बुधवार, 9 सप्टेंबर 2026
फोटो सौजन्य सोशल मीडिया
दहीहंडी उत्सवाच्या जल्लोषात प्रतापराव जगताप यांचा भाजप प्रवेश झाला. त्यांच्यासोबत करमाळा तालुका काँग्रेस आयचे भटक्या-विमुक्त जातीचे तालुकाध्यक्ष देवराव सुकळे, शिवसेनेचे युवक नेते संभाजी शिंदे, शहर युवक काँग्रेसचे शहराध्यक्ष सुजय जगताप, योगेश राखुंडे यांच्यासह काँग्रेसचे विविध उपाध्यक्ष, पदाधिकारी आणि शाखाध्यक्षांनी आपल्या पदांचे राजीनामे देत भाजपमध्ये प्रवेश केला. या सामूहिक पक्षप्रवेशामुळे दहीहंडीच्या निमित्ताने करमाळ्यात मोठी राजकीय घडामोड घडल्याचे मानले जात आहे.
प्रतापराव जगताप हे माजी आमदार नामदेवराव जगताप यांचे चिरंजीव आहेत. करमाळा तालुक्यात त्यांचे कार्यकर्ते व समर्थकांचे संघटन असल्याचे मानले जाते. त्यामुळे त्यांच्या भाजप प्रवेशाकडे आगामी विधानसभा मतदारसंघातील राजकीय समीकरणांच्या दृष्टीने पाहिले जात आहे. त्यांच्या प्रवेशामुळे काँग्रेसला स्थानिक पातळीवर धक्का बसल्याची चर्चा असून, भाजपला मात्र संघटनात्मक बळ मिळाल्याचे चित्र आहे.
भाजपचे नूतन सोलापूर ग्रामीण पश्चिम जिल्हाध्यक्ष गणेश चिवटे यांनी जिल्हाध्यक्षपदाची सूत्रे स्वीकारल्यानंतर अवघ्या महिनाभराच्या कालावधीत काँग्रेसच्या तालुकाध्यक्षांचा भाजप प्रवेश घडवून आणला आहे. त्यामुळे करमाळा तालुक्यात पक्षाची संघटनात्मक बांधणी अधिक मजबूत करण्याच्या दृष्टीने हा प्रवेश महत्त्वाचा मानला जात आहे. आगामी काळात आणखी काही राजकीय घडामोडी घडतात का, याकडेही राजकीय वर्तुळाचे लक्ष लागले आहे.
भाजपमध्ये प्रवेश केल्यानंतर प्रतापराव जगताप यांनी भाजपचे जिल्हाध्यक्ष गणेश चिवटे यांच्या मार्गदर्शनाखाली आणि माजी खासदार रणजितसिंह नाईक निंबाळकर यांच्या नेतृत्वाखाली पक्षाचे विचार, विकासाची भूमिका आणि ध्येयधोरणे जनसामान्यांपर्यंत पोहोचविण्यासाठी प्रामाणिकपणे काम करणार असल्याचे सांगितले. पक्षसंघटना मजबूत करण्यासाठी तालुक्यात सक्रियपणे काम करण्याचा निर्धारही त्यांनी व्यक्त केला.
दहीहंडी फोडण्यासाठी गोविंदा पथकांनी केलेल्या थरारक प्रयत्नांनी उत्सवात रंगत आणली. मात्र, प्रतापराव जगताप यांच्यासह काँग्रेस व अन्य पक्षांच्या पदाधिकाऱ्यांच्या भाजप प्रवेशामुळे उत्सवाला राजकीय रंग चढला. दहीहंडीच्या निमित्ताने केवळ गोविंदांनीच हंडी फोडली नाही, तर करमाळ्यात राजकीय हंडीही फुटल्याची चर्चा कार्यकर्त्यांमध्ये रंगली.
या पक्षप्रवेशामुळे भाजप कार्यकर्त्यांमध्ये उत्साहाचे वातावरण निर्माण झाले. रणजितसिंह नाईक-निंबाळकर यांचे नेतृत्व, गणेश चिवटे यांची संघटनात्मक रणनीती आणि प्रतापराव जगताप यांचे स्थानिक पातळीवरील संघटन यांचा मेळ आगामी काळात भाजपला करमाळ्यात कितपत बळकटी देतो, हे पाहणे महत्त्वाचे ठरणार आहे.
दहीहंडी उत्सवाच्या व्यासपीठावर भाजपचे माजी जिल्हाध्यक्ष श्रीकांत देशमुख, करमाळा कृषी उत्पन्न बाजार समितीचे माजी उपसभापती चिंतामणी दादा जगताप, करमाळा नगरपालिकेचे माजी बांधकाम सभापती राहुल जगताप, भाजप मंडलाध्यक्ष काकासाहेब सरडे, महाराष्ट्र चॅम्पियन अफसर जाधव, नगरसेवक रामभाऊ ढाणे, शहराध्यक्ष जगदीश अग्रवाल, जिल्हा सरचिटणीस सचिन शिंदे आदी उपस्थित होते.
दहीहंडीच्या निमित्ताने झालेल्या या पक्षप्रवेशामुळे करमाळा तालुक्यातील राजकीय वातावरण तापले असून, आगामी निवडणुकांच्या पार्श्वभूमीवर या प्रवेशाचा भाजपच्या संघटनात्मक ताकदीवर आणि स्थानिक राजकीय समीकरणांवर काय परिणाम होतो, याकडे सर्वांचे लक्ष लागले आहे.
