मंगळवार, 3 नोव्हेंबर 2026
फोटो सौजन्य AI
जेव्हा या घटनेची माहिती समजली तेव्हा जगभरात एकच खळबळ उडाली आणि चर्चा सुरु झाल्या कि या हल्ल्यामागे कोण आहे .काही काळातच या हल्ल्यामागे उत्तर कोरियाचे हॅकर्स असल्याचा आरोप अमेरिकेच्या फेडरल ब्युरो ऑफ इन्व्हेस्टिगेशनने (FBI) केला. मात्र, उत्तर कोरियाने हे आरोप फेटाळून लावत अमेरिकेची घोषणा म्हणजे ‘क्षुल्लक चिथावणी’ असल्याचे म्हटले आहे.
बायनान्सने शुक्रवारी झालेल्या सायबर चोरीत ६ अब्ज डॉलरपेक्षा अधिक किमतीची डिजिटल मालमत्ता चोरीला गेल्याचे सांगितले. ही घटना क्रिप्टोकरन्सी क्षेत्रातील आतापर्यंतच्या सर्वात मोठ्या चोरींपैकी एक मानली जात आहे. या प्रकरणाचा तपास करताना अमेरिकेच्या FBI ने उत्तर कोरियाशी संबंधित हॅकर्सवर संशय व्यक्त केला. ‘TraderTraitor’ या हॅकिंग गटाने हा हल्ला केल्याचा आरोप करण्यात आला आहे.
यातील एका आरोपीचा चेहरा सुद्धा FBI ने नोटीस काढून जाहीर केला आहे . याच गटाचा मागील वर्षी झालेल्या बायबिट एक्स्चेंजवरील मोठ्या सायबर हल्ल्याशीही संबंध जोडण्यात आला होता.
US Midterm Elections : अमेरिकेत मतदान सुरु; ट्रम्प यांची वाढली धाकधूक
उत्तर कोरियाचे सर्वोच्च नेते किम जोंग उन यांच्या बहीण किम यो जोंग यांनी अमेरिकेच्या आरोपांवर तीव्र प्रतिक्रिया दिली. जगातील कोणत्याही मोठ्या सायबर गुन्ह्याचा संबंध उत्तर कोरियाशी जोडण्याची अमेरिकेची सवय असल्याचा आरोप त्यांनी केला. FBI च्या घोषणेला त्यांनी ‘क्षुल्लक चिथावणी’ आणि ‘बिनबुडाचे वक्तव्य’ असे संबोधले.
अमेरिकेकडून आंतरराष्ट्रीय समुदायात उत्तर कोरियाबद्दल गैरसमज पसरवण्याचा प्रयत्न सुरू असल्याचेही त्यांनी म्हटले. या आरोपांमुळे अमेरिकेचा उत्तर कोरियाबद्दलचा शत्रुत्वाचा दृष्टिकोन पुन्हा स्पष्ट झाल्याचा दावा त्यांनी केला.
या घटनेनंतर बायनान्सच्या सुरक्षेवर आणि ग्राहकांच्या डिजिटल मालमत्तेच्या संरक्षणावर प्रश्न उपस्थित झाले आहेत. कंपनीने चोरीमुळे प्रभावित झालेल्या मालमत्तेतील मोठा हिस्सा स्वतःच्या निधीतून भरून काढण्याची व्यवस्था केल्याचे सांगितले आहे. दरम्यान, उत्तर कोरियाकडून क्रिप्टोकरन्सी चोरी आणि सायबर गुन्ह्यांच्या माध्यमातून परकीय चलन मिळवले जात असल्याचा आरोप आंतरराष्ट्रीय स्तरावर यापूर्वीही करण्यात आला आहे.
अशा निधीचा वापर देशाच्या अण्वस्त्र कार्यक्रमासाठी होत असल्याचा दावा काही तज्ज्ञांनी केला आहे. मात्र, बायनान्स चोरीप्रकरणी उत्तर कोरियाचा सहभाग असल्याचा अमेरिकेचा आरोप आणि उत्तर कोरियाचा इन्कार यामधील सत्य तपासातून स्पष्ट होणे बाकी आहे.
