रविवार, 15 नोव्हेंबर 2026
विनाहेल्मेट शासकीय कर्मचाऱ्यांवर पोलिसांचा सर्जिकल स्ट्राइक!
पोलिस विभागासह सर्व शासकीय कार्यालयांमध्येही दुचाकी वापरणाऱ्या कर्मचारी अधिकारी यांनी हेल्मेट वापरावे, अशा सूचना देण्यात आल्या होत्या. या सूचनेच्या अनुषंगाने ११ ऑगस्ट रोजी वाहतूक शाखेच्या वतीने शहरातील विविध भागातील शासकीय कार्यालयांमध्ये विना हेल्मेट दुचाकी वापरणाऱ्या वाहन चालकांच्या विरोधात कारवाई सुरू केली.
या कारवाई अंतर्गत विभागीय आयुक्त कार्यालय, जिल्हाधिकारी कार्यालय, जिल्हा परिषद कार्यालय, जीएसटी भवन, आरोग्य संचालनालय, जीवन प्राधिकरण कार्यालय, पशू वैद्यकीय सर्व चिकित्सालय, महाराष्ट्र राज्य माध्यमिक व उच्च माध्यमिक कार्यालय, वन विभाग, ज्ञान वैज्ञानिक प्रयोगशाळा, शासकीय मेंढी पालन केंद्र तसेच इतर कार्यालयांसमोर विना हेल्मेट मोटारसायकलवरून कार्यालयांमध्ये प्रवेश करणाऱ्या ३०३ अधिकारी कर्मचारी यांच्यावर दंडात्मक कारवाई करण्यात आली आहे.
या कारवाईत तीन लाख तीन हजारांचा दंड ठोठविण्यात आला. ही कारवाई पोलिस आयुक्त प्रवीण पवार, पोलिस उपायुक्त शर्मिष्ठा घारगे वालावलकर, सहायक पोलिस आयुक्त सुभाष भुजंग, यांच्या मार्गदर्शनाखाली पोलिस निरीक्षक मंगेश जगताप, रेखा लोंढे, पवन चौधरी यांच्यासह सहायक पोलिस निरीक्षक सचिन मिरघे यांच्या पथकाने केली.
शहरातील सर्व शासकीय, निमशासकीय कार्यालयातील अधिकारी व कर्मचारी यांनी दुचाकी चालविताना हेल्मेटचा वापर करावा, हेल्मेट केवळ पोलिसांच्या दंडापासून वाचविण्यासाठी नसून, स्वतःच्या मौल्यवान जीवनाच्या रक्षणासाठी आहे. हेल्मेट वापरण्याची शिस्त सर्वांना लागावी.
