रविवार, 4 ऑक्टोबर 2026
UP CM Yogi adityanath (Photo - X)
UP News : उत्तर प्रदेशचे मुख्यमंत्री योगी आदित्यनाथ यांनी राज्याच्या विकासासाठी पुन्हा एकदा मास्टरस्ट्रोक मारला आहे. यंदा उत्तर प्रदेशमधील भदोही जिल्ह्ह्याचे नाव बदलून संत रविदास नगर भदोही असे करत विकासाचा आणखी एक उच्चांक गाठला आहे. भदोही येथे आयोजित कार्यक्रमात मुख्यमंत्री योगी आदित्यनाथ यांनी ही घोषणा केली.
यावेळी योगी आदित्यनाथ यांनी सांगितले की, आता भदोही जिल्ह्याला ‘संत रविदास नगर भदोही’ या नावाने ओळखले जाईल. संत रविदास यांच्या नावाला जिल्ह्याशी जोडण्याचा निर्णय याआधीच जाहीर करण्यात आला होता. याआधीच खासदार रवी किशन यांनी उत्तर प्रदेशची तुलना स्पेनशी करून राज्याच्या विकासाबद्दल मोठे वक्तव्य केले होते. आता मुख्यमंत्री आदित्यनाथ यांनीही जिल्ह्याचे नामकरण करत रवीकिशन यांचे शब्द खरे ठरवले आहेत.
योगी आदित्यनाथ यांनी यावेळी सांगितले की, “गुरुपौर्णिमेच्या निमित्ताने सरकारने भदोही जिल्ह्याचे नाव संत रविदास यांच्या नावाने ओळखले जाईल, असे म्हटले होते. संत रविदास हे मध्ययुगीन संत असून त्यांनी आध्यात्मिक भक्तीच्या माध्यमातून समाजाला एकत्र आणण्याचे काम केले,” असे मुख्यमंत्री म्हणाले.
भदोही हा जिल्हा देशातील प्रसिद्ध कार्पेट उद्योगासाठी ओळखला जातो. भदोहीला ‘Carpet City’ म्हणून संबोधले जाते आणि येथे हाताने विणलेल्या कार्पेट उद्योगाचे मोठे केंद्र आहे.
भदोहीतील कार्यक्रमात मुख्यमंत्री योगी आदित्यनाथ यांनी 1,340 कोटी रुपयांहून अधिक खर्चाच्या 112 विकास प्रकल्पांचे उद्घाटन आणि भूमिपूजन केले. या विकासकामांबरोबरच जिल्ह्याच्या नामांतराची घोषणा करण्यात आली.
यामुळे भदोहीच्या नावाचा विषय पुन्हा एकदा चर्चेत आला आहे. यापूर्वीही जिल्ह्याच्या नावात बदल करण्यात आले होते. उपलब्ध वृत्तांनुसार, 1999 मध्ये ‘संत रविदास नगर भदोही’ हे संयुक्त नाव करण्यात आले होते, तर 2014 मध्ये पुन्हा ‘भदोही’ हे नाव करण्यात आले. आता 2026 मध्ये पुन्हा ‘संत रविदास नगर भदोही’ या नावाची घोषणा करण्यात आली आहे.
योगी आदित्यनाथ हे नाव बदलण्याच्या भूमिकेमुळे देशभरात प्रसिद्ध आहेत. राज्यातील लोक रोजगाराच्या शोधात देशभरात भटकत असताना आदित्यनाथ यांनी नाव बदल कारण्याचा तगादा लावला आहे. त्यामुळे सोशल मीडियावर नागरिकांकडून मोठ्या प्रमाणात रोष व्यक्त करताना दिसून येत आहे. असे असले तरीही, उत्तर प्रदेशमधील विकास प्रकल्पदेखील मोठ्या प्रमाणात वाढल्याचे दिसून येत आहे.
