पोलीस ठाण्यात घुसून महिलेचा राडा; पोलिसाला मारहाण, हातातील नखांनी केली इजा
कराड : कराड शहर पोलीस ठाण्यात अटकेत असलेल्या आरोपीच्या पत्नीने लॉकअपमध्ये प्रवेश करण्याचा प्रयत्न करत महिला पोलिसाला मारहाण केल्याची घटना घडली. याप्रकरणी संबंधित महिलेवर गुन्हा दाखल करण्यात आला आहे. याबाबत पोलीस कॉन्स्टेबल सोनाली प्रताप पिसाळ यांनी फिर्याद दिली. त्यानंतर हा गुन्हा दाखल करण्यात आला आहे.
पोलिसांनी दिलेल्या फिर्यादीनुसार, सोमवारी सायंकाळी साडेसातच्या सुमारास त्या गुन्हे प्रकटीकरण शाखेत कामानिमित्त आल्या होत्या. त्यावेळी एका गुन्ह्यात अटकेत असलेल्या आरोपीला पोलीस ठाण्याच्या लॉकअपमध्ये ठेवण्यात आले होते. आरोपीच्या पत्नीने पोलीस ठाण्यात येऊन ‘माझ्या नवऱ्याला आत्ताच सोडा’ असा आरडाओरडा करत लॉकअपमध्ये जाण्याचा प्रयत्न केला.
पहाऱ्यावर असलेले पोलिस कॉन्स्टेबल दडस व इतर कर्मचारी यांनी तिला समजावण्याचा प्रयत्न केला. मात्र, ती ऐकण्यास तयार नव्हती. या गोंधळात संबंधित महिलेने महिला पोलीस सोनाली पिसाळ यांना शिवीगाळ करत हाताने मारहाण केली. तिच्या नखांनी पिसाळ यांच्या चेहऱ्यावर व डोळ्याजवळ ओरखडे काढून दुखापत केली.
दरम्यान, महिला अधिकारी व कर्मचाऱ्यांनी तिला ताब्यात घेऊन शांत केले. जखमी पिसाळ यांच्यावर कराड येथील कॉटेज हॉस्पिटलमध्ये उपचार करण्यात आले. याप्रकरणी कराड शहर पोलीस ठाण्यात संबंधित महिलेवर गुन्हा नोंद करण्यात आला आहे.
पुण्यात पोलिसाला काठीने बेदम मारहाण
दुसऱ्या एका घटनेत, पुण्यात पोलिसाला मारहाण झाली. काटकर हे शहर पोलिस दलात पोलिस कर्मचारी असून, त्यांची नेमणूक गुन्हे शाखेच्या युनिट तीनमध्ये आहे. रात्री एकच्या सुमारास ते कामावरुन घरी निघाले होते. लॉ कॉलेज रस्त्याने दुचाकीने जात असताना त्यांचा दुसऱ्या दुचाकीला धक्का लागला. त्यावरून त्यांच्यात वादविवाद झाले. काटकर हे साध्या गणवेशात होते. दुचाकीस्वारांनी त्यांनाच दादागिरी करत त्यांच्याशी वाद घालून त्यांना काठीने बेदम मारहाण केली. मारहाणीनंतर दोघेही घटनास्थळावरून पसार झाले.
हेदेखील वाचा : पुण्यात गुंडाराज ! पोलिसाला काठीने बेदम मारहाण; मध्यरात्री नेमकं काय घडलं?
