गुरुवार, 15 ऑक्टोबर 2026
सुनील तटकरे मुख्यमंत्र्यांची भेट घेणार
Sunil Tatkare : महाराष्ट्रातील शेतकऱ्यांना जाहीर करण्यात आलेल्या आर्थिक मदतीवरून आता राजकीय चर्चेला सुरुवात झाली आहे. मुख्यमंत्री देवेंद्र फडणवीस यांनी हि मदत जाहीर केल्यानंतर राजकीय क्षेत्रातून विविध प्रतिक्रिया यायला सुरुवात झाली आहे. 5 हजारांच्या मदतीवरून विरोधकांनी सरकारला घेरले असतानाच आता महायुती सरकारलाच घरचा आहेर भेटला आहे. राष्ट्रवादी काँग्रेसचे खासदार सुनील तटकरे यांनी यावरून मोठे भाष्य केले आहे.
सुनील तटकरे यांनी शेतकऱ्यांना दिली जाणारी पाच हजार रुपयांची अग्रीम मदत अपुरी असल्याचे म्हटले आहे. ही मदत वाढवण्यासाठी मुख्यमंत्र्यांची भेट घेणार असल्याचेही त्यांनी स्पष्ट केले. त्याचवेळी, दिवंगत अजित पवार अर्थमंत्री असताना त्यांनी अर्थखातं शिस्तीने सांभाळल्याचा उल्लेख करत तटकरेंनी राज्याच्या सध्याच्या अर्थकारभारावर अप्रत्यक्ष टीका केली.
राष्ट्रवादी काँग्रेसला राज्याचे अर्थखातं मिळावं, यासाठी पक्ष आग्रही असल्याचे सुनील तटकरे यांनी सांगितले. अजित पवार अर्थमंत्री असताना त्यांनी आर्थिक शिस्त राखत आपत्तीच्या काळात शेतकऱ्यांना तातडीने आर्थिक मदत दिली होती, असे तटकरे म्हणाले.
या विधानातून मुख्यमंत्री देवेंद्र फडणवीस यांच्याकडे असलेल्या अर्थखात्याच्या कारभाराबाबत तटकरेंनी अप्रत्यक्षपणे प्रश्न उपस्थित केल्याची राजकीय चर्चा सुरू झाली आहे. तटकरे यांनी हे वक्तव्य धाराशिव येथे प्रसारमाध्यमांशी बोलताना केले.
राज्य सरकारने दिवाळीपूर्वी शेतकऱ्यांना तातडीची आर्थिक मदत म्हणून प्रत्येकी पाच हजार रुपये देण्याची घोषणा केली आहे. मात्र, शेतकऱ्यांचे नुकसान आणि त्यांच्या गरजा लक्षात घेता ही रक्कम अपुरी असल्याची टीका होत आहे.
या पार्श्वभूमीवर मदतीची रक्कम वाढवण्याची मागणी सुनील तटकरे यांनी केली. यासाठी आपण मुख्यमंत्री देवेंद्र फडणवीस यांची भेट घेणार असल्याचे त्यांनी सांगितले. त्यामुळे शेतकरी मदतीच्या मुद्द्यावर सत्ताधारी महायुतीतील घटक पक्षांमध्येही चर्चा होण्याची शक्यता आहे.
राज्य मंत्रिमंडळाच्या बैठकीनंतर मुख्यमंत्री देवेंद्र फडणवीस यांनी शेतकऱ्यांना दिवाळीपूर्वी प्रत्येकी पाच हजार रुपयांची तातडीची मदत देण्याची घोषणा केली होती. यंदा दुष्काळासंदर्भातील निर्णय आणि मदतीची प्रक्रिया लवकर सुरू केल्याचेही मुख्यमंत्र्यांनी सांगितले होते.
आता या मदतीची रक्कम वाढवण्याची मागणी पुढे आली आहे. सुनील तटकरे यांच्या विधानामुळे शेतकऱ्यांना दिल्या जाणाऱ्या मदतीबरोबरच राज्याच्या अर्थखात्याची जबाबदारी कोणाकडे असावी, हा मुद्दाही चर्चेत आला आहे.
Droght News : शेतकऱ्यांना हेक्टरी १ लाख रुपये द्या! वाशिममधून हर्षवर्धन सपकाळांची मोठी मागणी
