शुक्रवार, 16 ऑक्टोबर 2026
Rajiv Gandhi Zoological Park katraj
सुनयना सोनवणे
पुणे: कात्रज येथील राजीव गांधी प्राणीसंग्रहालयात दोन नव्या पाहुण्यांचे आगमन झाले आहे. नागपूर येथील गोरेवाडा वन्यजीव बचाव केंद्रातून साडेचार वर्षांचा नर आणि साडेतीन वर्षांची मादी वाघ गुरुवारी (ता. १५) पुण्यात दाखल झाले. मानव-वन्यजीव संघर्षाच्या घटनांमधून या दोन्ही वाघांची सुटका करण्यात आली होती. आता त्यांना पुण्यातील प्राणीसंग्रहालयात सुरक्षित वातावरण मिळणार आहे. या वाघांना तीन ते चार आठवडे विलगीकरणात ठेवण्यात येणार असून, त्यानंतर आरोग्य तपासणी करून इतर वाघांसोबत ठेवण्यात येईल, अशी माहिती प्राणीसंग्रहालयाचे संचालक डॉ. राजकुमार जाधव यांनी दिली.
गोपीचंद पडळकरांना सर्वोच्च न्यायालयाचा दिलासा; सांगली जिल्हा बँक निवडणूक लढविण्याचा मार्ग मोकळा
गोरेवाडा वन्यजीव बचाव केंद्रातील वाघांची संख्या क्षमतेपेक्षा अधिक झाल्याने काही वाघांचे अन्य प्राणीसंग्रहालयांत स्थलांतर करण्याचा निर्णय घेण्यात आला. त्यानुसार केंद्रीय प्राणिसंग्रहालय प्राधिकरणाने (सीझेडए), नवी दिल्ली यांनी या दोन वाघांना पुण्यात स्थलांतरित करण्यास मंजुरी दिली.
या प्रक्रियेनुसार बुधवारी (ता. १४) सायंकाळी पाच वाजता आवश्यक पशुवैद्यकीय तपासण्या आणि नियोजित कार्यवाही पूर्ण करून दोन्ही वाघांना पुण्यातील पथकाकडे सुपूर्द करण्यात आले. पशुवैद्यकीय अधिकारी घनश्याम मोहन पवार यांच्या नेतृत्वाखालील पथकाने त्यांना पुण्यात आणले. गुरुवारी दोन्ही वाघ प्राणीसंग्रहालयात दाखल झाले. त्यामुळे येथील वाघांची एकूण संख्या सहा झाली आहे.
दरम्यान, नव्याने दाखल झालेल्या वाघांची नावे अद्याप निश्चित करण्यात आलेली नाहीत. विलगीकरणाचा कालावधी पूर्ण झाल्यानंतर आणि आरोग्य तपासणीचे निष्कर्ष अनुकूल असल्यास त्यांना इतर वाघांसोबत ठेवण्यात येईल. या स्थलांतरामुळे पुण्यातील प्राणीसंग्रहालयातील वाघांची संख्या वाढली असून, मानव-वन्यजीव संघर्षातून सुटका झालेल्या या दोन्ही वाघांना सुरक्षित निवासाची व्यवस्था उपलब्ध झाली आहे.
खडकवासला धरणातील दूषित पाण्यावरुन अमोल बालवडकर आक्रमक; महापौर, आयुक्तांना दिला वॉटर प्युरिफायर
