मुंबई विद्यापीठाचा कारभार म्हणजे रात्रीस खेळ चाले…; अमित ठाकरेंची जहरी टीका

मुंबई विद्यापीठामधील प्रशासनावर विद्यार्थी संघटना नाराज झाल्या आहेत. विद्यापीठाकडून नोंदणीकृत पदवीधर गटाची अधिसभा निवडणूक स्थगित करण्यात आली आहे. निवडणूक अंतिम टप्प्यामध्ये आल्यानंतर प्रशासनानंतर हा निर्णय दिला आहे. मनसे विद्यार्थी संघटनेचे अध्यक्ष अमित ठाकरे यांनी सोशल मीडियावर पोस्ट करत रोष व्यक्त केला आहे.

फोटो - सोशल मीडिया

Follow Us:

Follow Us:

मुंबई : मुंबई विद्यापीठामधील भोंगळ कारभार समोर आला आहे. विद्यापीठातील अंतिम टप्प्यामध्ये आलेली निवडणूक स्थगित करण्याचा निर्णय घेण्यात आला आहे. नोंदणीकृत पदवीधर गटाची अधिसभेची ही निवडणूक होती. शेवटच्या टप्प्यात असताना मुंबई विद्यापीठ प्रशासनाने ही निवडणूक स्थगित करण्याचा निर्णय घेतला आहे. या निर्णयामुळे विद्यार्थी संघटनांकडून रोष व्यक्त केला जात आहे. प्रशासनाच्या कारभारावर आणि निर्णयावर ताशेरे ओढले जात आहेत. यामध्ये आता महाराष्ट्र नवनिर्माण सेनेचे नेते अमित ठाकरे यांनी देखील प्रतिक्रिया दिली आहे. सोशल मीडियावर पोस्ट करत अमित ठाकरे यांनी कडक शब्दांत नाराजी व्यक्त केली आहे.

महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांनी फेसबुकवर पोस्ट करत आपली नाराजी व्यक्त केली आहे. अमित ठाकरे यांनी लिहिले आहे की,  मुंबई विद्यापीठाचा कारभार म्हणजे ‘फक्त’ रात्रीस खेळ चाले…दिनांक २२ सप्टेंबर २०२४ रोजी मुंबई विद्यापीठाच्या पदवीधर सिनेट निवडणुका पार पडणार होत्या. मात्र, विद्यापीठाने पुन्हा एकदा मागील वेळेसारखंच रात्रीच्या वेळेस एक परिपत्रक काढून निवडणुका अनिश्चित काळासाठी पुढे ढकलल्याचे जाहीर केले आहे.

“ही काही पहिली वेळ नाही. मागील निवडणुका जाहीर झाल्यानंतरही रात्रीच्या वेळीच राजकीय दबावाला बळी पडून परिपत्रक काढले गेले होते. आता दुसऱ्यांदा अशाच प्रकारे सिनेट पदवीधर निवडणुकांसंदर्भात परिपत्रक काढण्यात आले आहे, आणि प्रत्येक वेळी रात्रीच परिपत्रक निघते, त्यामुळे मुंबई विद्यापीठाचा कारभार रात्रीस खेळ चाले या मालिकेसारखा चालू आहे की काय, असा प्रश्न सर्वांना पडला आहे. मुळात कोणतीही निवडणूक, मग ती स्थानिक स्वराज्य संस्थेची असो, विधानसभेची असो, लोकसभेची असो, अथवा मुंबई विद्यापीठाच्या सिनेट निवडणुका असो, या सहकारी व पदाधिकाऱ्यांच्या मेहनतीवर आणि परीश्रमांवर लढवल्या जातात. त्यासाठी राजकीय संघटनांचे, विद्यार्थी संघटनांचे अनेक सहकारी व पदाधिकारी दिवस-रात्र परिश्रम करत असतात. परंतु, मुंबई विद्यापीठाने जर सिनेट पदवीधर निवडणुका जाहीर करून रद्द करण्याचेच धोरण अवलंबले असेल, तर याचा महाराष्ट्र नवनिर्माण विद्यार्थी सेना जाहीर निषेध करते. निवडून आलेले सिनेट सदस्य हे विद्यार्थ्यांच्या न्याय्य हक्कांसाठी लढून त्यांना त्यांचे हक्क मिळवून देतात. त्यामुळेच या निवडणुकांचे गांभीर्य विद्यापीठाला लवकरात लवकर समजले तर बरे होईल”.

हे देखील वाचा : जुहू चौपाटीवर मुख्यमंत्री एकनाथ शिंदेंनी स्वतः केली स्वच्छता; समुद्र किनारे स्वच्छ ठेवण्याचे आवाहन

पुढे त्यांनी लिहिले आहे की, “मागील वेळीसुद्धा जेव्हा विद्यापीठाने निवडणुका रद्द केल्या होत्या, तेव्हा मी स्वतः पत्रकार परिषद घेऊन या बाबतीत मुंबई विद्यापीठाच्या अनाकलनीय कारभाराचा जाहीर निषेध केला होता. मुंबई विद्यापीठ हे राजकीय दबावाला बळी पडत असून, एक स्वतंत्र यंत्रणा म्हणून त्यांनी काम करणे अपेक्षित आहे. परंतु, त्यांची ही भूमिका संशयास्पद आहे. म्हणूनच यावेळी जेव्हा मुंबई विद्यापीठाने पुन्हा निवडणुका जाहीर केल्या, त्याचवेळी महाराष्ट्र नवनिर्माण विद्यार्थी सेनेने या निवडणुकांचा सखोल अभ्यास केला आणि निवडणुका कायद्याला धरून नसल्याचे लक्षात आल्याने, त्या पुन्हा पुढे ढकलल्या जातील अशी शक्यता आधीच व्यक्त केली. माझे सहकारी निवडणूक लढवण्याच्या बाजूने होते. त्यांचा सन्मान राखत, त्यांना विद्यापीठाचा भविष्यातील भोंगळ कारभार समजावून सांगितला आणि त्यांनाही परिस्थितीची जाणीव झाली. त्यामुळेच माझ्या सहकारी आणि पदाधिकाऱ्यांचे परीश्रम वाया जाऊ नयेत, म्हणून आम्ही २२ सप्टेंबर २०२४ रोजी होणाऱ्या सिनेट पदवीधर निवडणुका न लढवण्याचा निर्णय घेतला.”

“काल मुंबई विद्यापीठाने परिपत्रक काढून निवडणुका अनिश्चित काळासाठी पुढे ढकलल्या आहेत, हे पाहून आम्ही घेतलेला निर्णय योग्य असल्याचे सिद्ध झाले आहे. मुंबई विद्यापीठ प्रशासनाला लवकरच निवडणुकीचा चालवलेला हा खेळ बंद करण्याची सद्बुद्धी येवो, ही अपेक्षा व्यक्त करतो !!!”

Web Title: Amit thackeray criticized administration of mumbai university

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com