश्लेषणात आरोपी अहमदाबाद गुजरात येथे असल्याचे समजले. त्यानुसार सायबर पोलिसांची पथके आरोपींच्या मागावर रवाना झाली. म्यूल अकाउंट मधील पैसे रोख स्वरूपात बँकेतून काढणारा मितेश व्होरा याला पोलिसांनी अटक केली. त्यानंतर त्याचा साथीदार मीरा भाईंदर येथे आला असल्याची माहिती मिळाल्याने पोलिसांनी केपिन मेहता याला मीरा-भाईंदर मधून अटक केली. या गुन्ह्यात आणखी आरोपींचा सहभाग असल्याचे निष्पन्न झाले आहे.

हे सुद्धा वाचा : पुण्यात भीषण अपघात; कात्रजवळ दुचाकी खांबावर आदळून दोघांचा मृत्यू

ही कारवाई पोलीस निरीक्षक रविकिरण नाळे, सहायक पोलीस निरीक्षक प्रवीण स्वामी, उपनिरीक्षक सागर पोमण, वैभव पाटील, प्रकाश कातकाडे, पोलीस अंमलदार हेमंत खरात, दीपक भोसले, श्रीकांत कबुले, स्वप्नील खणसे, नितेश बिच्चेवार, अतुल लोखंडे, सौरभ घाटे, सुरज शिंदे, जयश्री माळी, सरिता तुपे, शुभांगी ढोबळ, धरती वाडेकर, ईश्वरी आंबरे, वैशाली बर्गे, धनश्री प्रधान, मोनिका बिच्चेवार, दीपाली चव्हाण यांनी केली.

हे सुद्धा वाचा : ‘ती’, सुरक्षित नाही! सव्वा महिन्यात सव्वाशे विनयभंग अन् अत्याचाराच्या तब्बल…

Web Title: The cyber police have arrested two fraudsters and taken action nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com