Top Marathi News Today Live : बिहार निवडणुकीच्या पहिल्या टप्प्यासाठी मतदानाला सुरुवात; 121 जागांसाठी 1314 उमेदवार मैदानात
Marathi Breaking Live Updates : बिहारमध्ये विधानसभा निवडणुका होणार आहे. पंतप्रधान नरेंद्र मोदी आज बिहार मुख्यमंत्री महिला रोजगार योजनेचा शुभारंभ करणार आहेत. या योजनेअंतर्गत, राज्यातील 7.5 दशलक्ष महिलांच्या बँक खात्यात 10000 रुपये थेट हस्तांतरित केले जातील. या रकमेचे एकूण 7500 कोटी रुपये हे वितरण महिलांना उपजीविकेद्वारे सक्षम करण्याच्या प्रयत्नांचा एक भाग असल्याचे सांगण्यात आले आहे.
पंतप्रधान या महिला लाभार्थ्यांना संबोधित करतील. योजनेअंतर्गत सुरुवातीला १०००० रुपयांचे अनुदान दिले जाईल, त्यानंतरच्या टप्प्यात दोन लाख रुपयांपर्यंत अतिरिक्त आर्थिक मदत अपेक्षित आहे. ही योजना समुदाय-आधारित असेल, ज्यामध्ये बचत गटांशी संबंधित सामुदायिक संसाधनांद्वारे सहभागी महिलांना आर्थिक मदत तसेच प्रशिक्षण दिले जाईल.
26 Sep 2025 05:56 PM (IST)
देशातील प्रमुख गुंतवणूकदार, विकासक आणि मोठ्या प्रमाणात शॉपिंग सेंटर्सचे संचालक असलेल्या लेक शोअरने ठाण्यातील विवियाना मॉलचे लेक शोअर ठाणे असे नाव बदलल्याची अधिकृत घोषणा आज केली. डेस्टिनेशन रिटेल मालमत्तेच्या पोर्टफोलिओमध्ये एक स्वतंत्र ओळख निर्माण करण्याच्या लेक शोअरच्या प्रवासात हे रीब्रँडिंग हा एक महत्त्वाचा टप्पा आहे.
26 Sep 2025 05:51 PM (IST)
उत्तर प्रदेशातील बरेली जिल्ह्यात पुन्हा एकदा निदर्शने झाल्याचे पाहायला मिळत आहे. मौलाना तौकीर रझा यांचे समर्थक शुक्रवारी “आय लव्ह मुहम्मद” या घोषणेच्या समर्थनार्थ जिल्हाधिकारी कार्यालयात जमले होते. अधिकाऱ्यांना निवेदन देण्यासाठी आले असताना गर्दीतील एका व्यक्तीने पोलिसांवर दगडफेक केली, ज्यामुळे गोंधळ निर्माण झाला. प्रत्युत्तरात पोलिसांनी लाठीमार केला आणि गर्दी पांगवली. शहर पोलीस अधीक्षक आशुतोष शिवम यांनी अश्रुधुराच्या नळकांड्या फोडल्या. या गोंधळात अनेक लोक जखमी झाल्याचे वृत्त आहे. घटनास्थळी तणावपूर्ण परिस्थिती आहे.
26 Sep 2025 05:36 PM (IST)
भारतीय शेअर बाजाराचा घसरणीचा कल सुरूच आहे. गुरुवारी सलग पाचव्या सत्रात बेंचमार्क निर्देशांक निफ्टी-५० आणि सेन्सेक्स घसरले. शुक्रवारी (२६ सप्टेंबर) आठवड्यातील शेवटचे व्यापार सत्र घसरणीसह बंद झाले. दरम्यान, या काळात एनएसई निफ्टी-५० मध्ये ५३३ अंकांनी म्हणजेच २.१ टक्के घसरण झाली आहे. अमेरिकेचे अध्यक्ष डोनाल्ड ट्रम्प यांनी ब्रँडेड औषधांवर १००% कर लादण्याचा निर्णय शेअर बाजारावर नकारात्मक परिणाम करत आहे. परिणामी, शुक्रवारी निफ्टी फार्मा निर्देशांक २.५% पेक्षा जास्त घसरला.
26 Sep 2025 05:29 PM (IST)
भारताच्या युवा क्रिकेट संघाने पुन्हा एकदा शानदार कामगिरी करत ऑस्ट्रेलिया संघाला अक्षरशः धूळ चारली आहे. युवा टीम इंडियाने तीन सामन्यांच्या वनडे मालिकेत ऑस्ट्रेलियाचा ३-० ने सूपडा साफ केला आहे.
26 Sep 2025 05:25 PM (IST)
काँग्रेस खासदार आणि विरोधी पक्षनेते राहुल गांधी यांना अलाहाबाद हायकोर्टाने मोठा झटका दिला आहे. सप्टेंबर २०२४ मध्ये अमेरिकेच्या दौऱ्यावर असताना शीख समुदायाबद्दल त्यांनी केलेल्या एका विधानासंदर्भात दाखल झालेली याचिका फेटाळून लावून हायकोर्टाने हा निर्णय दिला.
