Top Marathi News today Live
Marathi Breaking news live updates : बीड हत्या प्रकरणामुळे राज्यामध्ये मागील दोन महिन्यांपासून राजकारण रंगले आहे. बीडमधील मस्साजोग गावाचे सरपंच संतोष देशमुख यांची हत्या करण्यात आली. या प्रकरणामध्ये अनेक धक्कादायक खुलासे समोर येत आहेत. भाजपचे आमदार सुरेश धस यांनी आणखी एक मोठा दावा केला आहे. मस्साजोगचे सरपंच संतोष देशमुख यांना अनैतिक संबंधाच्या माध्यमातून बदनाम करण्याचा प्रयत्न होता, असा आरोप भाजप आमदार सुरेश धस यांनी केला. सुरेश धस म्हणाले की, सरपंच संतोष देशमुखांच्या हत्येनंतर त्यांना बदनाम करण्याचा प्लॅन आखण्यात आला होता. त्यासाठी कळंबमध्ये एक बाईही तयार ठेवण्यात आली होती. आरोपींनी कळंबमध्ये एक महिला तयार ठेवली होती. तिच्यासोबत काहीतरी झटापट झाल्याचे दाखवायचे आणि संतोष देशमुखांना मारले असे दाखवायचे होते. पण त्या आधीच जीव गेल्याने आरोपींचा प्लॅन अयशस्वी झाल्याचे धस यांनी सांगितले.
20 Feb 2025 06:24 PM (IST)
कल्याणहून दादरला जाणाऱ्या लोकल ट्रेनमध्ये एक खळबळजनक प्रकार घडला. एका तरुणाने डब्यातील तीन प्रवाशांवर अचानक चाकू हल्ला करत त्यांना गंभीर जखमी केल्याचे समोर आले आहे.
20 Feb 2025 05:47 PM (IST)
बनावट कागदपत्रांच्या आधारे मुख्यमंत्री सदनिका लाटल्याच्या प्रकरणात राज्याचे कृषीमंत्री माणिकराव कोकाटे यांना न्यायालयाने दोषी ठरवले. दोन वर्ष कारावासाची शिक्षा सुनावल्यानंतर महाराष्ट्राचे कृषिमंत्री ॲड. माणिकराव कोकाटे यांनी वकिलांमार्फत जामिनासाठी केलेला अर्ज न्यायालयाने मंजूर केला. शिक्षेच्या निकालाविरोधात उच्च न्यायालयात दाद मागणार असल्याचे ॲड. कोकाटे यांनी म्हटले आहे.
20 Feb 2025 05:15 PM (IST)
दिल्लीच्या नवीन मंत्रिमंडळात मुख्यमंत्री रेखा गुप्ता यांनी गृह, वित्त आणि नियोजन विभागांचा कार्यभार स्वीकारला आहे. प्रवेश वर्मा यांना शिक्षण आणि वाहतूक खाते देण्यात आले आहे. मनजिंदर सिंग सिरसा यांना आरोग्य खाते, रवींद्र कुमार यांना समाज कल्याण खाते, कपिल मिश्रा यांना जल खाते, अशोक सूद यांना महसूल खाते आणि पंकज कुमार सिंग यांना कायदा खाते देण्यात आले.
20 Feb 2025 04:37 PM (IST)
२०२५ च्या चॅम्पियन्स ट्रॉफीमध्ये टीम इंडियाच्या पहिल्याच सामन्यात, भारतीय कर्णधार रोहित शर्माने एक चूक केली ज्यामुळे टीम इंडियाचा अष्टपैलू खेळाडू अक्षर पटेलसह भारतीय क्रिकेट चाहत्यांचे मन तुटले. दुबईमध्ये बांगलादेशविरुद्ध टीम इंडियाच्या पहिल्या सामन्यात, फिरकी गोलंदाज अक्षर पटेल त्याची हॅट्ट्रिक पूर्ण करण्याच्या जवळ होता पण कर्णधार रोहितने एक अतिशय सोपा झेल सोडला आणि अक्षर पटेलला इतिहास रचण्यापासून रोखले.
