शनिवार, 24 ऑक्टोबर 2026
Chandrapur News: चंद्रपुरात पाणीटंचाईचे संकट! वर्धा नदीतील पाणीसाठा घटल्याने चिंता, जलसंकटावर कायमस्वरूपी उपायाची गरज
जलसंकटाची तीव्रता वाढण्यापूर्वीच पाण्याचे नियोजन करण्यासाठी जिल्हा प्रशासन, एमआयडीसी प्रशासन, विविध उद्योगांचे व्यवस्थापन आणि औद्योगिक संघटनांमध्ये बैठकांचे सत्र सुरू झाले आहे. उद्योगांना पाणी काटकसरीने वापरण्याच्या सूचना देण्यात येत असून, उपलब्ध जलसाठ्याचा जपून वापर करण्यावर भर दिला जात आहे. मात्र, नदीतील पाण्याची उपलब्धता आणखी घटल्यास औद्योगिक उत्पादनावर त्याचे गंभीर परिणाम होण्याची शक्यता नाकारता येत नाही.
चंद्रपूर जिल्ह्यातील औद्योगिक क्षेत्र, कोळसा खाणी आणि शेतीसाठी वर्धा नदी महत्त्वाचा जलस्रोत मानली जाते. चंद्रपूर, ताडाळी, घुग्घुस, वरोरा आणि बल्लारपूरसह चंद्रपूर शहरातील एमआयडीसी क्षेत्रातील अनेक उद्योगांची पाण्याची गरज या नदीवर अवलंबून आहे. (फोटो सौजन्य – AI Created)
औद्योगिक क्षेत्रातील पाण्याची वाढती गरज आणि घटती उपलब्धता लक्षात घेऊन एमआयडीसी प्रशासनाने पाणीबचतीसाठी उपाययोजना करण्यास सुरुवात केली आहे. उद्योग परिसरात पाण्याचा काटकसरीने वापर करण्याच्या सूचना दिल्या जात आहेत. त्याचबरोबर नोव्हेंबर महिन्यापासून सर्व संबंधित उद्योगांचा पाणीपुरवठा आठवड्यातून एक दिवस पूर्णपणे बंद ठेवण्याच्या पर्यायावर विचार सुरू आहे.
वर्धा नदीवरील धानोरा परिसरात बॅरेज उभारण्याचा प्रस्ताव अनेक वर्षांपासून प्रलंबित आहे. या बॅरेजची उभारणी झाल्यास औद्योगिक क्षेत्राला पाणीपुरवठा करण्यासोबतच चंद्रपूर शहराच्या पिण्याच्या पाण्याच्या प्रश्नावरही काही प्रमाणात दिलासा मिळू शकला असता. मात्र, हा प्रस्ताव प्रत्यक्षात न आल्याने पाणीसाठा आणि नियोजनाचा प्रश्न कायम आहे.
कांदा उत्पादक शेतकऱ्यांना पाणी टंचाईचा बसतोय मोठा फटका; दुष्काळाच्या चाहुलीने शेतकरी धास्तावले
यंदा वर्धा नदीला पूरस्थिती निर्माण झाली होती. मात्र, पाणी साठवून ठेवण्यासाठी आवश्यक असलेल्या बॅरेजच्या अभावामुळे पुराचे मोठ्या प्रमाणातील पाणी पुढे वाहून गेले. ते पाणी वैनगंगा आणि प्राणहिता नद्यांच्या प्रवाहातून गोदावरी नदीत मिसळले. पावसाळ्यात उपलब्ध होणारे पाणी साठवून त्याचा उन्हाळ्यात आणि टंचाईच्या काळात उपयोग करता आला असता, अशी चर्चा आता पुन्हा सुरू झाली आहे.
