मुख्यमंत्री रेखा गुप्ता यांच्यावरील हल्ल्यानंतर पोलीस आयुक्तांना हटवले, आता कोणाची नियुक्ती? वाचा सविस्तर (फोटो सौजन्य-X)
सरकारी निवासस्थानी जनसुनावणीदरम्यान एका व्यक्तीने मुख्यमंत्र्यांवर हल्ला केला. त्यानंतर आरोपीला लगेचच अटक करण्यात आली. या प्रकरणात पोलिसांनी हत्येच्या प्रयत्नाचा गुन्हा दाखल केला आहे. ..यानंतर आता दिल्ली पोलिसांना पूर्णवेळ पोलिस आयुक्त मिळाले आहेत. वरिष्ठ भारतीय पोलिस सेवेचे अधिकारी सतीश गोलचा यांना आज गुरुवारी नवीन पोलिस आयुक्त म्हणून नियुक्त करण्यात आले आहे. यापूर्वी एसबीके सिंग यांना पोलिस आयुक्त म्हणून नियुक्त करण्यात आले होते, परंतु ते केवळ २० दिवस आयुक्त पदावर राहू शकले. मुख्यमंत्री रेखा गुप्ता यांच्यावरील हल्ल्याच्या ३० तासांत त्यांना काढून टाकण्यात आले.
आयपीएस सतीश गोलचा, जे सध्या तिहार तुरुंगाचे महासंचालक आहेत. गेल्या वर्षी १ मे २०२४ रोजी त्यांनी हा पदभार स्वीकारला होता, त्यांना पुढील आदेशापर्यंत दिल्लीचे पोलिस आयुक्त म्हणून नियुक्त करण्यात आले आहे. ते १९९२ बॅचचे भारतीय पोलिस सेवेचे अधिकारी आहेत. गृह मंत्रालयाने आज जारी केलेल्या आदेशानुसार, वरिष्ठ आयपीएस अधिकारी सतीश गोलचा यांची दिल्ली पोलिसांचे २६ वे आयुक्त म्हणून नियुक्ती करण्यात आली आहे. १९९२ बॅचचे आयपीएस गोलचा यांनी एसबीके सिंग यांची जागा घेतली आहे. त्यांचे पूर्ववर्ती संजय अरोरा ३१ जुलै रोजी निवृत्त झाल्यानंतर त्यांनी आयुक्तपदाचा अतिरिक्त कार्यभार स्वीकारला.
यापूर्वी गोलचा यांनी दिल्ली पोलिसांमध्ये विशेष पोलिस आयुक्त (कायदा आणि सुव्यवस्था), विशेष आयुक्त (गुप्तचर) आणि अरुणाचल प्रदेशचे पोलिस महासंचालक (डीजीपी) यासह अनेक महत्त्वाच्या पदांवर काम केले आहे. त्यांनी दिल्ली पोलिसात डीसीपी आणि जॉइंट सीपी म्हणूनही काम केले आहे.
यापूर्वी ३१ जुलै रोजी केंद्रीय गृह मंत्रालयाने वरिष्ठ भारतीय पोलिस सेवा अधिकारी एसबीके सिंग यांची दिल्ली पोलिसांचे नवे आयुक्त म्हणून नियुक्ती केली होती. एसबीके सिंग हे १९८८ च्या बॅचचे अधिकारी आहेत आणि त्यांना १ ऑगस्टपासून दिल्ली पोलिस आयुक्तपदाचा अतिरिक्त कार्यभार देण्यात आला होता.
एसबीके सिंग यांची ३१ जुलै रोजी निवृत्त झालेल्या संजय अरोरा यांच्या जागी दिल्ली पोलिस आयुक्तपदी नियुक्ती करण्यात आली आहे. एसबीके सिंग हे पोलिस आयुक्तपदाचा अतिरिक्त कार्यभार सांभाळत असताना दिल्लीत होमगार्ड्सचे महासंचालक म्हणून काम करत होते. यापूर्वी, १९८८ च्या बॅचचे तामिळनाडू कॅडरचे आयपीएस संजय अरोरा यांची १ ऑगस्ट २०२२ रोजी राकेश अस्थाना यांच्या जागी दिल्ली पोलिस आयुक्तपदी नियुक्ती करण्यात आली होती.