26 Sep 2025 05:17 PM (IST)
आजकाल, बहुतेक लोक बँकिंग सेवांशी जोडलेले आहेत आणि त्यांच्याकडे बँक खाते आहे जिथे ते त्यांची बचत सुरक्षित ठेवतात.
26 Sep 2025 05:11 PM (IST)
दिवाळीच्या पार्श्वभूमीवर सर्वोच्च न्यायालयाने फटाक्यांसंदर्भात एक मोठा निर्णय दिला आहे. शुक्रवारी, कोर्टाने दिल्ली-एनसीआरसह देशभरात फटाक्यांवर पूर्णपणे बंदी घालण्याबद्दल महत्त्वपूर्ण टिप्पणी केली.
26 Sep 2025 04:58 PM (IST)
Asia cup 2025 : आज २६ सप्टेंबर रोजी आशिया कप २०२५ मध्ये भारत आणि श्रीलंका यांच्यात खेळवला जाणार आहे. आशिया कप स्पर्धेतील हा शेवटचा सुपर ४ सामना आहे. हा सामना दोन्ही संघांसाठी केवळ औपचारिकता असणार आहे.
26 Sep 2025 04:26 PM (IST)
Sonam Wangchuk Arrest: लडाख या केंद्रशासित प्रदेशाला पूर्ण राज्याचा दर्जा आणि सहाव्या अनुसूचीमध्ये समाविष्ट करण्याच्या मागणीसाठी सुरू असलेल्या निषेधाला बुधवारी हिंसक वळण लागले. हिंसाचारात चार जणांना आपले प्राण गमवावे लागले. आज या प्रकरणात प्रशासनाने मोठी कारवाई केली आहे. या आंदोलनात उपोषण करणाऱ्या पर्यावरणवादी सोनम वांगचूक यांना अटक करण्यात आली आहे.
26 Sep 2025 04:00 PM (IST)
महिला म्हटले तर अनेक बंधन आले परंतु लग्नानंतर पत्नीला आपल्या पतीकडून साथ जर मिळाली तर पत्नी नक्कीच मोठी उंच भरारी घेते अशाच काहीसं उदाहरण नाशिक मधील सुनिता निमसे यांच आहे पती असताना त्यांना शिक्षण करण्यासाठी लग्नानंतर देखील संधी मिळाली आणि राजकारणात देखील संधी मिळाली परंतु अचानक पतीचा मृत्यू आणि प्रपंचाच्या ओढवलेल्या जबाबदाऱ्या हे सर्व सांभाळून मुलांचे शिक्षण करत मुलांना परदेशात पाठवले आणि स्वतः अनेक महिलांच्या हाताला रोजगार देत स्वतः देखील चांगल्या उद्योजक बनल्या त्यांनी स्वतःचा शेती व्यवसाय करत अनेक वेगवेगळे शेतीत प्रयोग केले शेतीनंतर शेतीला जोडधंदा म्हणून दुग्ध व्यवसाय सुरू केला दुग्ध व्यवसायाच्या माध्यमातून दुधापासून अनेक वेगवेगळे पदार्थ बनवून त्याला स्वतःचा पॅटर्न ब्रँड देखील घेतला आणि त्याची विक्री स्वतः उत्कृष्ट क्वालिटी सांभाळून ग्राहकांना कशी द्यावी याची काळजी घेतली आणि स्वतः व्यवसायात विशेष लक्ष घालून आपल्या व्यवसायाला आज चांगली स्थान प्राप्त करून दिले आहे
26 Sep 2025 03:50 PM (IST)
खोपोली पाली रस्त्यावर इमॅजिका हा जगविख्यात थीम पार्क आहे. येथे दररोज हजारो पर्यटक येतात. त्यामुळे या रस्त्यावर मोठी वाहनांची वर्दळ असते. अपघाताबरोबरच या परिसरात पर्यटक प्रवाश्यांमध्ये अनेकदा वाद होतात. यासाठी खालापूर पोलिसांनी पुढाकार घेत नवी पोलीस चौकी उभारली आहे...
