शनिवार, 24 ऑक्टोबर 2026
Raigad News: सुपारीच्या बागा करपल्या, कच्ची फळे गळाली; तीव्र उष्णतेने बागायतदार संकटात, पंचनामे करून मदत देण्याची मागणी
कांदा उत्पादक शेतकऱ्यांना पाणी टंचाईचा बसतोय मोठा फटका; दुष्काळाच्या चाहुलीने शेतकरी धास्तावले
काही भागांत ५० ते ७० टक्क्यांपर्यंत फळगळ झाल्याचा अंदाज बागायतदारांनी व्यक्त केला आहे. त्यातच ऑक्टोबर हीटमुळे उत्पादनाबाबतची चिंता वाढली असून, भविष्यात अल निनोच्या संभाव्य प्रभावामुळेही सुपारी उत्पादनावर परिणाम होण्याची भीती व्यक्त होत आहे. त्यामुळे शासनाने तातडीने नुकसानीचे पंचनामे करून आर्थिक भरपाई द्यावी, अशी मागणी अलिबाग तालुका नारळ सुपारी प्रक्रिया सहकारी संस्थेच्या वतीने करण्यात आली आहे. (फोटो सौजन्य – AI Created)
अलिबागसह रायगड जिल्ह्यातील कोकण किनारपट्टीवर सुपारी हे बागायतदारांचे महत्त्वाचे नगदी पीक आहे. वर्षभर बागांची निगा राखणे, खते देणे, औषध फवारणी करणे आणि पाणीपुरवठा यासाठी बागायतदार मोठा खर्च करतात. मात्र, यंदाच्या तीव्र उन्हामुळे सुपारीचे घोस करपून जाणे आणि कच्ची फळे गळून पडण्याचे प्रकार वाढले आहेत. परिणामी, अपेक्षित उत्पन्न कमी होण्याची शक्यता आहे आणि फळबाग मालकांना आर्थिक नुकसानीचा सामना करावा लागत आहे.
कृषी विभागाने बाधित क्षेत्राचे तातडीने सर्वेक्षण करून नुकसानीची नोंद घ्यावी आणि पात्र बागायतदारांना आर्थिक मदत जाहीर करावी, अशी मागणी करण्यात येत आहे. बदलते हवामान, चक्रीवादळे, वाढते तापमान आणि पाण्याची अनिश्चित उपलब्धता यामुळे या बागा टिकवून ठेवणे आणि त्यातून अपेक्षित उत्पादन घेणे दिवसेंदिवस कठीण होत आहे.
वर्षभर मेहनत करून सुपारीचे पीक हातातोंडाशी आले असताना तीव्र उन्हामुळे मोठ्या प्रमाणावर फळगळ झाली आहे. त्यामुळे बागायतदारांचे मोठे आर्थिक नुकसान होत आहे. शासनाने या परिस्थितीची तातडीने दखल घेऊन नुकसानीचे पंचनामे करावेत आणि बागायतदारांना नुकसानभरपाई द्यावी. – रमेश नाईक, अध्यक्ष, सुपारी संस्था
रायगडमधील सुपारी उत्पादकांना गेल्या काही वर्षांत निसर्ग चक्रीवादळ आणि त्यानंतरच्या तौवते चक्रीवादळाचा मोठा फटका बसला होता. विशेषतः श्रीवर्धन, मुरूड आणि अलिबाग तालुक्यांतील अनेक सुपारी बागांचे नुकसान झाले. वादळाच्या तडाख्यात सुपारीची हजारो झाडे उन्मळून पडली, तर काही बागा उद्धवस्त झाल्या. त्यामुळे सुपारी उत्पादनावर दीर्घकालीन परिणाम झाला आहे. या नुकसानीतून सावरण्याचा प्रयत्न सुरू असतानाच आता तीव्र उष्णता आणि पाण्याच्या कमतरतेमुळे बागायतदारांसमोर नवे संकट उभे राहिले आहे.