20 Feb 2025 03:52 PM (IST)
शेतकऱ्यांना देशोधडीला लावणारा शक्तिपीठ महामार्ग कुठल्याही परिस्थितीत हाणून पाडणार , तसेच शक्तीपीठ महामार्गाविरोधात १२ मार्चला १२ जिल्ह्यातील शेतकऱ्यांचा आझाद मैदानावर मोर्चा काढण्याचा निर्धार करण्यात आला. कोल्हापुरात शक्तीपीठ महामार्ग कृती समितीच्या बैठकीत घेण्यात आला. ही बैठक आमदार सतेज पाटील यांच्या प्रमुख उपस्थितीत पार पाडली. शाहू स्मारक भवन येथे शक्तीपीठ महामार्ग विरोधी कृती समितीच्या वतीने बारा जिल्ह्यातील शेतकऱ्यांच्या बैठकीचे आयोजन करण्यात आले होते. शेतकऱ्यांनी आमची इंचभर ही जमीन देणार नाही, वाढ वडिलांच्याकडून वारसा हक्काने आलेली जमीन सोडणार नाही, पिकाऊ शेतजमीन ही आमची भूमी आई आहे, अशी शपथ घेतली.
20 Feb 2025 03:35 PM (IST)
मागील महिन्यापासून उत्तर प्रदेशमधील प्रयागराजमध्ये महाकुंभमेळा सुरु आहे. 144 वर्षांनी होणाऱ्या महाकुंभमेळ्याची फक्त देशामध्ये नाही तर परदेशामध्ये देखील चर्चा आहे. हा आठवडा हा महाकुंभमेळ्याचा शेवटचा आठवडा असणार आहे. आत्तापर्यंत कोट्यवधी लोकांनी संगम स्नानावर अमृतस्नान केले आहे. शेवटच्या आणि महाशिवरात्रीच्या रात्री भाविकांची मोठी गर्दी संगमस्थळी होण्याची शक्यता वर्तवली जात आहे. यासाठी योगी सरकार, प्रशासन आणि पोलिसांकडून कडेकोट बंदोबस्त ठेवण्यात आला आहे.
20 Feb 2025 03:17 PM (IST)
अंजली दमानिया यांनी अर्धवट ज्ञानाच्या आधारे खोटे बोलून जीआर काढला वगैरे म्हणून जे आरोप केले आहेत ते संपूर्णपणे चुकीचे असून त्या आपल्या अर्धवट ज्ञानाच्या आधारे खोटे आरोप करत असल्याचा खुलासा धनंजय मुंडे यांनी केला आहे. शासनाच्या नियमावलीनुसार ( रुल्स ऑफ बिजनेस ) जीआर अर्थात शासन निर्णय निर्गमित करण्यासाठीची एक पद्धत आहे, त्यासाठी प्रक्रिया आखून देण्यात आलेली आहे, असे म्हणत मुंडेंनी दमानियांच्या आरोपांचं खंडण केलं.
20 Feb 2025 03:05 PM (IST)
कर्जत पोलीस ठाण्याच्या बाहेर माजी आमदाराने आंदोलन छेडल्याने परिसरात एकच खळबळ उडाली आहे. माजी आमदार सुरेश लाड यांनी पायरीवर झोपूनच आंदोलन सुरू केले आहे. हे आंदोलन सीमाबंदीच्या कामावर आक्षेप घेत शेतकऱ्यांच्या न्यायासाठी करण्यात येत आहे. लाड यांनी आरोप केला आहे की, कोणतेही सर्वेक्षण न करता शेतकऱ्यांना दमदाटी करून सीमाबंदीचे काम सुरू आहे. तसेच, शेतकऱ्यांना भेटून त्यांच्यावर दबाव टाकला जात असल्याचा आरोपही त्यांनी केला आहे.सुरेश लाड हे भारतीय जनता पार्टीचे ज्येष्ठ नेते आहेत. खोपोली कर्जत परिसारातील पळसदारी येथे होत असलेल्या कल्पतरु प्रकल्पांत अपंग असलेल्या शेतकऱ्यांची पिळवणूक केली जात असल्याचा आरोप माजी आमदार सुरेश लाड यांनी केला आहे.
