अमरावती : अमरावती जिल्हा स्त्री रुग्णालयात एसएनसीयू विभागात रविवारी २५ सप्टेंबर रोजी आग लागल्याची घटना घडली. व्हेंटिलेटमध्ये झालेल्या शॉर्टसर्किटमुळे ही आग लागल्याचं समोर आलं आहे. मात्र या आगीमध्ये एका नवजात बालकाचा मृत्यू झाल्याची धक्कादायक घटना घडली असून या बातमीने सर्वत्र हळहळ व्यक्त केली जात आहे. आग लागल्याची बाब लक्षात येताच तातडीने एसएनसीयू विभागातील नवजात शिशूंना इतर ठिकाणी हलवण्यात आले होतं. मात्र रात्री उशिरा यातील एका बालकाचा मृत्यू झाला असल्याची माहिती समोर आली.
अमरावती (Amravati) जिल्हा स्त्री रुग्णालयात ज्यावेळी ही घटना घडली तेव्हा तेथे १२ नवजात बाळं होती. यातील दोन बाळं ही आधीच व्हेंटिलेटरवर असल्याने त्यांची प्रकृती गंभीर होती. अमरावतीच्या रूग्णालयामध्ये उपचारादरम्यान काल रात्री यातील एका बाळाचा मृत्यू झाला.
रविवारी सकाळी अमरावती शहरातील जिल्हा स्त्री रुग्णालयात एका व्हेंटिलेटरने अचानक पेट घेतल्याने एकच खळबळ उडाली होती. तातडीने बाळांना दुसऱ्या वॉर्डमध्ये शिफ्ट करण्यात आले. पण, आगीने आयसीयू वॉर्ड मध्ये धुराचं वातावरण निर्माण झाल्याने रुग्णालयात शिफ्ट केलेल्या एका ११ दिवसांच्या नवजात बाळाचा मृत्यू झाला.
