फोटो सौजन्य - Social Media
केंद्रीय माध्यमिक शिक्षण मंडळ (CBSE) ने आपल्या सर्व संलग्न शाळांना कळवले आहे की South Asian University (SAU), नवी दिल्ली येथे 2025-26 या शैक्षणिक वर्षासाठी प्रवेश प्रक्रिया सुरू झाली आहे. हे विद्यापीठ भारत सरकारच्या परराष्ट्र मंत्रालयाच्या आर्थिक सहाय्याने स्थापन करण्यात आले असून, भारतासह आठ SAARC देशांनी संयुक्तपणे याची स्थापना केली आहे.
SAU चे प्रमुख उद्दिष्ट म्हणजे दक्षिण आशियाई विद्यार्थ्यांना आंतरराष्ट्रीय दर्जाचे उच्च शिक्षण देणे. येथे मिळणाऱ्या पदव्या SAARC देशांमध्ये वैध आहेत. CBSE चे विद्यार्थी भारतातच नव्हे, तर आंतरराष्ट्रीय पातळीवर शिक्षण घेऊ इच्छित असतील, तर ही एक उत्तम संधी आहे. याशिवाय गुणवत्ताधारक आणि गरजू विद्यार्थ्यांना शिष्यवृत्ती व आर्थिक मदतही उपलब्ध होईल. SAU मध्ये अंडरग्रॅज्युएट, पोस्टग्रॅज्युएट आणि पीएच.डी. स्तरावरील अनेक अभ्यासक्रम उपलब्ध आहेत. प्रमुख कोर्सेसमध्ये कम्प्युटर सायन्स, मॅथेमॅटिक्स, बायोटेक्नोलॉजी, व्यवस्थापन (BBA-MBA), कायदा (LLM), अर्थशास्त्र, समाजशास्त्र, आंतरराष्ट्रीय संबंध, हवामान बदल व शाश्वत विकास यांचा समावेश आहे.
नवीन काळाच्या मागणीनुसार विद्यापीठात AI, मशीन लर्निंग, डेटा सायन्स, सायबर सिक्युरिटी यांसारख्या आधुनिक कोर्सेसही सुरू करण्यात आले आहेत. यामुळे विद्यार्थ्यांना जागतिक स्तरावर करिअरच्या संधी प्राप्त होऊ शकतात. SAU चे Virtual Campus Programs देखील आहेत, जे दूरस्थ विद्यार्थ्यांसाठी खास डिझाईन केलेले आहेत. या कार्यक्रमांत BCA (Hons.), BBA (Hons.), BS in Data Science & AI, MCA, MBA, संगीत, फॅशन, शॉर्ट डिझाईन कोर्सेस इ. समाविष्ट आहेत.
विद्यार्थ्यांना प्रवेशासाठी CUET, JEE, CAT, GMAT, NET यांसारख्या राष्ट्रीय परीक्षांवरून किंवा थेट प्रवेशाद्वारे संधी दिली जाते. विशेषतः CBSE चे गुणवंत विद्यार्थी शिष्यवृत्तीचे लाभार्थी ठरतात, जेणेकरून आर्थिक अडचणीमुळे शिक्षणात अडथळा येणार नाही. प्रवेशासाठी शेवटची तारीख डायरेक्ट मोडसाठी 2 जून 2025 आणि Virtual Campus साठी 19 जून 2025 आहे. अधिक माहितीसाठी www.sau.int या संकेतस्थळावर भेट द्यावी किंवा admissions@sau.int व admissions@vc.sau.int या ईमेलवर संपर्क साधावा.