26 Sep 2025 03:40 PM (IST)
उल्हासनगर कॅम्प ५ मधील ३६ सेक्शन परिसरात एका १३ वर्षीय तरुणीला विजेचा जोरदार शॉक लागून ती गंभीर जखमी झाल्याची घटना घडली आहे. आयशा खान असे या तरुणीचे नाव असून, सध्या तिच्यावर उल्हासनगर शासकीय रुग्णालयात उपचार सुरू आहेत. ३६ सेक्शन येथील शिवसेना शाखाप्रमुख गणेश चौगुले यांच्या जनसंपर्क कार्यालयासमोर आयशा खान हिचे कुटुंब भाडेतत्त्वावर वास्तव्यास आहे. आज दुपारी घरकाम करत असताना अचानक विजेचा जोरदार शॉक बसल्याने आयशा होरपळली. या घटनेमुळे परिसरात खळबळ उडाली. दरम्यान, घराच्या छतावरून महावितरणची विद्युत वाहिनी गेली असून, त्या वाहिनीतून करंट थेट घरात पोहोचल्यामुळे ही दुर्घटना घडल्याची माहिती आयशाच्या वडिलांनी दिली आहे. सध्या आयशाची प्रकृती चिंताजनक असून, तिच्यावर तातडीने उपचार सुरू आहेत. या प्रकारामुळे नागरिकांमध्ये संतापाची लाट पसरली आहे. महावितरणच्या निष्काळजीपणामुळे ही दुर्घटना घडल्याचा आरोप स्थानिकांनी केला असून, याबाबत जबाबदार अधिकाऱ्यांवर कारवाई करण्याची मागणीही होत आहे
26 Sep 2025 03:35 PM (IST)
अहिल्यानगरच्या कर्जत येथील राज्यातील लाखो भाविकांचे श्रध्दास्थान असणा-या राशीनच्या यमाई देवीच्या शारदीय नवरात्र उत्सव सध्या सुरू आहे. घटस्थापना ते कोजागरी पौर्णिमेपर्यंत विविध धार्मिक कार्यक्रम आयोजित करण्यात येतात. हलत्या दीपमाळेसाठी प्रसिध्द असणारे आणि जागृत, स्वंयभू अशी कर्जत तालुक्यातील राशीनच्या येमाई देवीची ओळख आहे. पारंपरिक पध्दतीने देवीची घटस्थापना करण्यात येते. नऊ दिवस महावस्त्रालंकार पूजा, आरती-धुपारती, ललित पंचमी, दुर्गाष्टमी पासोडी पोत, होम-हवन, विजयादशमी पालखी सोहळा, कोजागरी पोर्णिमा भळांदे इत्यादी धार्मिक कार्यक्रम पार पडणार आहेत. तब्बल 700 वर्ष जुना या मंदिराचा इतिहास आहे.
26 Sep 2025 03:30 PM (IST)
अंबरनाथमध्ये हुतात्मा नाग्या बाबा कातकरी यांची पुण्यतिथी आदिम कातकरी संघटनेच्या माध्यमातून साजरी करण्यात आली. २१ वर्षांच्या वयात स्वातंत्र्यपूर्व काळात चिरनेर जंगल सत्याग्रहात ब्रिटिशांच्या गोळीबारात बलिदान दिलेल्या नाग्या बाबांच्या स्मरणार्थ रॅली, पुष्पहार आणि व्यख्यानांचे आयोजन करण्यात आले, ज्यात शेकडो आदिवासी बांधव सहभागी झाले.
26 Sep 2025 03:25 PM (IST)
निकृष्ट दर्जाचे काम व गैरव्यवहाराची चौकशी करून कारवाई करण्यासाठी घेतली सार्वजनिक बांधकाम विभागाच्या कार्यकारी अभियंता महेंद्र किणी यांची भेट घेतली आहे.
26 Sep 2025 03:15 PM (IST)
सावंतवाडी-बेळगाव रोडवर असलेल्या कारीवडे येथे फुलपाखरासारखाच दिसणारा पतंग आढळून आला आहे. हा पतंग
झाडावर सापडला असून याला पाहण्यासाठी सोबत सेल्फीसाठी वाहनधारक थांबत आहेत. हा पतंग फुलपाखरासारखा दिसतो. हा निशाचर असल्याने सूर्यास्तानंतर त्याचा दिवस सुरू होतो.
26 Sep 2025 03:10 PM (IST)
बदलापूर- अंबरनाथ परिसरातील स्वामी भक्तांसाठी एक आनंदाची बातमी आहे. बदलापुरातून थेट अक्कलकोटला जाण्यासाठी महाराष्ट्र राज्य परिवहन विभागाने बस सेव सुरू करण्याचा निर्णय घेतला आहे, आठवड्यातून एक दिवस ही बस सेवा प्रायोगिक तत्त्वावर सुरू होणार आहे. येत्या १० ऑक्टोबर पासून बदलापूर बस स्थानकातून अक्कलकोटसाठी या बस सेवेचा शुभारंभ होणार आहे. शहरातील स्वामी भक्तांच्या मागणीनुसार राष्ट्रवादी काँग्रेस शरद पवार पक्षाचे प्रदेश सरचिटणीस अविनाश देशमुख यांनी याबाबत पत्रव्यवहार केला होता, त्यानुसार परिवहन विभागाने ही बस सेवा सुरू करण्याचा निर्णय घेतला आहे.
26 Sep 2025 02:55 PM (IST)
Indian Air Force: आज भारतीय वायू सेनेसाठी अत्यंत खास असा क्षण आहे. भारतीय वायुसेनेतील अत्यंत महत्वाचे असलेले मिग-21 हे लढाऊ विमान आज निवृत्त झाले आहे. भारतीय वायुसेनेत मिग – 21 या लढाऊ विमानाचे अत्यंत महत्वाचे योगदान आहे. अनेक महत्वाच्या कारवायांमध्ये मिग 21 ने महत्वपूर्ण योगदान दिले आहे. भारतीय संरक्षणदलाची ताकद असणारे मिग-21 आज निवृत्त झाले आहे.
26 Sep 2025 02:55 PM (IST)
RBI New Rules Marathi News: डिजिटल पेमेंटची सुरक्षा अधिक मजबूत करण्यासाठी रिझर्व्ह बँक ऑफ इंडिया (RBI) ने एक नवीन चौकट विकसित केली आहे. ती १ एप्रिल २०२६ पासून सर्व बँका आणि बँक नसलेल्या पेमेंट प्रदात्यांवर लागू होईल. २५ सप्टेंबर रोजी अधिसूचित केलेले हे नवीन नियम ग्राहक संरक्षण मजबूत करणे आणि डिजिटल व्यवहार अधिक सुरक्षित करणे हे आहेत.
