कॅनडामध्ये भारतीयांना कायमस्वरूपी रहिवासी बनण्याची सुवर्णसंधी; कार्नी सरकारने पाठवले आमंत्रण ( फोटो सौजन्य : सोशल मीडिया)
IRCC canadaimmigration : भारतीय युवकांना परदेशात स्थायिक होण्याची संधी गेल्या काही वर्षांत मोठ्या प्रमाणावर मिळू लागली आहे. विशेषतः कॅनडा हा भारतीय विद्यार्थ्यांचा आणि व्यावसायिकांचा आवडता देश ठरला आहे. उत्तम शिक्षण, रोजगाराच्या संधी, आरोग्य सेवा, जीवनमानाची गुणवत्ता आणि सुरक्षितता या सर्व बाबींमुळे लाखो भारतीय कॅनडामध्ये स्थायिक होण्याचं स्वप्न पाहतात. या स्वप्नपूर्तीसाठी इमिग्रेशन, रिफ्युजीज अँड सिटीझनशिप कॅनडा (IRCC) वेळोवेळी विविध कार्यक्रमांतर्गत कायमस्वरूपी निवासी दर्जासाठी (Permanent Residency – PR) आमंत्रणे पाठवत असते. याच अंतर्गत २ सप्टेंबर २०२५ रोजी एक्सप्रेस एंट्री ड्रॉ जाहीर करण्यात आला.
IRCC ने जाहीर केलेल्या माहितीनुसार, २ सप्टेंबरच्या या ड्रॉ अंतर्गत एकूण २४९ परदेशी नागरिकांना कायमस्वरूपी निवासी दर्जासाठी अर्ज करण्याची संधी दिली आहे. यामध्ये भारतातील अनेक पात्र उमेदवारांचाही समावेश असल्याची माहिती समोर आली आहे. या वेळच्या ड्रॉमध्ये सर्वात कमी क्रमांकावर असलेल्या उमेदवाराचा CRS (Comprehensive Ranking System) स्कोअर ७७२ होता. म्हणजेच, ज्यांचे गुण याहून अधिक आहेत, अशांना या फेरीत निवडले जाण्याची अधिक शक्यता आहे.
जागतिक घडामोडी संबंधित बातम्या वाचण्यासाठी येथे क्लिक करा : Kim Ju Ae : अंतर्गत खेळी की पितृसत्ताक व्यवस्थेला आव्हान? मोठा मुलगा असतानाही किम जोंग उनची मुलगी होणार पुढची हुकूमशहा
याआधी १८ ऑगस्ट २०२५ रोजी कॅनडाने प्रांतिक नामांकन कार्यक्रम (Provincial Nominee Program – PNP) अंतर्गत ड्रॉ काढला होता. त्या वेळी एकूण १९२ उमेदवारांना आमंत्रणे मिळाली होती. मात्र त्यावेळी सर्वात कमी क्रमांकावर असलेल्या उमेदवाराचा CRS स्कोअर ८०० होता. सप्टेंबरच्या ड्रॉमध्ये हा स्कोअर २८ गुणांनी घसरून ७७२ पर्यंत खाली आला आहे. ही घट भारतीय उमेदवारांसाठी महत्त्वाची मानली जाते, कारण कमी स्कोअरवर आमंत्रण मिळाल्यास अधिकाधिक लोकांना संधी उपलब्ध होते.
कॅनडामध्ये प्रांतिक नामांकन कार्यक्रम (PNP) हा कायमस्वरूपी रहिवासी दर्जा मिळवण्याचा एक महत्त्वाचा मार्ग आहे. या कार्यक्रमांतर्गत कॅनडातील वेगवेगळ्या प्रांतांना आणि प्रदेशांना त्यांच्या गरजेनुसार स्थलांतरितांची निवड करण्याचा अधिकार असतो. उदाहरणार्थ, एखाद्या प्रांताला आयटी क्षेत्रातील तज्ञांची जास्त गरज असल्यास त्या पार्श्वभूमीच्या उमेदवारांना नामांकन मिळू शकते. एकदा प्रांतिक नामांकन मिळाल्यानंतर उमेदवाराला कॅनडामध्ये कायमस्वरूपी रहिवासी दर्जासाठी अर्ज करण्याची मोठी संधी मिळते.
भारतामधील तरुण, व्यावसायिक आणि विद्यार्थी कॅनडामध्ये मोठ्या संख्येने स्थलांतरित होत आहेत. इंग्रजी भाषेचे चांगले ज्ञान, उच्च शिक्षणाची तयारी, आणि जागतिक रोजगार बाजारातील कौशल्य यामुळे भारतीयांना कायमस्वरूपी रहिवासी दर्जासाठी जास्त संधी उपलब्ध होते. तसेच, कॅनडामध्ये भारतीय समुदाय आधीपासूनच मोठ्या प्रमाणावर स्थायिक झाल्याने नवीन स्थलांतरितांना तिथे जुळवून घेणे तुलनेने सोपे जाते. भारतीय रेस्टॉरंट्स, मंदिरे, सांस्कृतिक कार्यक्रम आणि सामाजिक संस्था कॅनडामध्ये सर्वत्र असल्यामुळे भारतीयांना आपलेपणाची जाणीव होते.
जागतिक घडामोडी संबंधित बातम्या वाचण्यासाठी येथे क्लिक करा : Earths Gold : पृथ्वीच्या गाभ्यात सुमारे 30 अब्ज टन सोने असल्याचा अंदाज; शास्त्रज्ञांचा थक्क करणारा शोध
IRCC वेळोवेळी असे ड्रॉ काढत असते. त्यामुळे ज्या उमेदवारांनी अद्याप अर्ज केलेला नाही किंवा ज्यांचा स्कोअर पुरेसा नाही, त्यांना पुढील फेरीत संधी मिळू शकते. दरम्यान, या संधीचा फायदा घेण्यासाठी उमेदवारांनी आपले CRS स्कोअर सुधारण्याचे प्रयत्न सुरू ठेवणे आवश्यक आहे.
