शुक्रवार, 6 नोव्हेंबर 2026
(फोटो सौजन्य- सोशल मिडिया)
Rohit Sharma: भारताचा माजी कर्णधार आणि स्टार क्रिकेटपटू रोहित शर्माने अखेर टीव्हीच्या दुनियेत पाऊल ठेवलं आहे. बहुप्रतिक्षित ‘फॅमिली फुल हाऊस विद रोहित शर्मा’ या शोचा प्रीमियर शनिवारी सोनी एंटरटेनमेंट टेलिव्हिजन आणि सोनी लिव्हवर झाला. टेलिव्हिजन होस्ट म्हणून रोहितचा हा पहिलाच मोठा शो असून, पहिल्याच एपिसोडमध्ये त्याचा मजेशीर आणि बिनधास्त अंदाज प्रेक्षकांना पाहायला मिळाला.
क्रिकेटच्या मैदानावर आपल्या आक्रमक खेळासाठी ओळखला जाणारा रोहित या शोमध्ये मात्र एका वेगळ्याच भूमिकेत दिसला. पाहुण्यांशी संवाद साधताना त्याचा मिश्कील अंदाज, विनोदबुद्धी आणि सहज वावर प्रेक्षकांच्या पसंतीस उतरला.
रोहितचा हा हलका-फुलका अंदाज यापूर्वी फार कमी वेळा पाहायला मिळाला होता. त्यामुळे टीव्हीवरील त्याच्या या नव्या भूमिकेची प्रेक्षकांमध्ये आधीपासूनच उत्सुकता होती.
‘फॅमिली फुल हाऊस विद रोहित शर्मा’च्या पहिल्या एपिसोडमध्ये क्रिकेट आणि मनोरंजन क्षेत्रातील अनेक लोकप्रिय चेहरे सहभागी झाले. श्रेयस अय्यर, शार्दुल ठाकूर, अभिषेक नायर आणि अभिनेता कुणाल खेमू यांची उपस्थिती एपिसोडमध्ये पाहायला मिळाली.
रोहित आणि या पाहुण्यांमधील संवाद हा एपिसोडचा विशेष आकर्षण ठरला. क्रिकेटशी संबंधित किस्से, गप्पा, विनोद आणि गेम्समुळे शोमध्ये मनोरंजनाची रंगत वाढली.
सोशल मीडियावर रोहितच्या अंदाजाचं कौतुक
शोचा पहिला एपिसोड प्रसारित झाल्यानंतर सोशल मीडियावर रोहित शर्माच्या चाहत्यांकडून आणि टीव्ही प्रेक्षकांकडून प्रतिक्रिया पाहायला मिळाल्या. अनेकांनी त्याच्या नॅचरल स्क्रीन प्रेझेन्स आणि कॉमिक टाइमिंगचं कौतुक केलं.
क्रिकेटच्या मैदानापेक्षा वेगळ्या अंदाजात रोहितला पाहण्याची संधी मिळाल्याने चाहत्यांनीही उत्साह व्यक्त केला. एपिसोडमधील काही क्लिप्स सोशल मीडियावर शेअर होत असून, रोहितच्या नव्या भूमिकेची चर्चा रंगली आहे.
कधी आणि कुठे पाहता येणार शो?
‘फॅमिली फुल हाऊस विद रोहित शर्मा’ हा शो सोनी एंटरटेनमेंट टेलिव्हिजन आणि सोनी लिव्हवर शनिवारी आणि रविवारी रात्री ९.३० वाजता प्रसारित होतो. गेम्स, सेलिब्रिटींसोबत गप्पा आणि मनोरंजनाचा मिलाफ असलेल्या या शोमधून रोहितचा क्रिकेटच्या मैदानाबाहेरील नवा अंदाज प्रेक्षकांना पाहायला मिळणार आहे.
