ठाण्यात थायरॉईड कर्करोगाच्या रुग्णांसाठी दिलासादायक बातमी! किम्स हॉस्पिटल्सने सुरू केला पहिला रेडिओआयोडीन थेरपी वॉर्ड

समर्पित न्यूक्लियर मेडिसिन सुविधा उपलब्ध झाल्याने ठाणे परिसरातील रुग्णांना शस्त्रक्रियेनंतरच्या प्रगत उपचारांची सुविधा आता जवळच मिळणार आहे. या उपचारांमुळे पुन्हा एकदा कर्करोग होण्याचा धोका कमी होईल.

ठाणे: विशेष कर्करोग उपचारांची उपलब्धता वाढविण्याच्या दिशेने महत्त्वाचे पाऊल उचलत किम्स हॉस्पिटल्स, ठाणे ने आपल्या न्यूक्लियर मेडिसिन विभागाअंतर्गत ठाण्यातील पहिले समर्पित रेडिओआयोडीन (Iodine-131) थेरपी वॉर्ड सुरू केले आहे. या सुविधेमुळे ठाणे तसेच आसपासच्या जिल्ह्यांतील थायरॉईड कर्करोगाच्या रुग्णांना शस्त्रक्रियेनंतरचा प्रगत उपचार त्यांच्या घराजवळच उपलब्ध होणार आहे.(फोटो सौजन्य – istock)

मासिक पाळीच्या दिवसांमध्ये गरम पाणी पिणे योग्य आहे का? वेदनांपासून आराम मिळण्यासोबतच शरीराला होतील भरमसाट फायदे

थायरॉईड कर्करोगाचे लवकर निदान होऊन योग्य उपचार मिळाल्यास तो सर्वाधिक उपचारक्षम कर्करोगांपैकी एक आहे. त्याचे प्रमाण तुलनेने कमी असून, दर एक लाख लोकसंख्येमागे सुमारे पाच रुग्ण आढळतात. मात्र, हा कर्करोग महिलांमध्ये अधिक प्रमाणात दिसून येतो. अनेक रुग्णांमध्ये शस्त्रक्रियेनंतरही उपचार पूर्ण होत नाहीत. थायरॉईड ग्रंथी पूर्णपणे काढून टाकल्यानंतर उरलेल्या थायरॉईड ऊती किंवा सूक्ष्म कर्करोगाच्या पेशी नष्ट करण्यासाठी रेडिओआयोडीन (Iodine-131) थेरपी देण्याची शिफारस केली जाते. यामुळे कर्करोग पुन्हा होण्याचा धोका कमी करण्यास मदत होते.

रेडिओआयोडीन थेरपीमध्ये किरणोत्सर्गी आयोडीनचा वापर होत असल्याने हा उपचार सक्षम सरकारी नियामक प्राधिकरणांच्या मान्यतेनुसार विशेष प्रकारे तयार केलेल्या आयसोलेशन वॉर्डमध्ये करणे आवश्यक असते. यामुळे रुग्ण, आरोग्यसेवा कर्मचारी आणि सर्वसामान्य नागरिकांची सुरक्षितता सुनिश्चित करता येते.

आतापर्यंत ठाणे आणि आसपासच्या भागातील रुग्णांना या विशेष उपचारासाठी मुंबई किंवा इतर शहरांमध्ये जावे लागत होते. त्यामुळे प्रवासाचा त्रास, अतिरिक्त खर्च तसेच मर्यादित उपलब्धता आणि दीर्घ प्रतीक्षा कालावधीमुळे काही वेळा उपचारास विलंब होत होता. किम्स हॉस्पिटल्स मध्ये नव्याने सुरू करण्यात आलेल्या रेडिओआयोडीन थेरपी वॉर्डमुळे ही सुविधा आता रुग्णांच्या अधिक जवळ उपलब्ध झाली आहे.

या सुविधेच्या उद्घाटनाबाबत बोलताना डॉ. श्वेतल पवार, कन्सल्टंट – न्यूक्लियर मेडिसिन, किम्स हॉस्पिटल्स ठाणे म्हणाल्या, “शस्त्रक्रियेनंतर डिफरेंशिएटेड थायरॉईड कर्करोगाच्या अनेक रुग्णांच्या उपचार प्रक्रियेत रेडिओआयोडीन थेरपी महत्त्वाची भूमिका बजावते. उरलेल्या थायरॉईड ऊती किंवा सूक्ष्म कर्करोगाच्या पेशी नष्ट करून कर्करोग पुन्हा होण्याचा धोका लक्षणीयरीत्या कमी करण्यास या उपचारामुळे मदत होते. ठाण्यातील पहिले समर्पित रेडिओआयोडीन थेरपी वॉर्ड सुरू झाल्यामुळे रुग्णांना लांबचा प्रवास किंवा दीर्घ प्रतीक्षा न करता त्यांच्या घराजवळच हा विशेष उपचार घेता येणार आहे. तसेच, किरणोत्सर्गाच्या सुरक्षिततेचे सर्वोच्च निकष पाळत वेळेवर उपचार देणे शक्य होईल.”

यावेळी बोलताना श्री. सौरभ गुप्ता, प्रादेशिक संचालक ,किम्स हॉस्पिटल्स म्हणाले, “किम्स हॉस्पिटल्स मध्ये आम्ही ज्या समुदायाची सेवा करतो, त्यांच्यापर्यंत प्रगत आरोग्यसेवा पोहोचविण्याचा आमचा सातत्यपूर्ण प्रयत्न असतो. ठाण्यातील पहिले रेडिओआयोडीन थेरपी वॉर्ड सुरू करणे हे कर्करोग उपचारांच्या पायाभूत सुविधा अधिक सक्षम करण्याच्या आणि अत्यंत विशेष उपचार रुग्णांच्या जवळ आणण्याच्या आमच्या वचनबद्धतेचे प्रतीक आहे. या सुविधेमुळे केवळ रुग्णांची गैरसोय कमी होणार नाही, तर वेळेवर उपचारही मिळतील, जे उत्तम उपचारपरिणामांसाठी अत्यंत महत्त्वाचे आहेत.”

Pelvic Floor Exercises: प्रसूतीपूर्वीच लक्ष द्या! पेल्विक फ्लोर व्यायामाचे प्रसूतीनंतरही मिळतात ‘हे’ फायदे

रेडिओआयोडीन थेरपी वॉर्डच्या समावेशामुळे किम्स हॉस्पिटल्सच्या सर्वसमावेशक कर्करोग उपचार सेवांना आणखी बळकटी मिळाली आहे. प्रगत निदान, शस्त्रक्रिया, न्यूक्लियर मेडिसिन आणि विविध वैद्यकीय शाखांच्या समन्वयातून कर्करोग उपचाराची सुविधा एकाच ठिकाणी उपलब्ध करून देण्यात आली आहे.