पाचगणी भाजी मार्केटला भीषण आग; तब्बल ‘इतक्या’ लाखांचे नुकसान

पाचगणी( ता. महाबळेश्वर )भाजी मार्केटला अचानक भीषण आग लागल्याने भाजी व्यावसायिकांचे सुमारे ४ ते ५ लाखांचे नुकसान झाल्याचा प्राथमिक अंदाज व्यक्त केला जात आहे. ऐन दसऱ्याच्या सणामध्ये या व्यावसायिकांच्या डोळ्यात पाणी आले आहे.

सौजन्य - नवराष्ट्र टीम

Follow Us:

Follow Us:

वाई : पाचगणी( ता. महाबळेश्वर )भाजी मार्केटला अचानक भीषण आग लागल्याने भाजी व्यावसायिकांचे सुमारे ४ ते ५ लाखांचे नुकसान झाल्याचा प्राथमिक अंदाज व्यक्त केला जात आहे. ऐन दसऱ्याच्या सणामध्ये या व्यावसायिकांच्या डोळ्यात पाणी आले आहे.

याबाबत अधिक माहिती अशी की, रात्री साडेअकरा वाजताच्या सुमारास अचानक पाचगणीच्या भाजी मंडईला आग लागली. आगीचे लोळ व धूर बाजारपेठेत पसरल्याने सर्वजण घटना स्थळी जमा झाले. काहींनी पाण्याच्या साह्याने आग विझविण्याचा प्रयत्न केला. खाजगी टँकर मागवले त्याने आग विझविण्याचे काम सुरू होते. मात्र आग आणखीनच वाढत होती.

पाचगणी पालिकेच्या बंबाला पाचारण केले परंतु त्यात पाणी नसल्याचे समजल्याने महाबळेश्वर पालिकेशी संपर्क साधला. लागलीच महाबळेश्वर पालिकेचे दोन बंब घटनास्थळी दाखल झाले. काही वेळानी ही आग आटोक्यात आली परंतु या दुकानांतील सर्व भाजी जळून खाक झाली होती.

ही आग कशाने लागली याचा अंदाज नसून, ती शॉर्ट सर्किट ने लागली असल्याचा प्राथमिक अंदाज व्यक्त केला जात आहे. यामध्ये गणेश वाडकर , संजय रजपुरे, अल्ताफ बागवान, अनिता कासूर्डे , भास्कर आंब्राळे, सिद्धेश शिंदे, प्रीती आंब्राळे ,सोहेल बागवान यांच्या भाजीपाला तसेच दुकानांचे सुमारे ४ ते ५ लाखांचे नुकसान झाले आहे. या व्यावसायिकांचे आर्थिक कंबरडे मोडले असून त्यांना नुकसान भरपाई मिळावी अशी मागणी होत आहे.

२०१५ मध्येही दिवाळी हंगामात फटक्याने अशाच पद्धतीने आग लागली होती. त्यावेळीही अशीच मोठी हानी झाली होती. परंतु त्यावेळी कसलीही नुकसान भरपाई मिळाली नाही. आता दसऱ्याच्या दिवसात अशीच आगीची पुनरावृत्ती झाली आहे. यावेळी तरी या व्यावसायिकांना नुकसान भरपाई मिळावी अशी मागणी केली आहे. परंतु आता तरी या व्यवसायिकांना न्याय मिळणार का असा प्रश्न उपस्थित झाला आहे.

Web Title: Panchgani vegetable market has suffered huge damage due to the massive fire nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com