Chandrapur News: शासकीय कार्यालयातच अस्वच्छतेचे साम्राज्य! पिण्याच्या पाण्यापासून प्रसाधनगृहांपर्यंत... सर्वत्र दयनीय अवस्था
नागरिकांसाठी बसविण्यात आलेल्या पिण्याच्या पाण्याच्या आरओ यंत्रणेजवळच खर्रा थुंकण्यात येत असल्याने पिण्याच्या पाण्याच्या स्वच्छतेचा प्रश्न निर्माण झाला आहे. इमारतीच्या भिंती, कोपरे आणि जिन्यांच्या परिसरात खर्राच्या पिचकाऱ्या मारण्यात आल्या असून, रिकाम्या पुड्या आणि इतर कचरा सर्वत्र पडलेला आहे. इमारतीच्या वरील मजल्यावरही मोठ्या प्रमाणात कचरा साचून असल्याचे चित्र आहे. (फोटो सौजन्य – AI Created)
संबंधित प्रशासनाने या प्रकाराची तातडीने दखल घेऊन इमारतीची नियमित स्वच्छता करावी, प्रसाधनगृहांमध्ये पाण्याची व्यवस्था करावी, परिसरातील झुडपे हटवावीत तसेच सार्वजनिक ठिकाणी धुंकून अस्वच्छता करणाऱ्यांवर कारवाई करावी, अशी मागणी नागरिकांकडून होत आहे.
इमारतीतील प्रसाधनगृहांची अवस्था अत्यंत दयनीय झाली असून, तेथे पाण्याची पुरेशी व्यवस्था नसल्याने नागरिकांची मोठी गैरसोय होत आहे. विशेषतः महिला, ज्येष्ठ नागरिक आणि दिव्यांगांना याचा त्रास सहन करावा लागत आहे. दुसरीकडे, इमारतीच्या सभोवताल झुडपे वाढली असून परिसरात स्वच्छतेचा पूर्ण अभाव दिसून येतो. त्यामुळे साप, विंचू यांसारख्या विषारी जीवजंतूंचा वावर होण्याची भीतीही व्यक्त केली जात आहे.
सिंदेवाही तालुक्याचे प्रमुख प्रशासकीय केंद्र असल्याने या भवनात दररोज शेकडो शेतकरी, विद्यार्थी आणि नागरिक विविध कामांसाठी येतात. मात्र, शासकीय कार्यालयाच्या इमारतीतच स्वच्छतेचा अभाव असल्याने नागरिकांना दुर्गंधी आणि अस्वच्छतेचा सामना करावा लागत आहे. शासनाने जनतेच्या कररूपाने जमा झालेल्या पैशातून उभारलेल्या या वास्तूची योग्य देखभाल होत नसेल, तर कोट्यवधींचा खर्च करून अशा इमारती उभारण्याचा उपयोग काय, असा प्रश्नही नागरिक उपस्थित करीत आहेत.






