बुधवार, 12 ऑगस्ट 2026
बजाज ऑटोच्या वाळूज प्लांटवर ‘कमवा अन् शिका’च्या विद्यार्थ्यांचे काम बंद आंदोलन
वाळूज औद्योगिक वसाहतीतील बजाज ऑटो कंपनीच्या प्लांटसमोर मंगळवारी सकाळी विद्यार्थ्यांनी आंदोलन सुरू केले. ‘कमवा आणि शिका’ या योजनेच्या माध्यमातून कंपनीत प्रशिक्षणार्थी म्हणून काम करणाऱ्या या विद्यार्थ्यांना तीन वर्षांचे प्रशिक्षण पूर्ण केल्यानंतर डिग्री देण्याचे आश्वासन कंपनीकडून देण्यात आले होते. मात्र प्रत्यक्षात अनेक विद्याथ्यांचे अद्याप प्रवेशच झालेले नाही, तर ज्या विद्याथ्यांचे प्रवेश झाले त्यांचा तीन वर्षांचा प्रशिक्षण कालावधी पूर्ण होऊनही त्यांना डिग्री दिलेली नाही, असा आरोप विद्यार्थ्यांनी केला.
आंदोलनात प्रशिक्षणार्थी विद्यार्थी सहभागी मोठ्या संख्येने सहभागी झाले होते. पोलिसांनीदेखील मोठ फौजफाटा तैनात केला होता. सलग तीन वर्षे राबवूनही डिग्री मिळत नसल्याने तसेच प्रवेश, कागदपत्रांच्या गोंधळामुळे आपले भवितव्य टांगणीला लागल्याचा आरोप करत विद्यार्थ्यांनी हे आंदोलन छेडले. यामुळे कंपनीच्या मुख्य प्रवेशद्वारावर काही काळ तणावाचे वातावरण निर्माण झाले होते. २०२४ मध्ये अनेक विद्यार्थ्यांची कागदपत्रे नामंजूर झाली होती, मात्र त्याची माहिती त्यांना देण्यात आली नाही. ही बाब जुलै २०२६ मध्ये समोर आल्याचे विद्यार्थ्यांनी सांगितले. पात्र विद्यार्थ्यांना पदवी देण्याची मागणी आंदोलकांनी केली.
आंदोलनात महाराष्ट्र नवनिर्माण सेनेने (मनसे) सहभाग घेत विद्यार्थ्यांच्या मागण्यांसाठी आक्रमक भूमिका घेतली. आंदोलनाची दखल घेत मनसे पदाधिकारी, बजाज ऑटोचे प्रतिनिधी, आउटसोर्सिंग कंपनी ‘टीमलीज’चे अधिकारी आणि पोलीस प्रशासन यांच्यात एक संयुक्त बैठक पार पडली. विद्याथ्यांच्या मागण्यांवर सकारात्मक चर्चा झाल्यानंतर ‘टीमलीज’ कंपनीने मनसेच्या पदाधिकाऱ्याना लेखी पत्र दिले असून, विद्यार्थ्यांच्या हिताचा निर्णय घेण्याचे आश्वासन दिले. त्यानंतरच विद्यार्थ्यांनी आंदोलन मागे घेतल्याचे सूत्रांनी म्हटले आहे. विद्यार्थ्यांच्या पदवी आणि इतर हक्काच्या प्रश्नांवर अंतिम तोडगा काढण्यासाठी बजाज कंपनीचे सर्वेसर्वा राजीव बजाज हे येत्या काही दिवसांत मनसे अध्यक्ष राज ठाकरे यांची प्रत्यक्ष भेट घेणार आहेत. या विषयावर अधिक सविस्तर चर्चा करण्यासाठी पुढील चार दिवसांनंतर एक महत्त्वाची बैठक नियोजित करण्यात आली आहे. त्यामुळे या बैठकीकडे सर्वांचे लक्ष लागले आहे.
