मंगळवार, 3 नोव्हेंबर 2026
श्रावणानंतर भीमाशंकर परिसर चकाचक; भीमा नदीच्या उगमस्थळातून प्लास्टिक, गाळ अन् निर्माल्याची सफाई
श्रावण महिन्यात भीमाशंकर येथे भाविकांची प्रचंड गर्दी असते. त्यामुळे मंदिर परिसरात कचरा, प्लास्टिक आणि निर्माल्याचे प्रमाण वाढते. या पार्श्वभूमीवर सुमीत फॅसिलिटीजने स्वतः पुढाकार घेत स्वच्छता मोहीम राबवली. भीमा नदीच्या उगमस्थळी साचलेला गाळ, प्लास्टिक कचरा तसेच भाविकांकडून अर्पण करण्यात आलेले निर्माल्य काढण्यात आले. मंदिर परिसरातून वाहणाऱ्या नदीच्या प्रवाहाचीही स्वच्छता करण्यात आली.
Weather Update : पावसाबाबत महत्त्वाची अपडेट ! राज्यात पुढील दोन दिवस वादळी वाऱ्यासह…
या मोहिमेसाठी २५ ते ३० सफाई कर्मचारी आणि तीन पर्यवेक्षकांची नियुक्ती करण्यात आली होती. त्यांच्यासाठी स्वतंत्र देखरेख वाहन, कचरापेट्या, झाडू, कचऱ्याच्या पिशव्या आणि वैयक्तिक सुरक्षा साधने अर्थात PPE किट्स उपलब्ध करून देण्यात आली. पथकाने कचरा आणि प्लास्टिक संकलनासह मंदिराकडे जाणारे रस्ते, परिसर आणि नाल्यांचीही स्वच्छता केली.
श्रावणातील भाविकांच्या गर्दीमुळे परिसरात दररोज मोठ्या प्रमाणात कचरा जमा होत होता. सुमीत फॅसिलिटीजच्या पथकाने दररोज ३० ते ३५ कचरापेट्यांमधील कचरा, प्लास्टिक आणि निर्माल्याचे संकलन केले. जमा झालेल्या कचऱ्याची योग्य पद्धतीने विल्हेवाट लावण्यात आली.
मुंबईतील जुहू आणि वरळी समुद्रकिनाऱ्यांवर स्वच्छता उपक्रम राबवल्यानंतर सुमीत फॅसिलिटीजने भीमाशंकर तीर्थक्षेत्रातही हा उपक्रम हाती घेतला. धार्मिक स्थळांच्या स्वच्छतेबरोबरच नैसर्गिक वारशाच्या संवर्धनाबाबत जनजागृती करणे हा या उपक्रमामागील उद्देश असल्याचे कंपनीने म्हटले आहे.
सुमीत ग्रुप एंटरप्रायझेसचे कार्यकारी अध्यक्ष सुमित साळुंके यांनी सांगितले की, भीमाशंकर हे केवळ आध्यात्मिक महत्त्वाचे तीर्थक्षेत्र नसून येथूनच भीमा नदीचा प्रवास सुरू होतो. त्यामुळे या पवित्र स्थळासह नदीच्या उगमाची काळजी घेणे ही सेवा असल्याची समूहाची भावना आहे. स्वच्छता मोहीम केवळ कचरा हटवण्यापुरती मर्यादित नसून श्रद्धा, पर्यावरण आणि समाजाप्रती असलेल्या सामूहिक जबाबदारीचा भाग असल्याचेही त्यांनी नमूद केले.
सुमीत ग्रुप एंटरप्रायझेसच्या माहितीनुसार, समूहाचे देशातील २० हून अधिक राज्यांमध्ये कार्यक्षेत्र असून ५० हजारांहून अधिक कर्मचारी कार्यरत आहेत. फॅसिलिटीज मॅनेजमेंट, कचरा व्यवस्थापन, सुरक्षा सेवा आणि आपत्कालीन वैद्यकीय सेवा अशा विविध क्षेत्रांमध्ये समूह सेवा पुरवतो.
