रविवार, 18 ऑक्टोबर 2026
(Photo -X)
Pune MLC Election : सोलापूर जिल्ह्याच्या राजकारणात सध्या एका वेगळ्याच विषयाची चर्चा रंगली आहे. राष्ट्रवादी काँग्रेस शरद पवार पक्षाचे करमाळ्याचे आमदार नारायण पाटील यांनी चक्क भाजपच्या प्रचार मेळाव्याला हजेरी लावली आहे. नारायण पाटील या प्रचार मेळाव्यात दिसल्याने अनेकांच्या भुवया उंचावल्या असून राजकीय वर्तुळात चर्चा रंगू लागल्या आहेत. विशेष म्हणजे, बार्शीत झालेल्या या मेळाव्यात त्यांना पहिल्या रांगेत स्थान मिळालं होतं. त्यामुळे त्यांच्या भूमिकेबाबत तर्कवितर्कांना उधाण आलं आहे.
पुणे पदवीधर आणि शिक्षक मतदारसंघाच्या निवडणुकीच्या पार्श्वभूमीवर बार्शी येथे भाजप-महायुतीचा प्रचार मेळावा पार पडला. या कार्यक्रमाला मंत्री चंद्रकांत पाटील, मंत्री जयकुमार गोरे आणि आमदार राजेंद्र राऊत उपस्थित होते.
भाजपच्या उमेदवारांच्या प्रचारासाठी आयोजित केलेल्या या कार्यक्रमात नारायण पाटील यांची उपस्थिती विशेष चर्चेचा विषय ठरली. ते राष्ट्रवादी काँग्रेस शरद पवार पक्षाचे आमदार असल्याने त्यांच्या या उपस्थितीकडे राजकीय वर्तुळाचं लक्ष गेलं.
पुणे पदवीधर मतदारसंघासाठी डॉ. स्मिता जाधव, तर शिक्षक मतदारसंघासाठी कौस्तुभ गावडे यांच्या प्रचारार्थ हा मेळावा आयोजित करण्यात आला होता. या कार्यक्रमात नारायण पाटील सहभागी झाल्याने त्यांच्या राजकीय भूमिकेबाबत नव्या चर्चा सुरू झाल्या आहेत.
पालकमंत्री जयकुमार गोरे यांनी नारायण पाटील यांच्यासह राष्ट्रवादी काँग्रेस शरद पवार पक्षाचे आमदार उत्तम जानकर आणि शेकापचे आमदार बाबासाहेब देशमुख यांचाही भाजपला पाठिंबा असल्याचा दावा केला आहे.
महाविकास आघाडीकडून पुणे पदवीधर मतदारसंघात सुनील मोदी आणि हर्षदा देशमुख हे दोन उमेदवार रिंगणात असल्याचा मुद्दा चंद्रकांत पाटील यांनी मांडला. त्यामुळे नारायण पाटील यांच्यात संभ्रम निर्माण झाला असेल आणि म्हणून ते भाजपच्या मेळाव्यात आले असतील, अशी टिप्पणी त्यांनी केली.
नारायण पाटील यांची भाजपच्या व्यासपीठावरील उपस्थिती ही राजकीयदृष्ट्या महत्त्वाची मानली जात आहे. याआधीही स्थानिक स्वराज्य संस्थांच्या निवडणुकीदरम्यान त्यांच्या भूमिकेची चर्चा झाली होती. आता पुणे शिक्षक आणि पदवीधर मतदारसंघाच्या निवडणुकीत त्यांच्या उपस्थितीचा नेमका परिणाम काय होतो, हे पाहणं महत्त्वाचं ठरणार आहे.