20 Feb 2025 01:45 PM (IST)
राज्याचे कृषिमंत्री माणिकराव कोकाटे व त्यांचे बंधु सुनील कोकाटे यांना जिल्हा व सत्र न्यायालयाने दोन वर्षांचा कारावास व ५० हजारांचा दंड अशी शिक्षा सुनावली आहे. कृषिमंत्री माणिकराव कोकाटे यांच्यावर घरकुल घोटाळ्याचा आरोप करण्यात आला होता. १९९५ मध्ये तत्कालीन आमदार दिवंगत नेते तुकाराम दिघोळे यांनी केस केली होती. यामुळे माणिकराव कोकाटे यांच्या अडचणींमध्ये वाढ झाली आहे.
20 Feb 2025 01:23 PM (IST)
विधानसभा निवडणुकीमध्ये ईव्हीएम मशीनमध्ये घोटाळा झाला असल्याचा आरोप करण्यात येत आहे. याबाबत भुजबळ म्हणाले की, "मॉक पोल काय आहे ते मला माहिती नाही. काय करायचं ते करा. मी ते वाचलं आहे. मला जर ईव्हीएमचा फायदा मिळाला असता तर मी दीड-दोन लाख मतांनी निवडून आलो असतो. 60 हजार मतांनी मी नेहमीच निवडून आलो. या वेळेला केवळ जरांगेमुळे माझे मताधिक्य कमी झाले. ईव्हीएममध्ये गडबड असती, तर जरांगे येऊ आणि आणखी कोणी येऊ ईव्हीएमने उलटा सुलटा करून मला दीड ते दोन लाख मताधिक्यावर पोहोचवले असतं," असे मत छगन भुजबळ यांनी व्यक्त केले आहे.
20 Feb 2025 01:05 PM (IST)
उपमुख्यमंत्री एकनाथ शिंदे यांना जीवे मारण्याची धमकी देण्यात आली आहे. यासंदर्भात गोरेगाव पोलिस ठाण्यात धमकीचा ईमेल करण्यात आला असून शिंदे यांची गाडी बॉम्बने उडवण्याचा उल्लेख यामध्ये करण्यात आला आहे. त्यामुळे आता पोलिसांकडून ई-मेल पाठवणाऱ्याचा शोध सुरू झाला आहे. यापूर्वी ही एकनाथ शिंदे यांना धमकीचा मेसेज आला होता.
20 Feb 2025 12:56 PM (IST)
डोंबिवलीतील ६५ अनधिकृत इमारतींवरील कारवाई आणि त्यावरून सुरू असलेल्या राजकीय संघर्षाला आणखी तीव्र वळण मिळाले आहे. एकीकडे शिंदे गटाच्या उपशहर प्रमुख यांनी पत्रकार परिषद घेत ठाकरे गटाच्या जिल्हा प्रमुख दीपेश मात्रे यांच्यावर हत्येचा कट असल्याचा आरोप केला आहे. तेलगोटे यांनी स्पष्ट शब्दांत म्हटले, "ज्यांच्यावर ४२० सारखे गुन्हे दाखल आहेत, जे तीन वर्षे तुरुंगात राहून आले आहेत, ते आम्हाला शिकवणार का? मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी यावर कठोर पावले उचलण्याचे संकेत दिले असल्याचे देखील तेलगोटे म्हणाले आहेत.
20 Feb 2025 12:32 PM (IST)
दिल्लीचे उपराज्यपाल व्ही.के. सक्सेना यांनी रेखा गुप्ता यांना दिल्लीच्या मुख्यमंत्रीपदाची शपथ दिली, त्या चौथ्या महिला मुख्यमंत्री बनल्या.
#WATCH | BJP's first-time MLA Rekha Gupta takes oath as the Chief Minister of Delhi. Lt Governor VK Saxena administers her oath of office.