26 Sep 2025 02:40 PM (IST)
पिंपरी : अजित पवारांच्या राष्ट्रवादीचे मावळचे आमदार सुनील शेळके यांच्या हत्येचा कट रचणाऱ्या आरोपींचा अतिरिक्त तपास करण्यासाठी आता एसआयटीची स्थापना करण्यात आली आहे. पिंपरी चिंचवडचे पोलीस आयुक्त विनयकुमार चौबे यांनी परिमंडळ 2 पोलीस उपायुक्त विशाल गायकवाड यांच्या अध्यक्षतेखाली ही समिती स्थापन केली आहे. या कटाच्या मागे नेमकं कोण आहे? याचा शोध घेण्यासाठी शासनाकडून एसआयटीची नियुक्ती करण्यात आली आहे.
26 Sep 2025 02:35 PM (IST)
Khawaja Asif UN speech AI : संयुक्त राष्ट्र सुरक्षा परिषदेत (UNSC) नुकत्याच झालेल्या एका महत्त्वाच्या बैठकीत पाकिस्तानचे संरक्षण मंत्री ख्वाजा आसिफ चर्चेत आले. चर्चा कृत्रिम बुद्धिमत्ता (Artificial Intelligence – AI) या गंभीर विषयावर असतानाही, आसिफ यांच्या वारंवार अडखळण्यामुळे आणि चुकीच्या उच्चारांमुळे त्यांचे भाषण इंटरनेटवर प्रचंड व्हायरल झाले.
26 Sep 2025 02:30 PM (IST)
Taskin Ahmed created history : आशिया कपमधील(Asia cup 2025)सुपर ४ सामन्यात २५ सप्टेंबर रोजी पाकिस्तान संघाने बांगलादेशचा ११ धावांनी पराभव केला. या सामन्यात बांगलादेशचा वेगवान गोलंदाज तस्किन अहमदने मोठी कामगिरी केली आहे. त्याने आशिया कपच्या सुपर फोरमध्ये पाकिस्तानविरुद्ध विकेट घेऊन इतिहास रचला आहे. वेगवान गोलंदाज तस्किन अहमदने टी२० मध्ये बांगलादेशसाठी १०० बळी टिपले आहेत. हा विक्रम करणारा तो बांगलादेशचा तिसरा गोलंदाज ठरला आहे.
26 Sep 2025 02:25 PM (IST)
Leh Ladakh Violence Updates In Marathi : लडाख या केंद्रशासित प्रदेशाला पूर्ण राज्याचा दर्जा आणि सहाव्या अनुसूचीमध्ये समाविष्ट करण्याच्या मागणीसाठी सुरू असलेल्या निषेधाला बुधवारी हिंसक वळण लागले. हिंसाचारात चार जणांना आपले प्राण गमवावे लागले. निदर्शकांनी लेहमधील भाजप कार्यालयाला आग लावली. परिस्थिती नियंत्रणात आणण्यासाठी अनिश्चित काळासाठी कर्फ्यू लावावा लागला. सरकारने या हिंसाचारासाठी हवामान कार्यकर्त्या सोनम वांगचुक यांना जबाबदार धरले. दुसऱ्याच दिवशी त्यांच्या एनजीओचा एफसीआरए परवानाही रद्द करण्यात आला. लडाखचे उपराज्यपाल कविंदर गुप्ता यांनी याला सुनियोजित कट रचला असल्याचे म्हटले. या सर्वांमध्ये, वांगचुक म्हणाले की या संपूर्ण प्रकरणात त्यांना बळीचा बकरा बनवले जात आहे.
26 Sep 2025 02:15 PM (IST)
ज्योतिषशास्त्रानुसार, ग्रहांच्या हालचालीनुसार आणि ग्रहांच्या बदलत्या हालचालीनुसार हा योग शुभ अशुभ ठरवला जातो. 27 ऑक्टोबर रोजी ग्रहांचा सेनापती मंगळ स्वतःच्या वृश्चिक राशीमध्ये संक्रमण करणार आहे. यावेळी रुचक राजयोग तयार होणार आहे. रुचक राजयोग हा पाच महान योगांपैकी एक आहे. ज्योतिषशास्त्रानुसार हा राजयोग अत्यंत शुभ मानला जातो. हा काळ व्यक्तीच्या जीवनामध्ये काही बदल घडवून आणू शकतो. ऑक्टोबरमध्ये तयार होणाऱ्या राजयोगाचा काही राशीच्या लोकांना फायदा होणार आहे. रुचक राजयोगाचा कोणत्या राशीच्या लोकांना फायदा होणार आहे, जाणून घ्या
26 Sep 2025 02:10 PM (IST)
आर्यन खानच्या दिग्दर्शनात पदार्पण करणाऱ्या “बॅड्स ऑफ बॉलीवूड” या वेब सिरीजशी संबंधित मानहानीच्या प्रकरणात आयआरएस अधिकारी समीर वानखेडे यांना मोठा धक्का बसला आहे. न्यायालयाने वानखेडे यांना त्यांच्या याचिकेत सुधारणा करण्यास सांगितले आहे. दिल्ली उच्च न्यायालयाने “बॅड्स ऑफ बॉलीवूड” बद्दल वानखेडे यांच्या याचिकेच्या गांभीर्यावर प्रश्नचिन्ह उपस्थित केले आहे. दिल्लीत खटला का दाखल करण्यात आला, असा प्रश्न त्यांना विचारण्यात आला आहे.
