कुणबी नोंदींच्या प्रमाणपत्रांचे काम वेगात, विखे पाटलांचे कौतुक; पण मनोज जरांगे यांनी व्यक्त केली ‘ही’ मोठी शंका

मराठा आरक्षण नेते मनोज जरांगे पाटील यांनी छत्रपती संभाजीनगरमध्ये ५८ लाख कुणबी नोंदींच्या प्रमाणपत्रांबाबत महत्त्वाची माहिती दिली. त्यांनी महसूलमंत्री राधाकृष्ण विखे पाटील यांच्या कामाचे कौतुक केले असून सर्व निर्णयांच्या लेखी आदेशांची मागणी केली आहे.

 

• कुणबी नोंदींच्या प्रमाणपत्रांचे काम वेगात
• विखे पाटलांचे कौतुक
• पण मनोज जरांगे यांनी व्यक्त केली ‘ही’ मोठी शंका

छत्रपती संभाजीनगर, (शहर प्रतिनिधी): हैद्राबाद गॅझेटमधील ५८ लाख कुणबी नोंदीधारकांना प्रमाणपत्रे देणे तसेच यापूर्वी वितरित केलेल्या प्रमाणपत्रांची वैधता निश्चित करून मराठा आरक्षणाचा प्रश्न मार्गी लावण्याचे काम राज्य सरकारने, विशेषतः मुख्यमंत्री देवेंद्र फडणवीस यांनी पक्के मनावर घेतल्याचे दिसत आहे. सध्या ही जलदगतीने सुरू असून, नुकत्याच झालेल्या आरक्षण उपसमितीच्या बैठकीला सात ते आठ मंत्र्यांची उपस्थिती होती. यावरून सरकारची गंभीरता दिसून येत असल्याची माहिती मराठा आरक्षण आंदोलनाचे नेते मनोज जरांगे यांनी दिली. मात्र, प्रक्रिया सुरू असली तरी ती अर्ध्यावर येऊन थांबणार नाही ना, अशी शंकाही त्यांनी व्यक्त केली.

जरांगे हे शहरातील एका खासगी रुग्णालयात उपचार घेत असून, बुधवारी सकाळी त्यांनी माध्यमांशी संवाद साधला. सरकारने काही मागण्यांबाबत सकारात्मक भूमिका घेतली असली तरी अनेक महत्त्वाचे प्रश्न अद्याप निकाली निघाले नसल्याचे त्यांनी सांगितले.

आंदोलनातील मृतांच्या कुटुंबीयांना मदत, शिंदे समितीला एक वर्षांची मुदतवाढ आणि मराठा-कुणबी मंत्रालय स्थापन करण्याबाबतची माहिती मिळाली असली तरी ती अद्याप अधिकृत झालेली नाही. मात्र, या विषयांवर चर्चा सुरू असून सर्व कामे पूर्ण होतील, असा विश्वास त्यांनी व्यक्त केला.

“फडणवीस आणि भाजपचे सरकार हे आश्वासनांचा कारखाना आणि फसवणुकीचा ब्रँड,” विजय वडेट्टीवार यांची घणाघाती टीका

नोंदीधारकांसाठी शिबिरांचे आयोजन करण्यात येणार असून शासनाची यंत्रणा घरोघरी जाऊन प्रक्रिया पूर्ण करणार असल्याची माहितीही त्यांनी दिली. दरम्यान, कुणबी नोंदी नाकारणाऱ्या अधिकाऱ्यांवर कारवाई होणार की नाही याबाबत अधिकृत आदेशाची प्रतीक्षा असल्याचे सांगत सरकारने सर्व निर्णय लेखी स्वरूपात द्यावेत, अशी मागणी त्यांनी केली.

विखे पाटलांचे कौतुक

आरक्षण उपसमितीचे अध्यक्ष राधाकृष्ण विखे पाटील चांगले काम करत असून त्यांना मुख्यमंत्री देवेंद्र फडणवीस यांचे पाठबळ मिळत असल्याचेही जरांगे यांनी नमूद केले. ५८ लाख कुणबी नोंदींच्या पडताळणी व प्रमाणपत्र वितरण प्रक्रियेसाठी प्रशासनाने काम सुरू करण्याचे आश्वासन दिले असून, जिल्हाधिकारी स्तरावर कार्यवाही होणार असल्याची माहिती त्यांनी दिली.

सचिव स्तरावरून स्पष्ट आदेश काढणे आवश्यक

लवकरच शाळा, महाविद्यालयीन प्रवेश प्रक्रिया सुरू होत असल्याने विद्यार्थ्यांना कोणतीही अडचण येऊ नये, यासाठी सचिव स्तरावरून स्पष्ट आदेश काढणे आवश्यक असल्याचे त्यांनी स्पष्ट केले.

Maratha Reservation वर दादा भुसे यांचे वक्तव्य, “सरकार मागण्या पूर्ण करण्यासाठी प्रयत्नशील”