With this, Delhi gets its fourth woman CM, after BJP's Sushma Swaraj, Congress' Sheila Dikshit, and AAP's Atishi. pic.twitter.com/bU69pyvD7Y
— ANI (@ANI) February 20, 2025
“मी रेखा गुप्ता शपथ घेते की…”, २६ वर्षांनंतर दिल्लीत ‘रेखा’पर्वाला सुरुवात
20 Feb 2025 12:31 PM (IST)
भाजप नेते प्रवेश वर्मा यांनी दिल्लीच्या उपमुख्यमंत्रिपदाची शपथ घेतली आहे. प्रवेश वर्मा यांनी आप नेते व दिल्लीचे माजी मुख्यमंत्री अरविंद केजरीवाल यांना निवडणुकीच्या रिंगणामध्ये जोरदार टक्कर दिली. केजरीवाल यांचा पराभव करणारे प्रवेश वर्मा यांना दिल्लीच्या उपमुख्यमंत्रिपदाची जबाबदारी मिळाली आहे.
20 Feb 2025 12:27 PM (IST)
दिल्लीमध्ये विधानसभा निवडणूका पार पडल्या असून यामध्ये भाजपचा विजय झाला. 27 वर्षानंतर भाजपला दिल्लीमध्ये सत्ता मिळवण्यामध्ये यश आले आहे. दिल्लीच्या मुख्यमंत्रिपदी महिला राज असणार आहे. भाजप नेत्या रेखा गुप्ता यांनी दिल्लीच्या मुख्यमंत्रीपदाची धुरा स्वीकारली आहे. रामलीला मैदानावर रेखा गुप्ता यांचा शपथविधी सोहळा पार पडला आहे. यावेळी पंतप्रधान नरेंद्र मोदी हे देखील उपस्थित आहेत.
20 Feb 2025 12:14 PM (IST)
केंद्रीय उद्योग मंत्री पियुष गोयल यांनी माध्यमांशी संवाद साधला. यावेळी ते म्हणाले की, "महाराष्ट्राने बहिणींना दीड हजार रुपये दिले. नवा स्टार्टअप सुरू करण्याचा निर्णय घेतला, ज्वलंत औद्योगिक विकास करून देश पुढे जाण्याचा संकल्प केला आहे. महाराष्ट्रात डबल इंजिन सरकार त्यामुळे नक्कीच विकास होईल. जे लोक चुकीचे काम करतात त्यांचे अनुदान बंद केले ही चांगली बाब आहे. खोट्या गोष्टी बोलून लोकांचा दृष्टिकोन बदलण्याचे काम केले जाते. पुढील तीन वर्षात जगातील तिसरी मोठी अर्थव्यवस्था असणार देश होणार आहे, याचा आनंद आहे."
20 Feb 2025 12:01 PM (IST)
रेखा गुप्ता दिल्लीतील रामलीला मैदानावर पोहोचल्या आहेत. त्या थोड्याच वेळात मुख्यमंत्रीपदाची शपथ घेतील. त्या दिल्लीच्या नवव्या मुख्यमंत्री असतील.
20 Feb 2025 11:40 AM (IST)
महाकुंभमेळ्यातील स्नान करताना महिलांचे खाजगी व्हिडिओ डार्क वेबवर विकले जात आहेत. याप्रकरणावर सपा प्रमुख अखिलेश यादव यांनी योगी सरकारवर जोरदार टीका केली आहे. महिलांचे स्नान करताना व कपडे बदलताना व्हिडिओ फोटो व्हायरल करण्यात आले आहेत. या प्रकरणामध्ये उत्तर प्रदेश पोलीस ॲक्शनमोडमध्ये आले आहेत. १९ फेब्रुवारी रोजी नोंदवलेल्या दुसऱ्या प्रकरणात, एका टेलिग्राम चॅनलने असेच व्हिडिओ विक्रीसाठी दिल्याचे आढळून आले. या चॅनलविरुद्ध कायदेशीर कारवाई सुरू करण्यात आली आहे.
20 Feb 2025 11:09 AM (IST)
परिवहन मंत्री प्रताप सरनाईक यांनी सोलापूर धाराशिव एसटी बसने प्रवास केला आहे. कार्यकर्त्यांसह त्यांनी हा प्रवास करुन बससेवा जाणून घेतली. ‘सर्वसामान्य लोकांच्या काय भावना आहेत, त्यांना कुठल्या समस्याना तोंड द्यावं लागतं याची माहिती मी आगार पाहणी दौऱ्यातून घेतो निश्चितच अनेक एसटी बसेसची अवस्था वाईट आहे, अनेक एसटी सक्रॅप करायच्या आहेत. पण आम्ही पाच हजार नवीन एसटीची मागणी केलीय, सोलापूर धाराशिवसाठी देखील निश्चितच काही बसेस देण्यात येतील, असे आश्वासन परिवहन मंत्री प्रताप सरनाईक यांनी दिले.
