मंगळवार, 3 नोव्हेंबर 2026
फोटो सौजन्य AI
४ नोव्हेंबर रोजी यासाठी विशेष समारंभ आयोजित करण्यात आला आहे. यामध्ये ६७४ विशेषज्ञ डॉक्टर आणि ७६६ एमबीबीएस डॉक्टरांचा समावेश आहे. या नियुक्त्यांमुळे ग्रामीण, दुर्गम आणि आदिवासी भागातील आरोग्य सेवेला मोठा आधार मिळणार आहे.
राज्यातील वैद्यकीय अधिकारी संवर्गातील एकूण २ हजार ५१४ पदांपैकी १ हजार ४४० पदांसाठी २७ फेब्रुवारी २०२६ रोजी भरतीची जाहिरात प्रसिद्ध करण्यात आली होती. या भरती प्रक्रियेत ६७४ विशेषज्ञ वैद्यकीय अधिकारी आणि ७६६ एमबीबीएस वैद्यकीय अधिकाऱ्यांची निवड करण्यात आली आहे.
या डॉक्टरांना ४ नोव्हेंबर रोजी नियुक्ती आदेश दिले जाणार आहेत. विशेषज्ञ डॉक्टरांमुळे ग्रामीण रुग्णालये, उपजिल्हा रुग्णालये आणि जिल्हा रुग्णालयांमधील विविध उपचार सेवांना बळ मिळेल. तर एमबीबीएस डॉक्टरांमुळे प्राथमिक आरोग्य केंद्रांमधील नियमित रुग्णसेवा अधिक सक्षम होण्यास मदत होणार आहे.
Pune Weather: ऑक्टोबरमध्ये पावसाने पुणेकरांना दाखवला ठेंगा! ११ वर्षांत यंदा केवळ ‘इतका’ पाऊस
राज्यातील अनेक ग्रामीण, डोंगराळ आणि आदिवासी भागांमध्ये डॉक्टरांची पदे रिक्त असल्यामुळे नागरिकांना उपचारांसाठी मोठ्या शहरांकडे धाव घ्यावी लागते. नव्या नियुक्त्यांमुळे स्थानिक पातळीवरच तपासणी, निदान आणि उपचार उपलब्ध होण्यास मदत होणार आहे.
विशेषतः प्रसूती, अपघात, सर्पदंश, संसर्गजन्य आजार आणि अन्य आपत्कालीन परिस्थितींमध्ये वेळेवर वैद्यकीय मदत मिळण्याची शक्यता वाढेल. माता व बाल आरोग्य सेवा, नियमित तपासणी आणि विविध आजारांवरील उपचारांनाही गती मिळणार आहे.
वैद्यकीय अधिकाऱ्यांची संख्या वाढल्याने सध्या कार्यरत असलेल्या डॉक्टरांवरील कामाचा अतिरिक्त भार कमी होण्यास मदत होईल. शासकीय रुग्णालयांमधील बाह्यरुग्ण विभाग, आंतररुग्ण विभाग, आपत्कालीन सेवा आणि तपासणी प्रक्रियेत अधिक कार्यक्षमता निर्माण होण्याची अपेक्षा आहे.
यासंदर्भात सार्वजनिक आरोग्यमंत्री प्रकाश आबिटकर यांनी सांगितले की, गरीब, गरजू आणि ग्रामीण भागातील नागरिकांना दर्जेदार आरोग्यसेवा जवळच उपलब्ध करून देणे हा शासनाचा प्राधान्यक्रम आहे. नवनियुक्त डॉक्टरांनी सेवाभाव आणि रुग्णकेंद्रित दृष्टिकोन ठेवून काम करावे, असे आवाहनही त्यांनी केले. या नियुक्त्यांमुळे राज्याच्या सार्वजनिक आरोग्य व्यवस्थेच्या बळकटीकरणाला नवी दिशा मिळण्याची अपेक्षा आहे.