26 Sep 2025 02:00 PM (IST)
म्युच्युअल फंडमध्ये पैसे गुंतवून करून बक्कळ नफा कमावण्याचे आमिष दाखवून एका ठकबाजाने पत्नी व भावासोबत मिळून एका विधवा महिलेची फसवणूक केली. या ठकबाजाने तब्बल एक कोटी 10 लाख 90 हजार रुपयांनी फसवणूक केली. हा प्रकार कोतवाली पोलिस ठाण्यांतर्गत उपडकीस आला आहे.
26 Sep 2025 01:56 PM (IST)
Weather Update: राज्यात गेल्या काही दिवसांपासून पावसाचा जोर वाढला आहे.गेले काही दिवस राज्यात मुसळधार पाऊस कोसळत आहे. मराठवाडा, उत्तर महाराष्ट्रात पावसाने थैमान घातले आहे. मोठ्या प्रमाणात शेतीचे नुकसान झाले आहे. दरम्यान हवामान विभागाने पुन्हा राज्यात मुसळधार पावसाचा इशारा दिला आहे. त्यामुळे चिंता वाढली आहे.
26 Sep 2025 01:55 PM (IST)
करवीर निवासिनी श्री अंबाबाई (महालक्ष्मी) मंदिर हे भाविकांचे श्रद्धास्थान असून, दररोज हजारो भाविक येथे दर्शनासाठी येतात. मात्र, मंदिर परिसरात दिवसेंदिवस वाढत चाललेली भिक्षेकऱ्यांची वाढती संख्या भाविकांसाठी डोकेदुखी ठरत आहे. सकाळपासून रात्रीपर्यंत मंदिराच्या मुख्य प्रवेशद्वारावर, मंडईकडे जाणाऱ्या रस्त्यावर तसेच पायऱ्यांजवळ भिक्षेकऱ्यांचा अक्षरशः उन्हमाद दिसून येत आहे. शारदीय नवरात्रौत्सव सोहळा सध्या मंदिरात सुरू आहे, याचाच फायदा घेत हे भिक्षेकरी शहरात आले आहेत. मिरजहून रेल्वे पॅसेंजर गाडीतून हे सकाळी येतात, दिवसभर मंदिर आवारात बसतात. संध्याकाळी याच गाडीने परत जातात असा यांचा दिनक्रम ठरला असल्याचे दिसून येते. गेले दोन दिवसापासून या भिक्षेकऱ्यांनी आपले स्थान अंबाबाई मंदिर परिसरात केले आहे.
26 Sep 2025 01:50 PM (IST)
India vs Sri Lanka Probable Playing XI – भारत विरुद्ध श्रीलंका आशिया कप २०२५ सुपर ४ चा १८ वा सामना आज दुबई आंतरराष्ट्रीय क्रिकेट स्टेडियमवर खेळला जाणार आहे. भारताचा संघ हा फायनलसाठी पात्र ठरला आहे, भारताच्या संघाने सुपर 4 मध्ये बांग्लादेश आणि पाकिस्तान या दोन्ही देशांना पराभूत करुन अंतिम फेरीमध्ये प्रवेश केला आहे. भारताचा सामना हा पाकिस्तानविरुद्ध फायनलमध्ये होणार आहे. भारत आणि पाकिस्तानचे अंतिम फेरीसाठी आधीच स्थान निश्चित झाले आहे, ज्यामुळे हा सामना एक रोमांचक ठरला आहे.
26 Sep 2025 01:45 PM (IST)
बिहार विधानसभा निवडणुकीपूर्वी एनडीए आघाडीने महिला मतदारांना आकर्षित करण्यासाठी महत्त्वपूर्ण पाऊल उचलले आहे. पंतप्रधान नरेंद्र मोदी शुक्रवारी (२६ सप्टेंबर २०२५) सकाळी ११ वाजता व्हिडिओ कॉन्फरन्सिंगद्वारे बिहारमध्ये “मुख्यमंत्री महिला रोजगार योजने”चा शुभारंभ करण्यात आला. या योजनेअंतर्गत बिहारमधील सुमारे ७५ लाख महिलांच्या बँक खात्यात थेट १०,००० रुपये हस्तांतरित केले जाणार आहेत. पण त्याचवेळी राजकीय तज्ञांकडून बिहार निवडणुकीत ही योजना गेम-चेंजर ठरू शकते, असा अंदाज वर्तवण्यात येत आहे. सत्ताधारी एनडीए आघाडी महिला मतदारांना आकर्षित करण्यासाठी या योजनेचा वापर करत असल्याचे बोलले जात आहे.
