फोटो सौजन्य - Social Media
शहरातील मध्यवर्ती आणि गजबजलेल्या जयस्तंभ चौक परिसरात रविवारी दुपारी भीषण आग लागल्याची घटना घडली. या आगीत एकूण सहा दुकाने आगीच्या भक्ष्यस्थानी पडली असून दुकानांतील मोठ्या प्रमाणावर साहित्य जळून खाक झाले. सुदैवाने या घटनेत कोणतीही जीवितहानी झाली नसली, तरी व्यापाऱ्यांचे मोठे आर्थिक नुकसान झाले आहे. मिळालेल्या माहितीनुसार, जयस्तंभ चौकातील भेळ सेंटर, बागवान यांचे फळांचे दुकान, घड्याळाचे दुकान तसेच इतर काही लहान व्यावसायिकांची दुकाने अचानक लागलेल्या आगीमुळे काही वेळातच धगधगू लागली. दुपारच्या सुमारास ही घटना घडल्याने परिसरात धुराचे मोठे लोट पसरले आणि नागरिकांमध्ये भीतीचे वातावरण निर्माण झाले. आगीची माहिती मिळताच स्थानिक नागरिक आणि दुकानदारांनी तातडीने अग्निशमन दलाला कळवले.
घटनेची माहिती मिळताच अग्निशमन दलाची गाडी काही वेळातच घटनास्थळी दाखल झाली. जवानांनी तातडीने पाण्याचा मारा करत आगीवर नियंत्रण मिळवण्यासाठी शर्थीचे प्रयत्न सुरू केले. काही वेळाच्या अथक प्रयत्नांनंतर आगीवर नियंत्रण मिळवण्यात अग्निशमन दलाला यश आले. या दरम्यान स्थानिक सामाजिक कार्यकर्ते गोपाल देव्हडे यांनीही धाडस दाखवत अग्निशमन दलाच्या जवानांसोबत आगीवर नियंत्रण मिळवण्यासाठी मदत केली. त्यांनी स्वतः वॉटर गन हातात घेऊन आग विझविण्याच्या कामात सहभाग घेतला. आग लागल्याची माहिती मिळताच परिसरातील नागरिक, दुकानदार आणि प्रवाशांनी घटनास्थळी मोठी गर्दी केली होती. परिस्थिती नियंत्रणात ठेवण्यासाठी पोलिसांनी तातडीने घटनास्थळी धाव घेतली. त्यांनी नागरिकांना सुरक्षित अंतरावर उभे राहण्याच्या सूचना देत परिस्थिती नियंत्रणात ठेवण्याचा प्रयत्न केला.
या आगीत सहा दुकाने पूर्णपणे जळून खाक झाली असून दुकानांतील साहित्य, उपकरणे आणि मालाचे मोठ्या प्रमाणावर नुकसान झाले आहे. त्यामुळे संबंधित व्यापाऱ्यांवर आर्थिक संकट कोसळले आहे. घटनेची माहिती मिळताच काही स्थानिक लोकप्रतिनिधींनीही घटनास्थळी भेट देत परिस्थितीचा आढावा घेतला. तसेच नुकसानग्रस्त व्यापाऱ्यांना प्रशासनाकडून तातडीने आर्थिक मदत देण्यात यावी, अशी मागणी स्थानिक व्यापारी आणि नागरिकांकडून करण्यात आली.
दरम्यान, घटनास्थळापासून अवघ्या सुमारे २०० मीटर अंतरावर पेट्रोल पंप असल्याने मोठा अनर्थ टळल्याची चर्चा परिसरात सुरू आहे. आग आणखी वाढली असती तर पेट्रोल पंपालाही धोका निर्माण होण्याची शक्यता होती. त्यामुळे अग्निशमन दलाने वेळीच केलेल्या कारवाईमुळे मोठी दुर्घटना टळल्याचे नागरिकांकडून सांगितले जात आहे. सध्या आग नेमकी कशामुळे लागली याबाबत अद्याप अधिकृत माहिती समोर आलेली नाही. शॉर्ट सर्किटमुळे आग लागल्याची शक्यता व्यक्त केली जात असली तरी प्रशासनाकडून याबाबत तपास सुरू आहे. संबंधित विभागाकडून घटनेची चौकशी करून आगीचे नेमके कारण शोधले जाणार असल्याचे सांगण्यात आले आहे.
