(फोटो सौजन्य- इन्स्टाग्राम)
मराठी मनोरंजन विश्वातून एक धक्कादायक बातमी समोर येत आहे.जळगाव जिल्ह्यातल्या पारोळा तालुक्यातील उंदिरखेडे येथे एका २५ वर्षीय होतकरू अभिनेत्याने गळफास घेऊन आत्महत्या केल्याची हृदयद्रावक घटना घडली. सचिन गणेश चांदवडे असे २५ वर्षीय मृत तरुणाचे नाव आहे. सचिनच्या आत्महत्येचं कारण अद्याप कळू शकलं नाही. परंतु या घटनेमुळे मराठी सिनेसृष्टीला मोठा धक्का बसला आहे. सचिनच्या कुटुंबावर शोककळा पसरली आहे. सचिनचा आगामी सिनेमा ‘असुरवन’ हा लवकरच प्रदर्शित होणार होता. परंतु सिनेमाचं रिलीज तोंडावर असताना सचिनने स्वतःचं जीवन संपवल्याने चाहत्यांनी हळहळ व्यक्त केली आहे.
अभिनेता सचिन गणेश चांदवडे याने राहत्या घराच्या वरच्या मजल्यावर असलेल्या खोलीत पंख्याला गळफास घेऊन आत्महत्येचा प्रयत्न केला.ही घटना २३ ऑक्टोबर रोजी दुपारी दीड वाजता उघडकीस आली. घटना लक्षात येताच कुटुंबीयांनी सचिनला खाली उतरवून तातडीने खासगी रुग्णालयात दाखल केले. मात्र त्याची प्रकृती गंभीर झाल्याने त्याला पुढील उपचारासाठी धुळे येथील रुग्णालयात हलवण्यात आले. डॉक्टरांनी उपचार सुरू ठेवले, पण त्याची मृत्यूशी झुंज अखेरीस अपयशी ठरली.२४ ऑक्टोबरच्या मध्यरात्री दीड वाजता उपचारादरम्यान सचिनचा मृत्यू झाला.
सचिन पुण्यातील आयटी पार्कमध्ये सॉफ्टवेअर इंजिनीअर काम करत होता. अभिनयाची आवड असल्याने त्याने सिनेमात करिअर करण्याचा निर्णय घेतला. नोकरीतून वेळ काढत सचिनने विविध कलाकृतींमध्ये अभिनय केला. त्याने नेटफ्लिक्सवरील बहुचर्चित ‘जमतारा २’ वेबसीरिजमध्येही काम केलंय. याशिवाय कलावंत ढोल ताशा पथकात तो सक्रीय होता. जळगावमधील उभरता कलाकार म्हणून सचिनचं कौतुक व्हायचं. परंतु सचिनच्या आत्महत्येने सर्वांना धक्का बसला आहे..
‘Chhaava’ चा लवकरच तुटणार रेकॉर्ड, ‘Kantara Chapter 1’ चा धुमाकूळ; रविवारी एवढ्या कोटींचे कलेक्शन