26 Sep 2025 01:37 PM (IST)
मार्क रुटे यांनी सीएनएनला दिलेल्या मुलाखतीत स्पष्ट शब्दांत म्हटले की “ट्रम्प यांनी भारतावर घातलेले कर केवळ दिल्लीवरच नाही तर मॉस्कोवरही मोठा परिणाम घडवत आहेत. भारताचा रशियासोबतचा तेल व्यापार आणि इतर आर्थिक देवाणघेवाण या करांमुळे दबावाखाली आली आहे.” रुटे यांच्या या वक्तव्यामुळे आंतरराष्ट्रीय वर्तुळात खळबळ उडाली आहे.
26 Sep 2025 01:33 PM (IST)
भाजपाचे मध्य प्रदेशमधील ज्येष्ठ नेते आणि सरकारमधील नगरविकास व गृहनिर्माण मंत्री कैलाश विजयवर्गीय यांनी गुरूवारी केलेल्या एका विधानामुळे वाद निर्माण झाला आहे. त्यांनी लोकसभेचे विरोधी पक्षनेते राहुल गांधी यांचे नाव न घेता त्यांच्यावर एक आक्षेपार्ह विधान केले. विजयवर्गीय यांनी म्हटले की, विरोधी पक्षनेता आपल्या बहिणीचा जाहीर मुका घेतो. त्यांच्यात संस्काराची कमतरता आहे, अशी टीका कैलाश विजयवर्गीय यांनी राहुल गांधींवर केली आहे.
26 Sep 2025 01:31 PM (IST)
“केंद्रीय मंत्री नितीन गडकरी यांच्या दोन्ही मुलांनी अफरातफर करत जनतेची अर्थिक फसवणूक केली आहे. प्रत्येक किलोमीटर मागे पैसे खात टोलच्या माध्यमातून मिळवलेले पैसे हे स्वतःच्या मुलांच्या कंपनीमध्ये वळवले गेले आहेत,” असा गंभीर आरोप अंजली दमानिया यांनी केला आहे.
26 Sep 2025 12:55 PM (IST)
मला आता जास्त वेळ राज्यात द्यावा लागणार आहे, फिरावं लागणार आहे. तुमच्यावर महत्त्वाची जाबदाबदरी असणार आहे, ती नीट पार पाडा. मागचा अजित पवार आणि आत्ताच अजित पवार लय मोठा फरक आहे माझ्याकडे यायला संकोच करू नका, असे आवाहन अजित पवार यांनी केले. जसं वय वाढतं तसं फरक होतो वय वाढलं की मॅच्युरिटी येते. आपण आधी काही केलं तर आपल्याला पांघरून घालायला साहेब असायचे आता आपल्यालाच पांघरून घालायचा आहे, असेही अजित पवार म्हणाले.
26 Sep 2025 12:45 PM (IST)
हुथी बंडखोरांनी इस्त्रायलच्या तेल अवीव शहरावर ड्रोन हल्ला केला होता. या हल्ल्यानंतर इस्त्रायलने आक्रमक भूमिका घेत येमेनची राजधानी असलेल्या सना शहरावर मोठा हल्ला केला आहे. या हल्ल्यात 9 पेक्षा अधिक लोक मारले गेल्याची माहिती आहे. येमनेचे लष्करी ठिकाणांना सुद्धा इस्त्रायलने टार्गेट केले.
26 Sep 2025 12:42 PM (IST)
पुणे जिल्ह्यासाठी आज पावसाचा येलो अलर्ट जारी करण्यात आला आहे. पुढील तीन तासांत पुणे जिल्ह्यात काही ठिकाणी हलक्या ते मध्यम स्वरूपाचा पाऊस पडण्याची शक्यता आहे. नगरिकांनी या काळात आवश्यक ती काळजी घेण्याचे आवाहन करण्यात आले आहे. हवामान संबंधी ही माहिती सचेत अँपद्वारे प्राप्त झाली आहे.
26 Sep 2025 12:35 PM (IST)
पुणे शहरातील ट्रॅफिकपासून सुटका व्हावी यासाठी आता पुणे पोलिसांकडून शहरातील सुमारे 500 सिग्नल जंक्शनवर AI तंत्रज्ञानावर आधारित 'इंटेलिजंट ट्रॅफिक मॅनेजमेंट सिस्टीम' (ITMS) उभारण्यात येणार असून या नव्या सिस्टीमसाठी तब्बल 1100 कोटींचा खर्च होणार आहे. ही नवी सिस्टीमचं काम येत्या 3 महिन्यांत सुरू होणार असल्याची पुणे पोलिस आयुक्त अमितेश कुमार यांनी दिली आहे. 'इंटेलिजंट ट्रॅफिक मॅनेजमेंट सिस्टीम' ही सिग्नल यंत्रणा गाड्यांचा वेग, त्यांची संख्या तसंच प्रवासाचा वेळ आणि पीक अवर मधील ट्रॅफिकचा अभ्यास करून ऑटोमॅटीक सिग्नल सेट करते. 'एआय'च्या साहाय्याने सिग्नल सिंक्रोनायझेशन साधले जाते. त्यामुळे अनावश्यक वाहनांची गर्दी होत नाही आणि वाहतूक सुरळीतपणे सूरू राहते. या सिस्टीममुळे शहरात नेत्यांचे दौरे असतात त्यावेळी वाहतूक कोंडी होऊन नागरिकांची गैरसोय टाळली जाईल आणि रुग्णवाहिकेसाठी ग्रीन कॉरिडॉर तयार करण्याचे काम या तंत्रज्ञानाच्या मदतीने करता येऊ शकते, असं सांगितलं जात आहे.
