शनिवार, 17 ऑक्टोबर 2026
MPSC च्या पेपरफुटीप्रकरणी मोठी कारवाई; थेट अवर सचिवालाच केली अटक (संग्रहित फोटो)
लातूर : अवैध शस्त्रे बाळगून दहशत निर्माण करणाऱ्या समाजकंटकांविरुद्ध लातूर पोलिसांनी धडक मोहीम सुरू ठेवली असून, स्थानिक गुन्हे शाखेच्या पथकाने शिवाजी चौक परिसरात धारदार लोखंडी कोयता घेऊन फिरणाऱ्या तरुणाला ताब्यात घेतले आहे. या कारवाईत धारदार कोयता आणि सुझुकी कंपनीची एक्सेस दुचाकी असा एकूण अंदाजे ८०,४००/- किमतीचा मुद्देमाल जप्त करण्यात आला आहे.
दिनांक १६ ऑगस्ट २०२६ रोजी रात्री सुमारे ८ वाजता, स्थानिक गुन्हे शाखेचे पथक शहरातील अवैध धंद्यांविरुद्ध कारवाईसाठी गस्त घालत असताना शिवाजी चौक परिसरातील क्रीडा संकुलाच्या गेटसमोर असताना पथकाला गोपनीय बातमीदारामार्फत माहिती मिळाली. छत्रपती शिवाजी चौक ते राजीव गांधी चौकाकडे जाणाऱ्या मुख्य रस्त्यावर दत्त मंदिरासमोर, पुढारी पान स्टॉलजवळ दोन तरुण काळ्या रंगाच्या सुझुकी एक्सेस दुचाकीवर बसून हातात लोखंडी कोयता घेऊन दहशत निर्माण करीत असल्याची माहिती मिळाली. माहितीची खात्री करून पोलिसांनी घटनास्थळी धाव घेतली.
पोलिसांचे पथक जवळ जात असताना दोघांपैकी एक तरुण पळून गेला. दुसऱ्या तरुणाला पोलिसांनी ताब्यात घेतले. त्याने आपले नाव १) अर्जुन सखाराम जाधव (वय २१, रा. दादोजी कोंडदेव नगर, लातूर) असे सांगितले. त्याच्यासोबत असलेल्या व पळून गेलेल्या तरुणाचे नाव २) कृष्णा अरविंद खुडे (रा. लोदगा, ता. औसा, जि. लातूर, सध्या रा. दादोजी कोंडदेव नगर, लातूर) असल्याचे तपासात समोर आले आहे. ताब्यात घेतलेल्या अर्जुन जाधव याची पंचांसमक्ष अंगझडती घेतली असता त्याच्या उजव्या हातात धारदार लोखंडी कोयता आढळून आला. तसेच घटनास्थळी असलेली सुझुकी कंपनीची एक्सेस दुचाकी क्रमांक एम.एच.२४ सी.जी.४७०७ जप्त केली.
कारवाई दरम्यान सुमारे ४००/- किमतीचा लोखंडी कोयता आणि अंदाजे ८०,०००/- किमतीची दुचाकी, असा एकूण ८०,४००/-किमतीचा मुद्देमाल पोलिसांनी जप्त केला आहे. याप्रकरणी शिवाजीनगर पोलीस ठाण्यात शस्त्र अधिनियम कलम ४/२५ अन्वये गुन्हा दाखल करण्यात आला आहे. ही कारवाई वरिष्ठांच्या मार्गदर्शनात स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वातील पथकामधील पोलीस अंमलदार साहेबराव हाके, रसूल पठाण, अर्जुन रजपूत, रियाज सौदागर, मनोज खोसे, सुधीर कोलसुरे, आनंद हल्लाळे यांनी केली आहे. अवैध शस्त्रे बाळगून दहशत निर्माण करणाऱ्या व्यक्तीविरुद्ध लातूर पोलिसांकडून कठोर कारवाई सुरू असून, सार्वजनिक ठिकाणी शस्त्र बाळगून नागरिकांमध्ये दहशत निर्माण करणाऱ्यांची गय केली जाणार नाही.
