शनिवार, 7 नोव्हेंबर 2026
(फोटो सौजन्य: सोशल मीडिया)
आता तुम्हाला लांबच लांब रांगेत उभं राहण्याची गरज लागणार नाही जर तुम्ही तामिळनाडू राज्यात राहत असाल. नुकताच सरकारने दारूची विक्री पूर्वीपेक्षा अधिक सोपी आणि जलद करण्यासाठी एक महत्त्वपूर्ण निर्णय घेतला आहे. ६ ऑगस्ट रोजी, तामिळनाडू स्टेट मार्केटिंग कॉर्पोरेशन लिमिटेड म्हणजेच TASMAC ने एक नवीन मोबाईल ॲप सुरू केले आहे, ज्याद्वारे तुम्ही तुमच्या मोबाईल फोनवरून दारूचा ब्रँड आणि किंमत पाहू शकता तसेच ऑनलाइन ऑर्डर देऊ शकता.
TASMAC ची डिजिटल मद्य प्रणाली राज्यातील अंदाजे ४,०३८ किरकोळ दुकानांमध्ये लागू केली जाईल. या ॲपचा वापर करून तुम्ही जवळपासची दुकाने सहजपणे शोधू शकता. याचे सर्वात महत्त्वाचे वैशिष्ट्य म्हणजे, प्रत्येक दुकानात कोणते ब्रँड उपलब्ध आहेत आणि त्यांच्या किमती काय आहेत, हे तुम्हाला या ॲपद्वारे शोधणं सोपं होणार आहे.
अलीकडेच, काही TASMAC कर्मचाऱ्यांवर ग्राहकांकडून जास्त पैसे आकारल्याचा आरोप झाला होता. मात्र, अशी प्रकरणे उघडकीस आल्यानंतर महामंडळाने त्या कर्मचाऱ्यांवर कठोर कारवाई केली. त्यामुळे, जास्त पैसे आकारण्याच्या तक्रारींना आळा घालण्यासाठी आता या नवीन ॲपचा वापर केला जात आहे.
तुम्ही आता तुमच्या मोबाईल ॲपद्वारे दारूचा ब्रँड आणि किंमत सहजपणे पाहू शकाल. तुम्ही तुमचे आवडते उत्पादन ऑनलाइन ऑर्डर देखील करू शकता. ऑनलाइन पेमेंट पूर्ण झाल्यावर, तुम्हाला एक QR कोड दिला जाईल. संबंधित TASMAC रिटेल दुकानात हा QR कोड दाखवून तुम्ही तुमची दारू घेऊ शकता. याचा सर्वात मोठा फायदा हा आहे की, दारू खरेदी करण्यासाठी तुम्हाला आता दुकानांमध्ये लांब रांगेत थांबण्याची गरज नाही.
