पुणे : कसबा पेठ विधानसभा मतदारसंघासाठी (Kasba Peth Bypoll) पोटनिवडणूक जाहीर झाली. या निवडणुकीत भाजपकडून हेमंत रासने (Hemant Rasane) यांनी उमेदवारी अर्ज दाखल केला तर महाविकास आघाडीचे उमेदवार म्हणून काँग्रेसच्या (Congress) उमेदवार रवींद्र धंगेकर (Ravindra Dhangekar) यांनी अर्ज दाखल केला. कसबा पेठमध्ये निवडणुकीच्या रिंगणात असलेल्या रासने आणि धंगेकर यांनी उमेदवारी अर्ज भरताना संपत्ती जाहीर केली. यामध्ये दिलेल्या आकडेवारीतून कसब्यातील उमेदवार मालामाल असल्याचेच दिसत आहे.
भाजपच्या हेमंत रासनेंची संपत्ती किती?
हेमंत रासने यांची स्थावर आणि जंगम मालमत्ता १२ कोटी ४९ लाख ४५४ रुपये इतकी आहे. तर रोख रक्कम १ लाख ३५ हजार ९०० रुपये इतकी आणि १० तोळे सोने आहे. याशिवाय, पत्नी मृणाली रासने यांच्या नावाने स्थावर आणि जंगम मालमत्ता ४ कोटी ६२ लाख २६ हजार ८५२ रुपये इतकी आहे. तर रोख रक्कम २२ हजार २०० रुपये इतकी आणि १८ तोळे सोने आहे. रासने यांची एकूण संपत्ती तब्बल १७ कोटी इतकी असून, त्यांचा जमीन खरेदी करणे याकडे जास्त कल असल्याचे दिसत आहे.
कोकणातील रत्नागिरी जिल्ह्यातील दापोली जवळच्या बोरघर, टाळसुरे, तर सिंधुदुर्ग जिल्ह्यातील देवगड जवळील पोंभुर्ले तसेच पुणे जिल्ह्यातील हवेली तालुक्यातील म्हाळुंगे आणि भोर तालुक्यातील गोरड म्हशिवली येथे शेतजमीन आहे. हेमंत रासने आणि त्यांची पत्नी मृणाली रासने अशी दोघांच्या नावे 25 एकरहून अधिक जमीन आहे.
एक इनोव्हा आणि दुचाकी
हेमंत रासने यांनी आपले वार्षिक उत्पन्न ५ लाख ७५ हजार ४१० रुपये रुपये तर पत्नी मृणाली ४ लाख ३० हजार ८३० रुपये इतके दाखवले आहे. तसेच हेमंत रासने यांच्याकडे एक इनोव्हा कार आणि एक दुचाकी वाहन आहे.
एकही गुन्हा दाखल नाही
मुलगा आणि मुलीच्या नावाने जवळपास एक कोटी रुपयांची संपत्ती असल्याचे जाहीर केले आहे. तसेच त्यांच्या नावावर गुन्हेगारी, फौजदारी स्वरूपाचा एकही गुन्हा दाखल नाही, अशी माहिती त्यांनी निवडणूक प्रतिज्ञापत्रात दिली आहे.
काँग्रेसच्या रविंद्र धंगेकर यांची संपत्ती किती?
रविंद्र धंगेकर यांची स्थावर आणि जंगम मालमत्ता ५ कोटी ८८ लाख ९७ हजार १०७ रुपये इतकी आहे. तर रोख रक्कम १ लाख ८० हजार ६० रुपये इतकी आणि १० तोळे सोने आहे. तसेच पत्नी प्रतिभा धंगेकर यांच्या नावे स्थावर आणि जंगम मालमत्ता ४ कोटी ३५ लाख ३६ हजार ८९२ रुपये इतकी आहे. तर रोख रक्कम ३ लाख ५० हजार रुपये इतकी आणि १५ तोळे सोने आहे. त्यांची एकूण संपत्ती तब्ब्ल १० कोटी २४ लाख ३३ हजार ९९९ इतकी आहे.
धंगेकरांवर एकही गुन्हा दाखल नाही
तसेच त्यांच्या नावावर गुन्हेगारी, फौजदारी स्वरूपाचा एकही गुन्हा दाखल नाही, अशी माहिती त्यांनी निवडणूक प्रतिज्ञापत्रात दिली आहे.
ऍक्टिव्हा, रॉयल एनफिल्डही
रवींद्र धंगेकर यांनी आपले वार्षिक उत्पन्न ३ लाख ३६ हजार ९४० रुपये रुपये तर पत्नी प्रतिभा ३ लाख ९८ हजार ४०० रुपये इतके दाखवले आहे. तसेच रवींद्र धंगेकर यांच्याकडे एक होंडा ऍक्टिव्हा, एक रॉयल एनफिल्ड अशी एक दुचाकी वाहन आहे.
मोठी शेतजमीन
रवींद्र धंगेकर यांचे शिक्षण आठवीपर्यंत झाले आहे. ते स्वतः सोने-चांदीचे कारागिरीचा व्यवसाय करत आहेत. तर त्यांच्या पत्नी या शेती तसेच बांधकाम व्यवसाय करत असल्याचे जाहीर केले आहे. त्यांची विशेष करून दौंड तालुक्यातील पिंपळगाव आणि हवेली तालुक्यातील नांदोशी येथे जवळपास दहा एकर शेतजमीन तर पुणे शहरातील कोथरूड येथे पाच गुंठे जागा आहे. रवींद्र धंगेकर आणि त्यांची पत्नी प्रतिभा धंगेकर अशी दोघांच्या नावे १० एकरहून अधिक जमीन आहे. त्याचबरोबर पुणे शहरातील मंगळवार पेठ, रविवार पेठ, कसबा पेठ आणि शिवाजीनगर येथे प्रत्येकी एक फ्लॅट देखील आहे.
.png "Videos"){kind=small}