20 Feb 2025 10:54 AM (IST)
दिल्लीच्या मुख्यमंत्रिपदाचा शपथविधी सोहळा पार पडणार आहे. दिल्लीचा कारभार हा पुन्हा एकदा महिलेच्या हाती येणार आहे. शालिमार बाग मतदारसंघातून पहिल्यांदाच निवडून आलेल्या रेखा गुप्ता यांचा मुख्यमंत्रीपदाचा शपथविधी होणार आहे. रेखा गुप्ता यांच्या मंत्रिमंडळामध्ये परवेश वर्मा (नवी दिल्ली), मनजिंदर सिंग सिरसा (राजौरी गार्डन), रविंद्र कुमार इंद्रज (बवाना), कपिल मिश्रा (करवाल नगर), आशिष सूद (जनकपुरी) आणि पंकज कुमार सिंग (विकासपुरी) या आमदारांचा समावेश होणार आहे.
20 Feb 2025 10:44 AM (IST)
उपमुख्यमंत्री एकनाथ शिंदे यांच्या शिवसेनेचे राज्यात ऑपरेशन टायगर सुरू आहे. या ऑपरेशन टायगरची सर्वात जास्त झळ शिवसेना उद्धव बाळासाहेब ठाकरे सेना पक्षाला बसली आहे. शिंदे यांच्या नेतृत्वाखाली सुरू असलेल्या ऑपरेशन टायगरचा तिसरा टप्पा सुरू असून, त्याची जबाबदारी शिवसेनेतील 12 मंत्र्यांवर असल्याची माहिती परिवहन मंत्री प्रताप सरनाईक यांनी दिली.
20 Feb 2025 10:43 AM (IST)
शरद पवारांचे पी. ए. तुकाराम भुवाळी यांचे निधन झाल्याची माहिती मिळत आहे .
20 Feb 2025 10:42 AM (IST)
यशवंतराव चव्हाण प्रतिष्ठाण येथे उपमुख्यमंत्री एकनाथ शिंदे यांच्या प्रमुख उपस्थितीत सिडकोच्या ‘माझ्या पसंतीचे सिडको घर’ या लॉटरीची ऑनलाईन सोडत काढण्यात आली. यावेळी उपमुख्यमंत्री एकनाथ शिंदे म्हणाले की, "सिडकोच्या इतिहासातील ही आतापर्यंतची सर्वांत मोठी लॉटरी असून यात नागरिकांना आपली पसंद नोंदविण्याची मुभा फक्त सिडकोने दिली आहे. प्रधानमंत्री नरेंद्र मोदी यांनी सर्वांसाठी घरे देण्याची घोषणा केली असून ऐवढ्या मोठ्या प्रमाणात घरे देण्याचा विक्रम होत असल्याचे त्यांनी नमूद केले. सिडकोची ही घरे टाटा, एल.एण्ड टी., शापूरची यांच्या सहभागाने बांधली असल्याने ती अतिशय दर्जेदार असून घरे रेल्वे स्टेशन्स, विमानतळाच्या जवळ असल्याने सामान्यांना त्याचा फायदा होणार आहे.
20 Feb 2025 10:40 AM (IST)
गेल्या काही दिवसांपासून गुईलेन बॅरे सिंड्राेम अर्थात जीबीएसचा धोका वाढताना दिसत आहे. त्यातच या आजाराने पुण्यात शिकत असलेल्या एका विद्यार्थीनीचा मृत्यू झाला. संबंधित तरूणी पुण्यात सिंहगड परिसरात शिकत होती. तिला पाणीपुरी खाल्यानंतर त्रास होऊ लागला होता. त्यानंतर तिची तब्येत खालावली, तिच्यावर बारामतीत रुग्णालयात उपचार सुरु होते. तिचा मृत्यू झाल्याने खळबळ उडाली आहे. जीबीएस आजाराचा धोका वाढत असून बळी वाढत चालले आहेत.