26 Sep 2025 12:25 PM (IST)
महिला व बालविकास विभागामार्फत एकात्मिक बाल विकास सेवा योजनेअंतर्गत कार्यरत असलेल्या सर्व अंगणवाडी सेविका व मदतनीस यांना यंदाच्या दिवाळीनिमित्त भाऊबीज भेट म्हणून प्रत्येकी 2 हजार रूपये देणार असल्याची माहिती महिला व बालविकास मंत्री आदिती वरदा सुनिल तटकरे यांनी दिली आहे. यासाठी शासनाने 40.61 कोटींचा निधी उपलब्ध करत त्याबाबतचा शासन निर्णय निर्गमित केला आहे.
26 Sep 2025 12:15 PM (IST)
बीडच्या टोकवाडी येथे आत्माराम भांगे यांनी ओबीसी आरक्षण संपल्याच्या विवंचनेतून गळफास घेत आत्महत्या केल्याची माहिती समोर आली आहे. भांगे हे ऑटोचालक असून त्यांची दोन मुलं पोलीस भरतीची तयारी करत होते. अशातच ओबीसी आरक्षण संपल्याच्या धक्क्यातून त्यांनी आत्महत्या केल्याची माहिती भांगे कुटुंबियांनी परळी ग्रामीण पोलिसाना दिली आहे. त्यानंतर परळी ग्रामीण पोलीस ठाण्यात आकस्मित मृत्यूची नोंद करण्यात आली आहे.
26 Sep 2025 12:02 PM (IST)
लेहमधील हिंसाचारानंतर, तणाव कायम आहे आणि शहरात संचारबंदी लागू आहे. परिस्थिती अत्यंत तणावपूर्ण आहे. हिंसाचारानंतर, सोनम वांगचुकशी संबंधित एका स्वयंसेवी संस्थेविरुद्ध महत्त्वपूर्ण कारवाई करण्यात आली आहे. तिचा एफसीआरए रद्द करण्यात आला आहे. अनियमितता आढळली आणि परदेशी निधीबाबत अचूक माहिती देण्यात आलेली नाही असा आरोप करण्यात आला आहे.
26 Sep 2025 11:55 AM (IST)
धाराशिव जिल्ह्यातील लाखो हेक्टरवरील पिके धोक्यात शेतकरी अडचणीत असताना जिल्हाधिकाऱ्यांनी मात्र बेजबाबदार वर्तन केल्याचे समोर आले आहे. जिल्हा संकटात असताना जिल्हाधिकारी कीर्ती किरण पुजार मात्र नाच गाण्यात व्यग्र असल्याचे दिसून आल्याने संताप व्यक्त होत आहे. 24 सप्टेंबर रोजी जिल्ह्यातील नागरिक संकटात असतानाच तुळजापुरातील एका कार्यक्रमात जिल्हाधिकाऱ्यांनी डान्स केला. जिल्हाधिकाऱ्यांचा व्हिडिओ सोशल मीडियावर जोरदार व्हायरल होत आहे
26 Sep 2025 11:45 AM (IST)
बिहारमध्ये विधानसभा निवडणुकीमध्ये जोरदार राजकारण तापले आहे. बिहारच्या राजकारणामध्ये आता कॉंग्रेस नेत्या आणि खासदार प्रियांका गांधी यांची एन्ट्री झाली आहे. प्रियंका गांधी बिहारमध्ये अधिकार यात्रा काढणार असून यामुळे राजकीय हालचालींना वेग आला आहे.
26 Sep 2025 11:35 AM (IST)
पैशांचं सोंग घेता येत नाही असे उपमुख्यमंत्री तथा अर्थमंत्री अजित पवार म्हणाले होते. यावरुन जोरदार टीका झाल्यानंतर त्यांनी स्पष्टीकरण दिले आहे. अजित पवार म्हणाले की, ग्रामीण भागामध्ये गेल्यावर तिथल्या लोकांना समजेल अशा भाषेत मी बोलतो. आपण आपल्या घरात जसं बोलतो, तशी भाषा मी वापरतो. आपणही कित्येकदा बोलताना म्हणतो ना की बाबा रे पैशांचं सोग घेता येत नाही. काही गोष्टी बजेटमध्ये बसवाव्या लागतात, त्या अर्थाने मी बोललो होतो. पण विरोधकांनी त्याचा चुकीचा अर्थ घेतला. ते वाक्य बोलण्याआधी, त्यानंतर मी काय बोललो, ते विरोधक ऐकतच नाहीत, मधलं एक वाक्य घेतात आणि टीका, टोमणे सुरू करतात, असे स्पष्टीकरण अजित पवार यांनी दिले आहे.
26 Sep 2025 11:25 AM (IST)
बंगालच्या उपसागरातील कमी दाबाचे क्षेत्र अधिक पोषक ठरल्याने राज्यात आज २६ सप्टेंबरपासून पावसाचा जोर वाढण्याची शक्यता आहे. मान्सून परतीच्या मार्गावर असताना पुन्हा सक्रिय झाल्यामुळे महाराष्ट्रातील हवामानात बदल पाहायला मिळत आहे. हवामान विभागाने दिलेल्या माहितीनुसार, कोकण, घाटमाथा, मराठवाडा आणि विदर्भ या भागांसाठी जोरदार पावसाचा अंदाज वर्तवला जात आहे. त्यामुळे अनेक जिल्ह्यांना यलो आणि ऑरेंज अलर्ट जारी केला आहे.
26 Sep 2025 11:15 AM (IST)
राज्यामध्ये पूरस्थिती निर्माण झाल्यामुळे अनेक ठिकाणी मोठे नुकसान झाले आहे. वैद्यकीय शिक्षण व औषधी द्रव्ये विभागाच्या अधिपत्याखालील शासकाय व ५० महाविद्यालय तसेच संलग्नित रुग्णालयांमधील गट-क तांत्रिक व अतांत्रिक संवर्गातील रिक्त पदे भरण्यासाठी सुरू असलेल्या राज्यस्तरीय ऑनलाईन स्पर्धा परीक्षा पुढे ढकलण्याचा आदेश वैद्यकीय शिक्षण राज्यमंत्री माधुरी मिसाळ यांनी दिला आहे.
26 Sep 2025 11:02 AM (IST)
भारतातील चर्चेमधील पंतप्रधानांमध्ये मनमोहन सिंग यांचे नाव आवश्य येते. क आंतरराष्ट्रीय ख्यातीचे अर्थतज्ज्ञ, शिक्षणतज्ज्ञ आणि राजकारणी होते, ज्यांनी २००४ ते २०१४ या काळात भारताचे १४ वे पंतप्रधान म्हणून काम केले. ते भारताचे पहिले आणि एकमेव शीख पंतप्रधान होते. ऑक्सफर्ड आणि केंब्रिजमध्ये शिक्षण घेतलेल्या सिंग यांनी १९९१ च्या आर्थिक सुधारणांमध्ये महत्त्वाची भूमिका बजावली, ज्यातून भारताला आर्थिक संकटातून बाहेर काढण्यात मदत झाली. कॉंग्रेसच्या राजकारणामध्ये आणि देशाचे अर्थव्यवस्थेमध्ये महत्त्वाची भूमिका बजावणारे मनमोहन सिंग यांची आज जयंती आहे.
26 Sep 2025 11:01 AM (IST)
श्रीलंकेच्या संघाने साखळी सामन्यामध्ये कमालीची कामगिरी केली होती पण सुपर 4 मध्ये त्यांना कोणत्याही सामन्यामध्ये विजय मिळवता आला नाही. सुपर 4 मध्ये भारताचा हा शेवटचा सामना आहे. भारतीय संघ रविवारी १२ वा आशिया कप फायनल खेळेल आणि त्याआधी शुक्रवारी सुपर ४ टप्प्यातील अंतिम सामन्यात त्यांचा सामना श्रीलंकेशी होईल.
26 Sep 2025 10:45 AM (IST)
Xiaomi 17 Pro आणि Xiaomi 17 Pro Max चीनमध्ये लाँच करण्यात आले आहे. कंपनीने लाँच केलेले हे लाईनअप Qualcomm Snapdragon 8 Elite Gen 5 प्रोसेसर आणि Android 16-बेस्ड HyperOS सह येतात. प्रो मॉडेल्समध्ये रियर कॅमेरा मॉड्यूलच्या चारी बाजूला सेकेंडरी डिस्प्ले देण्यात आला आहे.
26 Sep 2025 10:30 AM (IST)
मराठवाड्यासह पश्चिम महाराष्ट्रातील सोलापूर जिल्हा तसेच धाराशिव जिल्ह्याला मुसळधार पावसाने तडाखा दिला आहे. मागील १५ दिवसांच्या सततच्या पावसामुळे जनजीवन विस्कळीत झाले असून, शेतीचेही मोठ्या प्रमाणावर नुकसान झाले आहे. सध्या पावसाचा जोर काहीसा ओसरला असला तरी पुढील काही तासांत पुन्हा पावसाची शक्यता हवामान विभागाने वर्तवली आहे. धाराशिव जिल्ह्यात मध्यरात्रीपासून पुन्हा पावसाला सुरुवात झाली असून, सोलापूरमधील सीना नदीकाठच्या नागरिकांना सतर्कतेचा इशारा देण्यात आला आहे.
26 Sep 2025 10:06 AM (IST)
पवन कल्याणचा अॅक्शन थ्रिलर “दे कॉल हिम ओजी” या चित्रपटाने बॉक्स ऑफिसवर आधीच धुमाकूळ घातला आहे. या चित्रपटात इमरान हाश्मी खलनायकाची भूमिका साकारत आहे. हा इमरानचा पहिला तेलुगू चित्रपट आहे. भारतीय चित्रपट इतिहासातील हा सर्वात मोठा ओपनिंग चित्रपट मानला जात आहे. पवन कल्याणच्या “दे कॉल हिम ओझी” या चित्रपटाची पहिल्या दिवसाची कमाई आता आपण जाणून घेणार आहोत. बातमी सविस्तर वाचा...
.png "Videos"){kind=small}
